Apolonia 0–1 SHKUMBINI

Alrind Nora i dhuroi tri pikë të arta në luftën e Shkumbinit për një vend në
Ligën e Europës, kur sulmuesi gjirokastrite i peqinasve shënoi në
minutën e 52-të golin e vetëm në Apolonia-Shkumbini (0-1), duke
hidhëruar disa mijëra tifozë fierakë.

Kjo ishte humbja e dytë rresht e Apolonisë pas katër fitoreve
radhazi të formacionit të drejtuar nga serbi Esad Karishik. Edhe në
fazën e parë Apolonia kishte humbur me Shkumbinin (2-0), pikërisht në
debutimin e trajnerit Karishik.


Shkumbini i Gugash Maganit regjistroi fitoren e 9-të sezonale, duke
u ngjitur në vendin e katërt, tashmë me 33 pikë, katër më shumë se Besa
e vendit të pestë (29 pikë).

Kjo ishte fitorja e 11-të historike e Shkumbinit ndaj Apolonisë në 23 ndeshje (7 fitore Apolonia, 5 barazime).


Apolonia (24 pikë) ndjen presionin e Partizanit të vendit të 10-të,
kur të kuqtë kanë vetëm dy pikë më pak se fierakët, por që të dy
skuadrat ndodhen në zonën “play-out”.

Ka mjaftuar një gol i Norës që peqinasit të fitojnë, ndërsa fierakët sërish rrezikojnë
Apolonia - Shkumbini 0-1
Shënues: Nora 52′
Apolonia: Hoxha, Peqini, Ferizoviç, Spaho, Sreçkoviç, Gega (Roshi
74′), Kelmendi (Dhrami 46′), Semir Haxhibuliç (Çerçizi 56′), Asllani,
Bërkiç, Sead Haxhibuliç. Trajner: E.Karishik.
Shkumbini: Llani, Grami, Shameti, Xhyra, Shenaj, Delioski (Bizhyti
46′), Gjata, Nora, R.Dervishi (Gërxho 87′), Rizvanolli (Pashja 74′),
Mujdragiç. Trajner: G.Magani.
Gjyqtarë: K.Meta, E.Doda, E.Biçaku (Tiranë)
Kartonë të verdhë: Peqini, Ferizoviç, Spaho, Çerçizi, Grami, R.Dervishi, Bizhyti.
“Radiografia”
2′- Një aksion i bukur i fierakëve. Semir Haxhibuliç ka krosuar në
zonë dhe atje Ferizoviç ka kërcyer fuqishëm, duke e detyruar portierin
Llani të bëjë një grushtim të vështirë.
8′- Gjata ka gjuajtur nga një distancë rreth 30 metra dhe portieri
Hoxha ka kryer një kërcim akrobatik, duke grushtuar në goditje këndi.
11′- Një top që shkon rastësisht te Gjata, i cili lëshon për herë të
dytë një gjuajtje të hidhur, rrafsh me tokën, por Hoxha ndodhet në
pozicion.
25′- Topi preket me dorë nga Xhyra. Fierakët pretendojnë për 11-metërsh, por gjyqtari Meta ka vazhduar lojën.
30′- Një gjuajtje e fortë nga distanca e sulmuesit Sead Haxhibuliç,
por topi kalon pak centimetra larg shtyllës së djathtë pingule.
35′- Sreçkoviç ka shmangur me mjeshtëri Xhyrën, vërshon në zonë dhe
pason te Kelmendi, i cili ka parë të zbuluar kapitenin Asllani.
Gjuajtja e këtij të fundit ka ngritur për një çast në këmbë tifozërinë
vendëse, por Llani ka bërë mrekullinë.
39′- Një shpërthim i Semir Haxhibuliçit nga e majta, driblon një
mbrojtës të skuadrës mike dhe ka gjetur fare të lirë Bërkiçin brenda
zonës, i cili ka gjuajtur në mënyrë të rrufeshme, por jashtë.
43′- Sërish Semir Haxhibuliç, që ka shërbyer mjaft mirë për
Ferizoviçin, i cili gjuan me kokë dhe topi kalon fare ngjitur me
shtyllën traversale të portës mike.
45′- Sead Haxhibuliç ka marrë një kros nga Haxhibuliçi tjetër dhe ka
goditur me kokë drejt portës, por ka ndërhyrë i qetë portieri Llani.
52′- Nora ka marrë një top pa shumë pretendime nga thellësia e
mesfushës. Mbrojtja fierake e kujton në pozicion jashtë loje.
Gjirokastriti e kalon topin qetësisht mbi kokën e portierit. 0-1 për
Shkumbinin.
60′- Çerçizi është shërbyer nga Dhrami, por gjuan gabim.
64′- Asllani ka gjuajtur fort, Llani kryen një grushtim të vështirë.
67′- Dyshja Nora-Rizvanolli kanë zënë në befasi mbrojtjen fierake dhe për pak sa nuk shënojnë golin e dytë.
78′- Dhrami ëshhtë shfaqur i vetëm përballë Llanit, ia ka kaluar topin parabël mbi kokë, por sfera përfundon jashtë kuadratit.
Komenti
Apolonia ka dështuar përballë publikut të vet, përballë një
Shkumbini që ka marrë një tripikësh të vlefshëm dhe pa shumë mund.
Skuadra fierake është treguar disi e përgjumur në fragmente të ndryshme
të lojës, duke pasur besim të tepruar në vetvete. Ka qenë një lojë që
ka nisur me një rast të mirë të fierakëve dhe kjo krijoi përshtypjen se
çdo gjë do të shkonte sipas parashikimit të vendësve. Por me kalimin e
kohës, janë miqtë ata që shfaqen më të rrezikshëm përpara portës së
Hoxhës, duke qenë njëherësh dhe mjaft të sigurt dhe të pakalueshëm në
mbrojtje.
Trajneri Magani e ka rreshtuar mirë skuadrën e tij, e cila arrin të
kontrollojë veprimet e futbollistëve të Apolonisë. Nga ana e vet,
skuadra fierake është e prirur më tepër në lojën me topa të gjatë në
ajër, duke shfrytëzuar dhe shtatlartësinë e sulmuesve Bërkiç e
Haxhibuliç.
Në përgjithësi, pjesa e parë është luajtur në mesfushë, edhe pse rastet
nga të dyja skuadrat nuk kanë mungura. Por duhet theksuar gjithashtu se
sulmuesit e të dy ekipeve janë nxituar në veprime në momentet finale,
pa mohuar dhe formën e mirë të dy portierëve respektivë. Me fillimin e
pjesës së dytë, trajneri Karishik do të hedhë edhe një tjetër forcë
sulmuese.
Në fushë është futur Dhrami në vend të Kelmendit, i cili nuk ka qenë
në kontigjentin e duhur fizik në këtë takim. Por teksa pritej goli i
fierakëve, që kanë shtuar furinë e veprimeve ofensive dhe e kanë
mbyllur Shkumbinin në mbrojtje, Nora ka paralizuar të gjithë stadiumin
dhe e ka bërë të heshtë, teksa ka shënuar, duke përfituar dhe nga
hutimi i mbrojtjes vendëse. Kaq ka mjaftuar dhe peqinasit luajnë më
qetë, madje nuk ngurrojnë të vonojnë edhe lojën, duke u rrëzuar herë
pas here në fushë, thuajse pas çdo ndërhyrjeje të futbollistëve të
Apolonisë. Kësisoj, gjyqtari Meta është detyruar ta ndërpresë lojën
herë pas here, por futbollistët vendës duket se e humbin qetësinë
gradualisht, duke u ndodhur gjithmonë nën trysninë e shënimit të golit
të barazimit.
Karishik luan edhe “kartat” e fundit, duke aktivizuar Çerçizin në
vend të Semir haxhibuliçit të dëmtuar dhe sulmuesin Roshi në vend të
Gegës. Me gjithë këto përpjekje dhe shtytjes së skuadrës më përpara në
drejtim të portës së Llanit, peqinasit arrijnë ta ruajnë ta paprekur
portën e tyre, duke siguruar në fund të takimit një fitore mjaft të
vlefshme dhe duke forcuar pozitat e saj në vendet e kreut të tabelës.
Ndërsa skuadra fierake, e futur me mjaft bindje për të marrë fitoren
kundër Shkumbinit, është treguar mjaft konfuze në lojën e saj dhe ka
humbur një rast të mirë për t’u ngjitur në vendin e gjashtë të
renditjes. Tashmë Apolonia ndien edhe më pranë dihatjen e skuadrave të
fundit të tabelës dhe ka komprometuar sërish pozicionimin e saj.

Deklarojnë:
Esad Karishik, trajner i Apolonisë: “Gjatë gjithë javës kemi pasur
probleme. Lojtarët e mesit të fushës janë të dëmtuar, si Hoti apo dhe
Kelmendi, i cili luajti një pjesë, por ishte i dëmtuar, gjithashtu ka
munguar dhe zëvendëskapiteni Shoshi. Faktikisht Apolonia ka zhvilluar
një ndeshje shumë të dobët sot. Krahas kësaj loje jo të mirë, them se
na ka munguar edhe fati. Shkumbini shfrytëzoi rastin, shënoi golin dhe
kështu fitoi. I përgëzoj miqtë për fitoren. Më vjen keq për tifozët
tanë dhe në ndeshjen tjetër do të mundohemi të kompensojmë diçka nga
kjo që humbëm sot.”
Gugash Magani, trajner i Shkumbinit: “Ndeshja ishte shumë e fortë
nga të dyja skuadrat, një lojë ku mbizotëroi në çdo moment “fair-
play”. Shfytëzuam rastet që na u krijuan, shënuam dhe, po të ishim
treguar më të kujdesshëm, mund të kishim shënuar edhe gola të tjerë.
Megjithatë, duhet pranuar edhe presioni që bënë vendësit gjatë gjithë
lojës, por ne u mbrojtëm mirë dhe luajtëm me kundërsulm. Jemi brenda
objektivave që i kemi vënë vetes, por gjithmonë me këmbë në tokë, sepse
kjo ndeshje pasohet nga ndeshje të tjera.”

Të veçanta:
- Në tribunën
përballë, për herë të parë është shpalosur një flamur gjigant me mbishkrimin: “Brigada C”, grupimi më i ri i tifozëve fierakë.
- Apolonia ka luajtur sërish me fanellat e veçanta të saj, të bardha, me vija të gjelbra horizontale.
- Te Shkumbini kanë luajtur edhe dy ish-futbollistë të Apolonisë, Deliovski dhe Gërxho.