JAVA 28 /SHKUMBINI - Dinamo

gjyqtaret e ndeshjes...
T. Latifi, G. Maloku, P. Goxhaj

Portieri i Dinamos, Elvis Kotorri beson se do t’ia dalë të ndalë sulmin e Shkumbinit. Ish-portieri i Elbasanit ka luajtur më parë me skuadrën peqinase në sezonin 2003-2004.

“Loja e tyre bazohet te kolektiviteti dhe grupi ka një ego për të admiruar. Kanë plus edhe tifozerinë”, - tha portieri dinamovit, i cili ka pësuar numrin më të vogël të golave në kampionat, 10 nga 11 që ka pësuar në total Dinamo në 27 javë.

albania-sport.com

19 Prill Në të gjitha ndeshjet e mbetura deri në fund të kampionatit, Shkumbini do të kërkojë të marrë më të mirën e mundshme. Këtë ua ka bërë të ditur futbollistëve peqinas, para stërvitjes së djeshme, tekniku Gugash Magani. "Kjo është kërkesa jo vetëm e imja si trajner, por edhe e presidentit Ismaili" u ka thënë Magani atyre, në prag të ndeshjes së sotme me blutë e Dinamos. Me këtë, i pari i pankinës peqinase ka treguar hapur se sot do të luhet vetëm për të marrë maksimumin në fushën e lojës. Edhe pse është i preokupuar për ndeshjen, bën përshtypje vendosmëria e teknikut Magani për t'i kundërshtuar fjalët, që janë përhapur për një rezultat të paracaktuar. "Eshtë më tepër se qesharake - thotë Magani, - aq më tepër kur Shkumbini nuk ka asnjë motiv apo interes për të bërë lëshime. Në këto kushte, gjatë gjithë javës jemi përqendruar në përgatitjet për përballimin me sukses të kësaj ndeshjeje, që për ne ka vlerë të dyanshme: në planin moral dhe sigurimin e pikëve të plota". "Po shikojmë - vijon tekniku peqinas, - që mediat janë kthyer në arena lufte midis kundërshtarëve, madje me një ngarkesë të tillë, që do t'ua kishte zili edhe fusha e futbollit. Por kjo është shumë e dëmshme për futbollistët, sidomos të skuadrës sonë, që është vënë nën akuzë. Prandaj, si staf teknik u kemi kërkuar lojtarëve të qëndrojmë sa më larg këtyre thashethemeve, të tregohen të qetë në fushën e lojës e të mos ngarkohen psikollogjikisht nga sajime të tilla". Duke vazhduar më tej, Magani ka nënvizuar edhe faktin se fitorja nuk do të jetë e lehtë, sepse përballë do të kenë një skuadër të fortë dhe ambicioze, që edhe ajo do të luajë sot vetëm për fitore, sepse kështu mund të ecë drejt titullit kampion. "Gjithsesi, - ka përfunduar Magani, - ne do të bëjmë gjithçka varet nga ne në fushë, që fitorja të jetë në anën tonë".



Basti i Dabit: Luajmë me nderin tonë

Rezart Dabulla i sheh gjërat me sy praktik. "Nëse nuk do kisha besuar se skuadra ime do luante një ndeshje të vërtetë, ju mendoni se do të isha kaq naiv, sa të futesha në fushë? I pari dal, nëse konstatoj diçka; nëse nuk do të kisha besuar dhe nuk do kisha marrë garanci, atëherë unë nuk do të vija çdo ditë për t'u stërvitur në Peqin". E, megjithatë, një Peqin i tërë është nën presion. "Të jemi të qartë që në fillim: presioni sportiv, por edhe ai moral, është në anën e Dinamos. Sepse ne, të themi të vërtetën, kemi dy rezultate në dorë, fitoren dhe barazimin. Nëse arrijmë një nga këto dy rezultate, ne kemi shpëtuar fytyrën dhe nderin e një qyteti. Më vjen keq që kjo ndeshje është përgatitur kështu. Futbolli i njeh të tri rezultatet, por tani jemi të detyruar që të luftojmë deri në fund për të shpëtuar moralin. Nëse Shkumbini do të humbasë, të gjithë do mendojnë se ndeshja ka qenë e lënë". Por Shkumbini nuk humbet kurrë në fushën e tij: "Dhe kjo gjë është ktheyr në një bumerang... (qesh). Fakti që nuk kemi humbur asnjë ndeshje në fushën tonë, përveç asaj me Tiranën, u ka krijuar të gjithëve idenë se jemi të pathyeshëm. Në fakt, në Peqin kemi faktorë psikollogjikë shumë të rëndësishëm për të arritur suksesin. Më duhet të them që asnjë nga lojtarët nuk i ka asnjë borxh Dinamos, jo vetëm kaq, por nuk duhet përkthyer sikur po bëhemi armiq me ta. Ne jemi armiq me të gjithë dhe me asnjë njëkohësisht. Unë personalisht do të jap maksimumin, do të kërkoj të marr premion prej 1 mijë eurosh, që na është premtuar në rast fitoreje, dhe të rris vlerat e mia si lojtar. Ky diskutim vlen për të gjithë".
sport ekspres

Ilir Daja: Titulli nuk ndahet në Peqin
19 Prill "Janë edhe pesë ndeshje të tjera deri në fund, që do të përcaktojnë gjithçka për trofeun e kampionatit. Por unë jam i bindur që ndeshjen me Shkumbinin do ta nxjerrim me sukses"



Trajneri i Dinamos, Ilir Daja, është i sigurt se skuadra e tij, sot, në fushën sportive të Peqinit, do të bëjë më të mirën e saj. Skuadra është përgatitur gjatë gjithë javës, ndoshta për të bërë ndeshjen më të mirë të sezonit, kurse nga kampi blu, me përjashtim të kërkesës së Dajës për gjyqtarë të huaj, i janë ruajtur deklaratave, që mund të acaronin situatën. Megjithëse, nisur nga vështirësia që paraqet fusha e Peqinit, tensioni dhe mund të jetë i pranishëm. "Ajo çka është më kryesorja - thotë Daja - i gjithë grupi i futbollistëve është në dispozicionin të stafit teknik për këtë ndeshje. Që do të thotë se, pas disa seancave individuale, edhe Graniç e Vincetiç në dy ditët e fundit kanë bërë stërvitje normale. Me përjashtim të Ishkës, i skualifikuar, të gjithë të tjerët i kemi gati për ndeshje, duke patur më shumë alternativa për të ndërtuar formacionin anti-Shkumbin. Ndeshja është e vështirë, sepse Shkumbini në fushën e tij ka si katalizator tifozerinë e zjarrtë, që e mbështet nga minuta e parë deri në të fundit. Megjithatë, ne do të bëjmë më të mirën me dëshirën për ta mbajtur kreun, ndaj duhet ta nxjerrim sa më pozitivisht këtë ndeshje". Ndonëse nuk e deklaron se me çfarë do të ishte i kënaqur në këtë ndeshje, Daja duket se nuk e përtyp barazimin, për më tepër që Partizani, rivali i drejtpërdrejt i dinamovitëve për titullin kampion, luan në Elbasan. Ndaj, pyetja jonë, nëse do të kënaqej me barazimin në Peqin, ka mbetur pa përgjigje nga trajneri i bluve.



Me superlativa për peqinasit

"Kanë përvojën brenda grupit të tyre". Ky është vlerësimi i parë i trajnerit dinamovit për skuadrën peqinase, të cilën e ka parë në fazën e parë, kur ishte drejtor teknik i bluve, por dhe në të dytën, teksa ishte ulur në krye të pankinës. "S'kam nevojë të shoh dhe të them se çfarë duhet ndryshuar nga ndeshja e fazës së parë, për të kaluar me sukses në Peqin, sepse Shkumbinin arrita ta shoh me kujdes në fazën e dytë. Fakti që aty luajnë futbollistë, të cilët janë aktivizuar jo vetëm me Dinamon e Tiranën, por dhe me skuadra të tjera të kategorisë superiore, të bën të mendosh që janë një grup i organizuar mirë. Ata i dhanë shenjat në fazën e dytë, kur ne, vërtet fituam minimalisht, 1-0, por na vunë në vështirësi. Tifozeria, shto dhe kualitetet në përbërje, e bëjnë Shkumbinin të fortë. Një ndeshje e vështirë, që megjithatë duhet kaluar me sukses". Duke vazhduar më tutje, Daja ka mendimin se jo gjithçka përfundon në Peqin përsa i përket titullit kampion. "Eshtë një nga finalet, që kemi deri në fund të kampionatit. Pas Peqinit janë dhe pesë ndeshje të tjera, katër në Tiranë dhe vetëm një në transfertën shkodrane, që do të vendosin shumë gjëra. Por, për të mbajtur kreun të paprekur, duhet kaluar transferta peqinase me sukses", ka përfunduar Daja.



Stërvitja e fundit, vetëm 30 minuta

Ka qenë e shkurtër seanca e djeshme stërvitore e bluve, e cila ishte e fundit në prag të ndeshjes me Shkumbinin, që luhet sot në Peqin. Gjithçka ka patur të bëjë me variantet taktike, që do të përdoren në ndeshjen e sotme, por dhe me mënyrën e ekzekutimit të goditjeve të dënimit, apo të këndit. Madje, është punuar si për fazën mbrojtëse, ashtu dhe atë sulmuese. Pas stërvitjes, dinamovitët janë nisur drejt pikës së tyre të grumbullimit, që është hoteli "Ylli i detit" në plazhin e Shkëmbit të Kavajës. E gjithë skuadra është në dispozicion të trajnerit Daja, duke shtuar dhe Vincetiç e Graniç, kurse do të mungojë vetëm Ishka, për shkak të gjashtë kartonave të verdhë

sport ekspres

Megjithëse janë treguar më këmbëngulës e më kërkues, peqinasit nuk kanë mundur të marrin më shumë se një pikë. Por Shkumbini ka paraqitur një lojë të mirë, falë grintës së futbollistëve të tij. Edhe pse vetëm një pikë, për skuadrën peqinase ajo ka vlerën e një suksesi, pasi u barazua me Dinamon, kryesuese dhe pretendente për fitimin e titullit kampion. Dëshira për t’i shkëputur pikë, madje dhe për të fituar ndaj një skuadre të tepër të fortë, i kishte motivuar së tepërmi vendasit. Trajneri Magani paraqiti në fushë një skuadër të organizuar taktikisht dhe, duke përdorur edhe zëvendësimet, ajo e përballoi Dinamon, madje, po të ishte treguar më e saktë në finalizimin e aksioneve sulmuese, edhe mund të kishte fituar. Shkumbini e filloi mirë ndeshjen dhe mund të kalonte në avantazh shumë shpejt, nëse Qorri do të ishte treguar më i saktë para portierit Kotorri. Më pas, skuadra vendase merr plotësisht inisiativën dhe organizon disa veprime të bukura e me fantazi. Sulmet përqendrohen nga krahët, por harkimet e topit nuk u shfrytëzuan prej lojtarëve të sulmit. Barazimi qe dhe një përgjigje ndaj thashethemeve për ndonjë lëshim ndaj Dinamos, që shkaktuan aq shumë polemika. Në këtë ndeshje është parë një Shkumbin, që nuk kishte asgjë të përbashkët me akuzat që i ishin drejtuar, jo vetëm nga loja, por edhe nga motivimi e këmbëngulja për të fituar. Ajo çka shfaqi skuadra peqinase ishte dëshira e madhe e lojtarëve të saj për të frenuar marshimin e bluve të Dinamos drejt titullit. Nga ana e saj, në pjesën më të madhe të kohës Dinamo zhvilloi një lojë racionale, duke i besuar më shumë kundërsulmit, me anë të cilit disa herë e rrezikoi portën e Shkumbinit. Lëvizshmëria e madhe në radhët e lojtarëve vendas, loja e thjeshtë e pa gabime ua vështirësoi shumë punën bluve për të marrë pikët e plota në Peqin. Shkumbini tregoi aftësi, jo vetëm për të penguar manovrën e miqve, por edhe i vunë në vështirësi për minuta të tëra. Por vendasit i ka penguar edhe një herë mungesa e qetësisë në finalizimin e aksioneve. Peqinasit edhe mund të shënonin, por mbrojtja e bluve dhe portieri Kotorri u treguan në lartësin?_duhur. Më shumë se rezultati, loja që zhvilloi tregoi që Shkumbini nuk është pjesë e kompromiseve dhe e aleancave.