Dinamo 3-0 SHKUMBINI

DINAMO-SHKUMBINI

Gjyqtar: Bardhyl Pashaj

Blutë kanë fituar ditën e djeshme 3-0, duke qenë komodë në zonën UEFA, Shkumbini në 71′ me 10 lojtarë


Dinamo - Shkumbini 3-0

Shënues: Plaku 9′, 65′, 83′

Kartonë të verdhë: Brahja, Bizhyti (2), Salliu, Llani, Plaku
Karton të kuq: Bizhyti

Dinamo: Kotorri, Sina, Brahja, Pisha, Bodrusiç, Çeko (Daja 58′), Allmuça, Poçi (Jusufi 70′), Ferraj, Sefa (Romero 76′), Plaku
Trajner: Artan Mërgjyshi
Shkumbini: Llani, Salliu, Ramazani (Mujdragiç 23′), Shameti, Xhyra, Gjata (Turdiu 46′), Jakimovski, Gerxho, Bizhyti, Lluca, Rizvanolli (Dervishi 46′).
Trajner: Gugash Magani
B.Pashaj, S.Avdo, D.Agaraj (Tiranë)


“Radiografia”

9′ Sina jep një asist perfekt për Plakun, i cili nuk gabon përballë Llanit dhe kalon Dinamon në avantazh.
18′ Allmuça tenton nga distanca, por Llani zotëron pa problem.
19′ Bizhyti ndërhyn fort ndaj Bodrusiçit dhe për kryesorin Pashaj është karton i verdhë dhe automatikisht i kuq, pasi mesfushori bardhekaltër ishte ndëshkuar më parë me një tjetër të verdhë për protesta.
21′ Bodrusiç hedh një kros në zonë dhe Sefa tenton të godasë me kokë, por topi shkon tek Çeko, që godet lehtë në duart e Llanit.
40′ Kros i Bodrusiç në zonë dhe Sefa bën spond për Allmuçën, që godet me të majtën, por gjuajtja e mesfushorit blu është e lehtë dhe e parrezikshme.
45′ Kombinim i bukur Plaku Sefa dhe aty Allmuça në pozicion të favorshëm gjuan bukur, por zotëron Llani.
64′ Plaku godet nga jashtë zone me të majtën dhe aty Llani grushton në goditje këndi.
65′ Ferraj kroson për Plakun, që tregohet i zgjuar, duke devijuar në portën peqinase topin që përfundon në rrjetë.
68′ Plaku shërben bukur për Allmuçën që godet fuqishëm, por jashtë.
79′ Gërxho tenton nga jashtë zone, por iniciativa e tij përfundon mbi shtyllën tranversale të Kotorrit.
82′ Jusufi shërben nga e djathta, në fillim Plaku dhe më pas Romero nuk arrijnë ta shtyjnë topin në rrjetë.
83′ Jusufi kombinon me Sinën dhe shqiptaro maqedonasi jep një asist për Plakun që shënon golin e tretë personal dhe të takimit. Ka protesta nga pala peqinase për pozicion jashtë loje.

Komenti

Dinamo ka fituar një ndeshje ndaj një rivali direkt si Shkumbini për vendin e tretë. Në fakt, sigurimi i tri pikëve për blutë ka ardhur pa shumë sforcim, pasi kundërshtari e kishte bërë zgjedhjen e tij që në formacionin e hedhur në fushën e blertë nga trajneri Gugash Magani, ku binte në sy mungesa e shumë lojtarëve titullarë. Diçka të tillë e pohoi dhe tekniku peqinas pas takimit.

Sigurisht, këto zgjedhje kanë qenë të kondicionuara nga ana e stafit peqinas duke parë sfidën tepër delikate, që e pret Shkumbinin në fushën e tij ditën e mërkurë skuadrën e Flamurtarit në gjysmëfinalen e kthimit, pasi ndeshja e parë ka përfunduar 1-0 në favor të vlonjatëve.

Gjithsesi, ndeshja ka nisur me një herë me gol ku Sebino Plaku, pas një asisti perfekt të Sinës, gjendet i vetëm përballë Llanit dhe nuk gabon. Ndërkohë, pas një proteste ndaj gjyqtarit Pashaj, mesfushori Bizhyti ndëshkohet me karton të verdhë. Ky karton do të jetë fatal për të, pasi disa minuta më vonë, gjatë një ndërhyrjeje të rëndë ndaj Bodrusiçit, lushnjari bardhekaltër merr dhe një tjetër kartonë të verdhë, duke dalë nga fusha automatikisht dhe duke lënë skuadrën e tij me një lojtar më pak.

Që nga ky moment loja flet vetëm për Dinamon, por blutë nuk do të arrijnë ta thellojnë rezultatin në pjesën e parë, edhe pse Allmuça & CO kanë disa raste të tjera të volitshme. Magani sheh problem në prapavijën e tij dhe largon Ramazanin për të aktivizuar një mbrojtës tjetër si Mujdragiç.

Në fraksionin e dytë të ndeshjes Shkumbini kryen menjëherë dy zëvendësime, duke aktivizuar Turdiun dhe Dervishin në vend të Rizvanollit dhe Gjatës. Por Dinamo është më e gjallë në lojën e saj dhe me një aksion të Ferrajt nga krahu i majtë arrin të dyfishojë rezultatin ku Plaku shënon me zgjuarësi golin e 2 personal dhe të takimit, duke dyfishuar rezultatin.

Shkumbini mundohet të bëjë diçka, por iniciativat e bardhekaltërve janë sporadike, ku në një moment mesfushori Gërxho lëshon një “silur” nga jashtë zone, por mbi traversë. Me ndërrimet e kryera loja e bluve freskohet disi në lëvizje dhe formimin e aksioneve, ku në fushën e blertë janë aktivizuar Daja, Jusufi, Romero. Pikërisht Jusufi, pas një kombinimi të bukur me Sinën, do të nxjerrë të lirë Plakun në fundin e takimit, i cili fiksion rezultatin e ndeshjes në 3-0 dhe shënon tripletën e tij personale për këtë sfidë, duke shkuar në kuotën e 17 golave.

Dinamo ka siguruar një tjetër tripikësh duke “blinduar” disi vendin e 3. Ndërkohë që ndeshjen e ardhshme blutë do të presin sërish në shtëpi Lushnjën, e cila lufton për mbijetesë.

Deklarojnë…

Shkëlqim Muça, trajner i Dinamos: “Ishte një fitore e pastër, për vetë faktin që është një tripikësh ndaj kundërshtarit që kishim më afër në zonën UEFA. Natyrisht, Shkumbini ruajti shumë forca për ndeshjen e së mërkurës ndaj Flamurtarit dhe kjo gjë na i lehtësoi pak punët.

Më bëhet qefi kur shënuesit shënojnë gola, për më shumë Plaku sot shënoj 3 gola. Ata punojnë shumë në stërvitje, sidomos përpara portës dhe është diçka e mirë, kur i konkretizon në ndeshje. Ishte më mirë të shikoje ndeshjen nga tribuna, them se edhe takimet e tjera do t’i ndjek atje (qesh në këto momente).”

Gugash Magani, trajner i Shkumbinit: “Unë do të thoja se gjatë gjithë javës e kishim deklaruar se në Tiranë do të vijmë vetëm për të respektuar kampionatin, në kuptimin që të gjitha “bateritë” do t’i ruajmë për ndeshjen e Kupës. E patë dhe vetë që 7-8 lojtarë nuk u aktivizuan, pra objektivi ynë është madhor në Kupë. Në përgjithësi nga lojtarët që u aktivizuan jam i kënaqur, por këtu bëj disa përjashtime.


Të veçanta

- Në tribunë VIP ishin të pranishëm presidenti Besnik Sulaj dhe “krahu i tij i djathtë” Avni Braçe. Donatori dhe deputeti Dashnor Sula përfaqësonte stafin peqinas.
- Në momentin e marrjes të kartonit të dytë të verdhë të mesfushorit Bizhyti, deputeti Sula është shfaqur tepër i irrituar ndaj vendimit të gjyqtarit Pashaj.
- Gjyqtari anësor Avdo në një moment gjatë pjesës së dytë ka thirrur pranë arbitrin e katërt, Janku, duke i rekomanduar për veshjen e një fanelle me ngjyrë tjetër nga bluja, të një prej djemve të vegjël që kapin topat jashtë fushe, pasi pozicioni i tij ishte paralel me anësorin e krahut tjetër Agaraj.

Shkumbini, “jo” gjyqtarit të huaj në Kupë

Pas ndeshjes së djeshme, trajneri Magani ka shprehur hapur qëndrimin e klubit të tij, i cili nuk do të pranojë gjyqtar të huaj në Kupën e Shqipërisë, pas kërkesës së klubit “Flamurtari”. “Çuditemi nga kërkesa e Flamurtarit për gjyqtarë të huaj në Peqin. Në ndeshjen e parë ne jemi arbitruar nga Jareci në Vlorë dhe kemi humbur. S’ka arsye pse të jetë një gjyqtar i huaj në ndeshjen tonë dhe ne si klub jemi kundër kësaj kërkesë. Në këtë mes edhe FSHF duhet të vendosë drejtësi, duke mos lejuar kërkesa të tilla pa lidhje.”