Bariç: Nëse Cana merr edhe një karton nuk do vijë më

Bariç: Nëse Cana merr edhe një karton nuk do vijë më

Kohët e fundit kombëtarja austriake, Salcburgu dhe Dinamo e Zagrebit është interesuar për t’ju patur në drejtim. Cila ka qenë përgjigja juaj dhe çfarë po kalon në mendjen e Bariç?

Në radhë të parë dua të sqaroj këtë interesim. Për kombëtaren austriake: Më ka marrë në telefon një gazetar i gazetës, “Oesterreich” të Vienës dhe tekstualisht më ka pyetur. “Ne mendojmë se ju, si një ish trajner që e keni çuar aq lart Austrinë, mund të shërbeni ende për të ngritur imazhin e këtij kombi në Euro 2008. A keni në mendje të ktheheni? Përgjigja ime ka qenë e thjeshtë. Unë kam një kontratë me Shqipërinë që më skadon në dhjetor. Megjithatë, kombëtarja austriake është një ide shumë e bukur, sidomos për faktin që futet direkt në fazën e grupeve, si vend organizator. Pas kësaj, në Austri, po gazetzarët kanë nisur një anketë. Kjo është e vërteta. Asnjë drejtues i Federatës Austriake nuk ka kontaktuar me mua. Për Salcburgun, nuk dua të flas fare.

Po Dinamo e Zagrebit?

Po, këtu kam patur një ofertë nga drejtuesit e klubit. Ata duan që unë të shkoj atje dhe të jem një supervizor, ose më mirë një zbulues talentesh. Më qartë. Të shikoj skuadrat e ekipeve zinxhirë dhe të zgjedh lojtarët që në të ardhmen do të kalojnë në ekipin e parë të Dinamos. Por, edhe atyre u thashë se jam nën kontratë me Shqipërinë. Megjithatë, fakti që këto klube më kërkojnë, do të thotë se unë kam bërë diçka, që i ka tërhequr vëmendjen dhe jam i përgjegjshëm se me të vërtetë kam bërë diçka për Shqipërinë.

A keni folur me presidentin Duka për kontratën. Përse po dhe përse jo Shqipërinë?

Nuk dua ta vendos në këtë plan. Përse po dhe përse jo. Nuk kam folur ende me presidentin Duka, por dua që të flas. Ndoshta kjo do të ndodhë në Slloveni, ndoshta në ndeshjen me Bullgarinë, sepse sigurisht që edhe presidenti do të shikojë se si do të shkojnë këto ndeshje, apo jo? Por, e vërteta është se akoma nuk kam folur. Unë pres që të flasim, me të vërtetë.

Ju shqetëson fakti që ai nuk ka folur ende me ju për kontratën, edhe pas interesimit të këtyre klubeve?

Jo. Presidenti ka punën e tij dhe unë nuk dua t’i futem atje. Unë dua vetëm të bisedoj dhe të flasim për kontratën. Dua të vazhdoj sërish punën e nisur me Shqipërinë, të cilën mendoj dhe gjykoj se deri tani e kam bërë shumë mire.

Do të vazhdoni të qëndroni me të njëjtaj kushte fianciare të kontratës aktuale?

(qesh) Kur do e kuptoni ju, që gjendja financiare nuk përbën asnjë problem për mua? Po e them edhe njëherë. Nuk kam ardhur në Shqipëri për para dhe në asnjë vend, në këtë moshë dhe me këtë emër, nuk do të shkoja për para, por për të bërë diçka të mirë. Unë po e përsëris se dua të qëndroj dhe të bëj diçka të mirë, ashtu siç kam bërë për Shqipërinë. Pra, dua të marr rezultate, të bëj kombëtaren kuqezi të ngjisë sërish vendet në renditjen e FIFA-s, sepse e di që ka humbur disa vende, pas humbjes me Holandën. Dhe të vazhdoj të gjej lojtarë të rinj dhe me zemër, si Vangjeli, Curri, Dallku, Kapllani, etj.

Nëse gjithçka do të ishte në dorën e Bariçit dhe presidenti Duka do pranonte çdo kërkesë tuajën, kë do të zgjidhnit, ndërmjet Shqipërisë, Austrisë, apo Dinamos së Zagrebit?

Sigurisht që Shqipërinë. Unë e thashë që dua të qëndroj këtu, sepse e shikoj se mund të bëj shumë. Mund të ndërtoj një brez lojtarësh që në eleminatoret e ardhshme për Botërorin e Afrikës 2010, skuadra juaj kombëtare të shkojë në fazën finale të grupeve.

Duke folur për lojtarë të rinj, a keni kontaktuar me trajnerin Lienen të Panionios, për Albi Kondin?

Është e çuditshme, sepse sa po më morët ju (në telefon) unë sapo i lashë një mesazh në sekretari Lienenit. Nuk e kishte telefonin të hapur, ndoshta ishte në stërvitje. i thashë që të më marrë, madje unë do tëntoj sërish ta marr. Ai është një mik, ose më saktë një i njohuri im dhe unë dua tya pyes për gjithçka që ka të bëjë me Kondin. Megjithatë, si Kondi kam edhe thuajse pesë lojtarë të tjerë që dua t’i çoj në kombëtare, por edhe në përfaqësuesen U-21, sepse në fund të fundit, edhe ajo një “çerdhe” e kombëtares është.

Si përshembull?

Hykën, Bakajn, Kondin, apo edhe shumë të tjerë. Këta mund të kalojnë në kombëtaren e madhe dhe disa të tjerë, më të vegjël do të shkojnë në U-21. Flitet pas dy vitesh.

Cili është mendimi juaj për Canën?

Dëgjoni. Po iau them me seriozitetin më të madh. Lorik Cana nuk është gabimi i parë që bën. Ai ka marrë dhe po vazhdon të marrë shumë kartona. Nuk shkon kështu. Unë do të flas me lojtarin, edhe në prezencë të presidentit Duka. Unë do t’i kërkoj atij që të marrë masë dhe do t’i kërkoj futbollistit që të mbledhë mendjen. Ai merr edhe shumë kartona në Francë dhe mungoi në ndeshjen ndaj Tuluzës. Një gjë e tillë e dënon skuadrën. Pra, nëse Cana do të marrë qoftë edhe një karton të verdhë, në rikthimin e tij, atëherë unë do vendos mos ta thërras më në kombëtare. Është një lojtar shumë i mirë dhe këtë e pranoj. Por, nuk kam se çfarë të bëj. Nuk mund të kondicionoj skuadrën vetëm nga një lojtar, sado yll qoftë ai. Do të mësohemi që ta mbulojmë këtë pozicion me Bulkun.

Të kthehemi tek Grupi G. Edhe katër ndeshje deri në fund. Ku mund të arrijë kjo Shqipëri?

Unë e kam thënë se objektivi ynë është vendi i katërt dhe do të jenë pikërisht Sllovenia dhe Bjellorusia kundërshtarët direktë për t’u mundur. Sigurisht, një gjë pozitive mund ta bëjmë edhe me Bullgarinë.

Nëse ndalni Bullgarinë, a mendoni se Rumania mund të na bënte ndonjë “dhuratë”?

Unë nuk marr dhurata në fushën profesionale. Unë jam munduar gjithmonë që me forcat e mia të arrij atë që dua. Më vjen keq, por edhe pa “dhuratë” unë do të tentoj t’ia rrëmbej pikën Rumanisë.