Grami: Lushnja, ajo që na mohoi 5 pikë

Mbrojtësi i Shkumbinit, Elton Grami, shprehet se ekipi mund të ishte më lart

Ekipi i Shkumbinit dje pasdite ka nisur fazën përgatitore të dimrit nën drejtimin e Maganit e Branicës. Nuk mungoi atmosfera e ngrohtë dhe urimet e rastit për festën e Vitit të Ri, për t’iu drejtuar më pas stërvitjes në kompleksin e klubit, e cila ka nisur me vrapime të lehta rreth fushës.

Si dita e parë pas një pushimi njëjavor, trajneri Magani ka qenë pak i kursyer në dhënien e ngarkesës në stërvitje. Pas gjysmës së parë të kampionatit, Shkumbini renditet në vendin e pestë, krah Teutës, duke u konsideruar i përshtatshëm, kur ka lënë pas Flamurtarin, Elbasanin apo Partizanin, por jo vendi që realisht meritonte Shkumbini.

Për mbrojtësin Grami, janë shumë pikë të lëna rrugës në mënyrë të pajustifikueshme nga ana e ekipit. Si shembull më konkret ai merr të dy takimet me ekipin e Lushnjës, ku sipas tij, Shkumbini ka humbur pikë me këtë kundërshtar, kur Lushnja fiton në Peqin 1 - 2 në fazën e parë (e vetmja humbje e Shkumbinit në fushën e vet) dhe barazon 1 1 në Shijak në ndeshjen e fundit të vitit që lamë pas.

Duke mos përmendur disa takime të tjera, për mbrojtësin energjik të Shkumbinit, janë 5 pikë të humbura që kanë ndikuar në renditje, por edhe në anën morale e financiare. “Realisht duhet të ishim më lart. Janë disa pikë të lëna rrugës, më shumë për dobësi tonat sesa për meritë të kundërshtarit, që na kanë kushtuar jo pak.

Mjafton të kujtojmë dy ndeshjet me Lushnjën, sepse është i vetmi ekip që ka fituar në Peqin në fazën e parë, pa harruar që na hoqi edhe dy pikë në javën e fundit në Shijak me barazimin 1 1, pra 5 pikë të humbura me Lushnjën,” - thotë mbrojtësi i Shkumbinit, Elton Grami. Eshtë sezoni i parë që tiranasi Grami aktivizohet me Shkumbinin pas një sezoni të mirë me Kastriotin vitin e kaluar.

Në rolin e mbrojtësit të krahut, Grami përpiqet në çdo ndeshje të japë më të mirën e vet në këtë repart, pa harruar që të marrë edhe krahun në aksione vetjake në ndihmë të sulmit, duke u dalluar për shpirtin e garës në fushë e shembull për të tjerët. Tiranasi 24 vjeçar është i bindur se ekipi i Shkumbinit i ka mundësitë të ngjitet edhe më lart në renditje.

Ai i qëndron mendimit që periudha përgatitore e dimrit duhet të shfrytëzohet në mënyrën më të mirë nga futbollistët e drejtuesit për të marrë ngarkesën e duhur, për të qenë më të përgatitur e më të saktë në pjesën e mbetur të kampionatit.

Për Gramin, Shkumbini e ka grupin e duhur të futbollistëve dhe me përforcimet që priten të bëhen gjatë kësaj periudhe, do të jetë më e lehtë të arrihet objektivi i vënë. “Me gjithë hapat falsë që kemi bërë në 17 javët e para, mund ta quaj pozitiv konkurrimin e ekipit.

Janë të gjitha mundësitë që ta shfrytëzojmë si duhet këtë periudhë përgatitore, sepse e kemi grupin e futbollistëve. Me përforcimet që presim, Shkumbini të ngjitet më lart për të arritur objektivin që kemi vënë që në fillim,” - përfundon mbrojtësi i krahut të majtë të Shkumbinit, Elton Grami.

———————————————–

Peqinasit, dje vetëm dy mungesa

Sulmuesit Rizvanolli dhe Mustafaj ishin mungesat e vetme dje në ditën e parë të stërvitjes së Shkumbinit, pasi të gjithë të tjerët ishin në dispozicion të trajnerit Magani, përfshi edhe maqedonasin Delioski.

Mungesa e tiranasit Rizvanolli, golashënuesi më i mirë i Shkumbinit, ishte e justifikueshme, pasi ai kishte lajmëruar që ishte i sëmurë dhe nuk mund të ishte në stërvitje me të tjerët në ditën e parë. Ndërkohë, nuk dihet shkaku i mungesës së sulmuesit tjetër, të riut Mustafaj, i cili nuk ka njoftuar.
Ali Hallulli
6/1/2009
Sporti shqiptar