Në Vlorë nisin ethet, vjen Shkumbini

Peqinasit duan të sigurojmë
kualifikimin që në Vlorë
Skuadra e Shkumbinit e drejtuar
nga tekniku Magani u ka dhënë
dje dorën e fundit përgatitjeve në
kuadër të takimit gjysmëfinal që
do ta zhvillojnë përballë Flamurtarit
në shtëpinë e këtyre të fundit.
Për peqinasit mund të thuhet
se do të zhvillojnë takimet më të
rëndësishme të këtij sezoni futbollistik,
pasi prej tyre do të përcaktohet
edhe arritja, ose jo e objektivave
që i kanë vënë vetes.
Në rast të një kalimi të mundshëm
për në finalen e kompeticionit,
peqinasit do ta kishin më të lehtë
sigurimin e “biletës” për në Kupat
e Evropës, pavarësisht se do
ta fitojnë apo jo trofeun. Ky konkluzion
vjen logjikshëm prej faktit
se në finale, përballë peqinasve
do të vihej një nga skuadrat e
kreut midis Tiranës e Vllaznisë,
të cilat e kanë siguruar një pjesëmarrje
në Evropë dhe bardhekaltrit
do të bëheshin pjesëmarrës
direkt. Mirëpo mesfushori lushnjar
në radhët e Shkumbinit, Alban
Bizhyti, mendon se skuadra
duhet të luftojë të shkojë sa më
larg, duke përfshirë edhe opsionin
e fitimit të trofeut, i cili do të
ishte i pari në historinë e klubit
peqinas. “Jemi përballë një situate,
ku varet fati i të gjithë sezonit
për ne, pasi nëse deri tani
kemi bërë një punë të admirueshme,
të cilën nuk do ta
çonim deri në fund, do të ishte si
një lloj ‘vetëvrasjeje’ për
skuadrën tonë. Kemi arritur me
meritë të jemi gjysmëfinalistë të
Kupës, gjithashtu ndodhemi në
vendin e katërt në kampionat. Me
një fjalë, na duhet të japim maksimumin
në këto takimet e fundit për
të parë një dritë jeshile në fund
të sezonit”, shprehet mesfushori
lushnjar, Bizhyti. Në lidhje me
takimin e sotëm përballë Flamurtarit
vendës, lojtari i Shkumbinit
thotë se skuadra është mjaft e
motivuar dhe me moral të lartë
pas fitores në kampionat. “Fitorja
ndaj Besës ditën e shtunë,
padyshim që na ka rritur besimin
dhe na ka bërë që të jemi më të
çliruar nga ana psikologjike, lidhur
me periudhën që po kalonim në
javët e fundit. Të gjithë jemi në
formë të mirë dhe shpresojmë që
kësaj here t’ia dalim që të arrijmë
në finale, pasi do të ishte arritja
më e madhe e klubit peqinas, ku
unë dëshiroj të bëhem pjesë e
historisë së tij. Nëse luajmë ashtu
siç dimë, mendoj se edhe në
sfidën e sotme nuk do të dalim
duarbosh, pra synimi ynë është
që të sigurojmë kualifikimin që në
sfidën e sotme, mirëpo mendoj se
edhe me një barazim do të ishim
të kënaqur, duke ditur që takimin
e kthimit do ta zhvillojmë në shtëpi”,
shprehet Bizhyti.
Fatmir Ahmeti

Akomodimi
Ekipi i Shkumbinit ka udhëtuar
që dje në drejtim të qytetit
bregdetar të Vlorës për të
qenë sa më pranë vendit ku
do të zhvillojnë sfidën e parë
gjysmëfinale. Pas stërvitjes
së djeshme bardhekaltrit janë
nisur për t’u akomoduar në
një nga hotelet në Vlorë, ku
shpresojnë që të gjejnë pak
kohë për relaks dhe mundësi
për të konsoliduar marrëdhëniet
brenda grupit.

Mungesat
Skuadrës peqinase do t’i
duhet të luajë sot pa dy futbollistët
tiranas, konkretisht
mbrojtësin Elton Grami, i cili
u dëmtua gjatë takimit kundër
Besës në kampionat dhe sulmuesin
Erion Rizvanolli, edhe
ky për probleme shëndetësore.
Të dy këta futbollistë
kanë qenë pjesë e formacionit
bazë të trajnerit Magani,
i cili sot do të privohet
nga shërbimet e tyre.

FORMACIONI
I MUNDSHËM
Në portë: Llani
Në mbrojtje:
Mujdragiç, Shameti,
Pashja, Xhyra.
Në mesfushë: Turdiu,
Shenaj, Bizhyti, Nora.
Në sulm: Mustafaj, Dervishi
Trajner: Gugash Magani
Skema: 4-4-2