Ja sa para japin bashkitë për ekipet e superligës.

Shuma në total, 220 mln lekë
Nëse sot klubet e futbollit do të ishin të privatizuar, shteti shqiptar do të kursente plot 220 milionë lekë për çdo sezon futbollistik. Kjo është shuma që del nga buxheti i qeverisë, akorduar bashkive të 12 klubeve të Superligës. Në kundërshti me me botën e zhvilluar klubet e futbollit në Shqipëri funksionojnë ende pak a shumë si para viteve ’90, ku shteti ishte ai që të nxirrte nga balta dhe po ai që të fuste shtatë pashë nën të. Iniciativave të shumta të disa biznesmenëve për të privatizuar klubet për të cilat ata kanë investuar gjatë gjithë këtyre viteve nuk kanë përkuar edhe me “vullnetin” e shtetit shqiptar për të vënë në linjën e klubeve më të famshme evropiane dhe futbollin shqiptar.
Aktualisht në Superligën shqiptare si shoqëri aksionere (klub i privatizuar) mund të quhet vetëm KF Partizani, por edhe ky në konflikt total me pronarët e tokës ku ndodhen ndërtesat dhe fusha e klubit. Ndërsa KS Besa dhe KF Elbasani funksionojnë si shoqëri aksionere, por ku bashkia e qyteteve Kavajë dhe Elbasan kanë 33 për qind të aksioneve. Ndërsa për nëntë klubet e tjera kemi nga njëra anë një bashki si pronare, por me një kapital të investuar në disa raste mjaft simbolik dhe nga ana tjetër disa donatorë, të vetëquajtur presidentë që investojnë, por pa pasur asnjë lloj pronësie mbi gjithçka të prekshme të klubeve të tyre.
Kryeqytetaset
Tirana, klubi më elitar në Shqipëri, është nën pronësi të bashkisë së Tiranës, e cila asesi nuk mund të krahasohet me paratë që derdhin katërshja e donatorëve në një sezon. Sipas informacioneve, bashkia e Tiranës jep 90 mijë lekë (të reja) për të gjithë transfertat e skuadrës gjatë sezonit futbollistik, plus 200 mijë lekë (të reja) në muaj për disa nëpunës të klubit që merren kryesisht me mirëmbajtjen e ambienteve. Në pak fjalë, nga qendra e Tiranës në arkën e klubit bardheblu nuk shkojnë më shumë se 4 milionë lekë (të reja) në sezon, ndërkohë që katërshja e donatorëve paguajnë prej 2003-2004-ës një shumë prej 1 milion dollarësh për çdo sezon për këtë klub. Nëse KF Tirana do të funksiononte si një klub i privatizuar veç faktit se bashkia do të kursente këto para, “katriada” do të investonte edhe më shumë duke e ngritur këtë klub në standardet evropiane. Ndërsa për KF Dinamo, nën varësi të Ministrisë së Brendshme, jepet një shumë prej 300 mijë eurosh në sezon. Në këtë shifër janë përfshirë gjitha shërbimet që bëhen në kompleksin sportiv “Dinamo” pranë Liqenit Artificial.
Shoqëritë aksionere
Besa e Kavajës është ndër të parët klube në Shqipëri që ka optuar drejt privatizimin, e cila në fakt nuk është konkretizuar ende 100 %. Aktualisht ky klub funksionon si shoqëri aksionere ku bashkia e Kavajës ka 33% të aksioneve duke derdhur edhe pak a shumë 8 milionë lekë të reja në sezon në arkën e këtij klubi. Në të njëjtën linjë është edhe KF Elbasani, i cili funksionon si shoqëri aksionere që prej fillim-sezonit 2008-2009. Bashkia e këtij qyteti jep 24 milionë lekë (të reja) në sezon.
Flamurtari & Vllaznia
KF Flamurtari rezulton të jetë klubi që merr më shumë nga bashkia e qytetit se cilado skuadër tjetër në Superligë. Kryebashkiaku i Vlorës, Shpëtim Gjika, njëkohësisht president i klubit ka miratuar një buxhet prej 500 mijë eurosh për KF Flamurtarin. Ndërsa bashkia e Shkodrës, pronare fiktive e KF Vllaznisë jep rreth 26 milionë lekë (të reja) në sezon. Madje i kontaktuar nga “Tirana Observer” kryebashkiaku Lorenc Luka pohon se bashkia i ka lënë në dispozicion që drejtuesit e klubit të mbledhin edhe të gjitha të ardhurat që mund të vijnë nga reklamat.
Klubet e tjera
E njëjta situatë pak a shumë edhe në klubet e tjera të Superligës, ku kemi një bashki pronare dhe disa donatorë që investojnë pa pasur asnjë në pronësi. Bashkia e Durrësit jep 25 milionë lekë (të reja) në sezon për KF Teutën ndërsa ajo e Peqinit vetëm 5 milionë lekë (të reja) në vit, para të cilat sipas presidentit-donator të Shkumbinit, Xhavit Ismaili shkojnë për pagesat e punëtorëve të stadiumit dhe zëvendës/trajnerit të skuadrës. Ndërsa bashkia e Lushnjës, Fierit dhe Ballshit japin respektivisht nga 20, 10 dhe 6 milionë lekë (të reja) në sezon për klubet e Lushnjës, Apolonisë dhe Bylisit. Pjesa tjetër e shpenzimeve mbulohet nga investitorët respektivë, të ashtuquajtur presidentë të këtyre klubeve.

12 klubet e Superligës

Flamurtari
Pronare: Bashkia e Vlorës
Të ardhura nga bashkia: 500 mijë euro në sezon
KS Dinamo
Pronare: Nën varësi të Ministrisë së Brendshme
Të ardhura nga ministria: 300 mijë euro në sezon
Vllaznia
Pronare: Bashkia e Shkodrës
Të ardhura nga bashkia: 25.8 milionë lekë (të reja) në sezon
KS Teuta
Pronare: Bashkia e Durrësit
Të ardhura nga bashkia: 25 milionë lekë (të reja) në sezon
Elbasani
Shoqëri aksionere: Bashkia zotëron 33&
Të ardhura nga bashkia: 24 milionë lekë (të reja) në sezon
KS Lushnja
Pronare: Bashkia e Lushnjës
Të ardhura nga bashkia: 20 milionë lekë (të reja) në sezon
Apolonia
Pronare: Bashkia e Fierit
Të ardhura nga bashkia: 10 milionë lekë (të reja) në sezon
KS Besa
Shoqëri aksionere: Bashkia zotëron 33&
Të ardhura nga bashkia: 8 milionë lekë (të reja) në sezon
KS Bylis
Pronare: Bashkia e Ballshit
Të ardhurat nga Bashkia: 6 milionë lekë (të reja) në sezon
Shkumbini
Pronare: Bashkia e Peqinit
Të ardhura nga bashkia: 5 milionë lekë (të reja) në sezon
SK Tirana
Pronare: Bashkia e Tiranës
Të ardhura nga bashkia: 4 milionë lekë (të reja) në sezon
FK Partizani
Shoqëria aksionere me pronar të vetëm Albert Xhanin
Shkruar nga Leonard Karaj
e premte , 07 nëntor 2008
Tiranaobserver