Serbi Ahmed Mojdrigiç firmos për peqinasit

Ekipi i Shkumbinit po i vijon përgatitjet me ngarkesë të lartë,
duke zhvilluar nga dy seanca stërvitore në ditë. Drejtuesit e
klubit i gëzohen faktit se nga kjo fazë, lojtarët përveçse kanë
marrë formën e duhur sportive, në dy takimet miqësore të
zhvilluara në Ulqin përballë Lushnjes dhe Bylisit, nuk ka pasur
asnjë të dëmtuar. Madje, nga dita në ditë grupi po konsolidohet
dhe futbollistët kanë rifituar formën e tyre më të mirë. Ata që
në për pjesën e mbetur të sezonit pretendojnë vendin e titullarit
janë shtuar. Këtu përfshihen edhe të rikuperuarit nga
dëmtimet si Rizvanolli dhe maqedonasi Deliovski, gjithashtu
Roland Dervishi dhe Erion Mustafaraj. Që të dy këta lojtarë
kanë bërë paraqitje të mira në dy sfidat miqësore. Nëse në
portë pozicioni i Ervin Llanit nuk diskutohet, reparti më i mbipopulluar
është mesfusha ku trajneri Magani duket se ka mjaft
alternativa si Shenaj, Turdiu, Bizhyti, Deliovski, Gjata, Salliu
dhe mesfushori serb Jaksimovic,
i afruar gjatë
kësaj merkatoje dimërore.
Përsa i përket repartit të
mbrojtjes, është arritur
akordi me mbrojtësin serb,
i cili kishte ardhur për
provë te shkumbinasit.
Teknikët peqinas Magani
dhe Branica kanë dhënë
viston e tyre për ta pasur
pjesë të skuadrës këtë
lojtar deri në qershor. Ky
është futbollisti i dytë që
nënshkruan me peqinasit
së bashku me serbin tjetër
Jaksimoviç. Në prag të
sfidës me Vllazninë, e cila
do të startojë më 31 janar
duket se teknikut Magani i
rikthehet buzëqeshja, pasi do të ketë në dispozicionin të gjithë
formacionin. Përballja do të jetë mjaft e rëndësishme për ecurinë
e skuadrës në kampionat, pasi peqinasit dëshirojnë të rikthehen
në vendet e para të klasifikimit, ku qëndruan për shumë
javë. Sfida me kuqeblutë po pritet me mjaft interes edhe nga
tifozeria peqinase, e cila do ta mbështesë fuqishëm skuadrën.
Afrimi
Nga burime pranë klubit mësojmë se drejtuesit peqinas i kanë
dhënë “OK”-in mbrojtësit serb, Ahmed Mojdrigiç. Ky i fundit,
mesa duket i ka bindur drejtuesit për të qenë pjesë e shkumbinasve
në këtë gjysmësezon të mbetur. Mbrojtësi pritet të rikthehet
së bashku me pjesën tjetër të grupit që të firmosë kontratën
e tij me klubin peqinas. Kështu, numri i futbollistëve të
huaj të cilët do të luajnë në këtë gjysmësezon të mbetur me
Shkumbinin shkon në tre.
Panorama Sport
Fatmir Ahmeti