Peqinasit, mobilizim total perpara partizanit

Në Peqin vazhdon të mbizotërojë një atmosferë mjaft
e pozitive brenda ekipit. Kjo për faktin se drejtuesit e
klubit të futbollit kanë mbetur të kënaqur nga ecuria e
skuadrës gjatë këtyre javëve. Lojtarët e Shkumbinit kanë
bërë detyrën edhe në ndeshjen për Kupë në transfertën
e Gramozit, teksa kanë fituar me rezultatin e pastër 2-0
kundrejt ekipit vendës. Kjo tregon që peqinasit kanë
synime serioze edhe në kompeticionin e dytë kombëtar,
që siç dihet është një mundësi për pjesëmarrje në Kupat
e Evropës. Trajneri Magani udhëtoi drejt Ersekës
me formacion gati të rinjsh, të cilët duhet thënë që e
shpërblyen besimin e tranjerit të tyre. Vetë Magani ka
mbetur mjaft i kënaqur nga paraqitja e lojtarëve të rinj,
të cilët në këto ndeshje paraqitën vlerat e tyre. “Elita”,
apo lojtarët bazë të formacionit nuk janë lënë pushim,
por kanë vazhduar stërvitjen edhe dje nën urdhrat e
zv/trajnerit Branica. Vëmendja e drejtuesve të Shkumbinit
është fokusuar totalisht te sfida e fundjavës përballë
Partizanit, pa e humbur përqëndrimin përkundër
pozicionit që mban kundërshtari. Në rastet kur ekipet
ndërrojnë trajnerë, futbollistët janë të predispozuar të
luajnë fort për të treguar vlerat e tyre. Prandaj, drejtuesit
e Shkumbinit kanë marrë masat që futbollistët e tyre
ta vlerësojnë Partizanin nga emri dhe jo nga pozicioni,
që mban aktualisht. Ata shprehen se shkojnë me synimin
për të marrë një rezultat pozitiv, i cili duhet të vijë
nëpërmjet një loje kolektive dhe që mbi të gjitha të jetë
“fair play”. Fatmir Ahmeti
Panorama sport