SHKUMBINI 1-2 Lushnja

Shkumbini-Lushnja (Peqin)
JAVA 6 DATE 04.10.2008

Gjyqtari: B.Pashaj

Grami: Gabim po nënvlerësuam Lushnjën


Mbrojtësi i Shkumbinit, Elton Grami, thotë që duhet vijuar me fitoret në Peqin
Ekipi i Shkumbinit, me pikën e marrë në Elbasan, ka arritur të ruajë
vendin e dytë në renditje pas javës së 5 të të kampionatit. Ka qenë një
pikë me shumë vlera dhe e merituar e të besuarve të Maganit, që u arrit
në një ndeshje të quajtur derbi, si ajo me Elbasanin, që e ka rritur
besimin dhe entuziazmin në skuadër. Për 24-vjeçarin tiranas, Elton
Grami, ekipi i tij e meritoi plotësisht rezulatin e arritur, pasi ashtu
si edhe në Elbasan, forcën e ka treguar harmonia, loja kolektive e jo
cilësitë e futbollistëve të veçantë, duke treguar shpirt gare në çdo
ndeshje. “Pata besuar në arritjen e barazimit dhe kjo u arrit në fund.
Unë do ta quaja një rezultat pozitiv, duke gjetur rastin të falënderoj
të gjithë për shpirtin e garës që treguan,” - shprehet i kënaqur jo pak
mbrojtësi Grami në prononcimin e tij. Duke e ndier veten mjaft mirë te
Shkumbini, Grami vlerëson punën që është bërë që nga faza përgatitore e
ekipit nën drejtimin e trajnerit Magani. Duke folur për repartin e
mbrojtjes, ku ai bën pjesë, ai pranon se e ka për kënaqësi që luan krah
futbollistëve me përvojë, si Gallo apo Pashja, apo Shameti dhe Xhyra,
duke u përpjekur të përfitojë sa më shumë prej tyre dhe duke kërkuar të
japë më të mirën e vet për Shkumbinin. “Në sajë të punës që është bërë
që nga fillimi, e pranoj me kënaqësi të them se po kaloj një formë
mjaft të mirë për momentin. Ndoshta ka qenë më e lehtë për mua, pasi
kam luajtur krahas futbollistëve me përvojë. Për mua, këtu qëndron
sekreti i rezultateve të Shkumbinit. Eshtë ndërthurur elementi i ri me
atë me përvojë,” - argumenton mbrojtësi Elton Grami. Edhe pse tregohet
jo pak entuziast, është i bindur që do të ruhet vendi i dytë dhe në
javët e ardhshme. Grami kërkon që ekipi të përqendrohet dhe t’i ikë
euforisë. Ndeshja e radhës me Lushnjën në Peqin është një mundësi e
mirë për ekipin e tij, por kjo mund të bëhet realitet vetëm, kur
kundërshtari i radhës të vlerësohet si duhet e njëlloj si të tjerët.
“Vijmë në ndeshjen e radhës me Lushnjën në Peqin pas barazimit me
Elbasanin dhe do të kërkoja po të njëjtin vlerësim e mobilizim, sepse
Lushnja, për vetë pozitat ku ndodhet, do të kërkojë të bëjë gjithçka,
pasi nuk ka se ç’të humbë tjetër. Eshtë një mundësi e mirë për ta
mbajtur vendin e dytë në renditje. Çdo ndjenjë nënvlerësimi apo shenjë
vetëkënaqësie është e dëmshme,” - përfundon mbrojtësi Elton Grami, duke
kërkuar vlerësimin e duhur për kundërshtarin e radhës.