SHKUMBINI 1-0 Besa

Shkumbini doli i pathyer në shtëpi, duke fituar edhe përballjet e tretë sezonale në Peqin, por heroi i takimit ishte sërish Erion Rizvanolli, i cili me dy shtylla të goditura e një gol të thjeshtë në realizim i dhuroi tri pikë të tjera të arta skuadrës së tij, që me nëntë pikë renditet përkohësisht e dyta pas Tiranës në kuotën e 10 pikëve.

Fitorja 1-0 ndaj Besës ishte e treta rresht e skuadrës së Gugash Maganit pas atyre 4-1 me Bylisin e 1-0 me Teutën. Për ish-trajnerin e Dinamos, Ilir Dajën, nuk mund të kishte nisje më të hidhur në stolin e Besës.

Erion Rizvanolli goditi shtyllën, ndërsa talenti Mustafaj goditi rrezikshëm.

Ish-sulmuesi i Partizanit, Arbër Abilaliaj në minutën e 40-të ishte pranë golit, por Ervin Llani me një pritje spektakolare ia mohoi rrjetën vlonjatit të Besës. Në të 43’, Mustafaj shpërtheu, duke dhënë një asist për Rizvanollin, i cili gjuajti dobët, teksa Zendeli e devijoi në goditje këndi.

Ish-sulmuesi i Dinamos, Sokol Ishka i pati të gjitha mundësitë për të realizuar për skuadrën e tij, por ishte sërish portieri Ervin Llani, që i tha “Jo” sërish ekipit të Ilir Dajës.

Rizvanolli ishte në ditën e shtyllave, pasi sulmuesi tiranasa e “njollosi” sërish një të dytë në dhjetë minutat e parë të fraksionit të dytë. Erion Rizvanolli mori një asist nga Mustafaj, duke shënuar me lehtësi golin e vetëm të Shkumbinit në minutën e 66-të. Goli i tij i dytë rresht për ish-sulmuesin e Kastriotit, pas atij kundër Teutës.

Shkumbini pati rastin të shënonte edhe një gol të dytë, por edhe një i vetëm i realizuar nga “gjahtari i golave”, Rizvanolli, mjaftoi për t’i dhënë fitore e 11-të historike Shkumbinit në 28 ndeshje kundër Besës e për të çuar në delir stafin dhe tifozerinë peqinase.

SHKUMBINI-BESA 1-0

Shënues: Rizvanolli 66’

Fusha sportive e Peqinit

20.09.2008, Ora 16:00

Gjyqtar: Erjon Dobi (Durrës)

Bilanci: 28 ndeshje; 11 fitore Shkumbini, 4 barazime, 13 fitore Besa. Golat: 278-25

Fitorja e fundit e Shkumbinit: 1-0, 20.09.2007

Barazimi i fundit: 1-1, 06.03.2004

Fitorja e fundit e Besës: 3-0, 29.03.2008





E Shtune, 20 Shtator 2008

nga albania-sport.com