Xhavit Ismaili premton besnikëri e mbështetje

Presidenti e kryebashkiaku mohojnë përçarjen
Xhavit Ismaili premton
besnikëri e mbështetje
“Kërkoj fitoren ndaj Tiranës për të kthyer buzëqeshjen”

Në kampin peqinas, java që po lihet paska qenë nga më të nxehtat e këtij sezoni. Kësaj here në epiqendër të kësaj “krize” nuk kanë qenë më vetëm futbollistët e Shkumbinit, por mbi të gjitha drejtuesit bardhekaltër. Fillimisht me gishtin e drejtuar nga deputeti i Peqinit, Dashnor Sula, i konsideruar në media si një person me pozitë që në disa situata kritike nxit akoma më tepër atmosferën. Për të vijuar më pas me presidentin e klubit peqinas, Xhavit Ismaili, për tëcilin është folur jo pak në media e ambientet sportive, se mund të ndërpresë financimet e ekipit, për t’u transferuar te Kastrioti. Një alternativë kjo që u konsiderua edhe më e mundshme, pasi vetë presidenti Ismaili, në lidhje telefonike për televizionin “Ora Neës” nuk e mohoi këtë mundësi. Ajo që e bënte akoma edhe më të besueshme mundësinë e këtij transferimi ishte fakti se, gjithçka u ndërtua mbi aludimin se marrëdhëniet mes drejtuesve më të lartë të skuadrës së Shkumbinit kishin filluar të “kriseshin”. Një atmosferë kaotike kjo që nga vetë kryetari i Bashkisë së Peqinit, Ilir Rrusha, është mohuar kategorikisht. Akoma më shumë, sipas Rushës, gjithçka duket qëllimisht e trilluar për të dëmtuar skuadrën. “Gjithçka e lakuar në media mbi situatën te skuadra e Shkumbinit është thjesht thashethem për të destabilizuar situaten tonë. Dua të garantoj se marrëdhëniet tona si donatorë janë normale dhe tepër korrekte. Presidenti Ismaili gëzon respektin dhe mbështetjen tonë për drejtimin e skuadrës. Ai është treguar gjithmonë korrekt, duke e mbështetur atë financiarisht. Madje gjej rastin ta falënderoj për punën e madhe që ka bërë gjatë kësaj periudhe. Shkumbini ka qenë dhe vazhdon të jetë zgjedhja e bërë nga vetë presidenti Ismaili”, - deklaroi kryetari i Bashkisë së Peqinit, Ilir Rrusha. Për të përmirësuar situatën në kampin peqinas e për të bërë gjithçka edhe më të besueshme ka menduar vetë presidenti i klubit peqinas, Xhavit Ismaili.
“Nuk më ka shkuar kurrë në mendje që të largohem nga drejtimi i Shkumbinit, pavarësisht situatave që kemi kaluar këtë sezon. Që kur kam ardhur në Peqin, kam pasur objektiv kryesor të qëndroj sa më të gjatë dhe të bëj maksimumin tim për ta ngjitur sa më lart skuadrën. Prandaj, unë do të vazhdoj ta mbështes Shkumbinin. Kam qenë pranë lojtarëve dhe u kam kërkuar që në ndeshjen me Tiranën të japin maksimumin për të marrë fitoren,rezultatin e vetëm që do të na kthente buzëqeshjen të gjithëve në Peqin”, - deklaroi kreu i klubit të Shkumbinit, Ismaili.

Magani, me mendjen te Tirana.
Në prag të ndeshjes me Tiranën, trajneri i bardhekaltërve, Gugash Magani, deklaron se Shkumbini do të luajë me mentalitet fituesi. “Mendoj se jemi përpjekur ta përgatisim më së miri këtë takim. Ajo tek e cila jemi përqendruar është mënjanimi i çdo lloj provokimi mediatik që kanë buçitur ditët e fundit kundër nesh. Çdo gjë në skuadër është e qetë, kjo edhe falë punës sonë gjatë gjithë kësaj jave, por njëkohësisht edhe falë mbështetjes që ka treguar presidenti Ismaili, duke qenë pranë ekipit thuajse çdo ditë. Kam kërkuar që lojtarët të tregohen të kujdesshëm në fushën e lojës dhe të luajnë me mentalitet fitues. Shpresoj t’i kthehemi lojës së bukur dhe fitores në këtë takim”, - deklaroi kreu i pankinës, Magani.