Shorti për Botërorin 2010, Shqipëria në vazon e katërt

Shorti për Botërorin 2010, Shqipëria në vazon e katërt
Kuqezinjtë ngjiten me tetë vende në renditjen e FIFA-s
Shqipëria













konsolidon pozitat e saj drejt objektivit për t‘u ngjitur në vazon e
katërt për shortin e grupeve eliminatore në Botërorin 2010. Pas dy
rezultateve pozitive të arritura në kualifikueset e Kampionatit
Europian, skuadra e drejtuar nga Oto Bariç ka bërë tetë "hapa" përpara
dhe tashmë klasifikohet si forca e 70 në botë. Barazimi në fushën e
Sllovenisë, por mbi të gjitha rezultati 1-1 i arritur në "Qemal Stafa"
përballë Bullgarisë, rritën kuotat e kuqezinjve e tashmë ata kanë 35
pikë më shumë se në renditjen e FIFA-s në muajin shtator dhe shpresat
për të mbajtur këtë pozicion (ekzistojnë shanset që të ngjitemi edhe më
shumë) janë të mëdha. Kjo, për faktin se në 17 nëntor, në Tiranë do të
vijë Bjellorusia, të paktën në letër tri pikët janë të sigurta, ndërsa
katër ditë më pas luhet në fushën e Rumanisë, e rezultati pozitiv nuk
duket tabu. Skuadra, e udhëhequr nga Mutu, është kualifikuar e para në
Grupin G dhe ka "simpati" për skuadrën tonë, pasi rivali i tyre direkt,
Bullgaria, ka lënë pikë të rëndësishme pikërisht në dy përballjet me
Shqipërinë. Me këtë renditje, përfaqësuesja është vetëm katër pozicione
larg klasifikimit rekord në epokën "Bariç" (në gusht 2007 ishim të
66-ët) dhe tetë vende më poshtë rekordit absolut në renditjen mujore të
FIFA-s (kur skuadrën e drejtonte gjermani Brigel), vendi i 62-të në
gusht 2006.





Evropë



Paralelisht me ngritjen prej tetë vendesh në renditjen botërore,
skuadra jonë është ngritur edhe në renditjen e UEFA-s, për
përfaqësueset evropiane. Nga vendi i 36 në "kontinentin e vjetër",
tashmë Shqipëria renditet e 34-ta në kuotën e 455 pikëve. Me këtë
klasifikim, të paktën momentalisht mbajmë vendin në vazon 4, në të
cilën përfshihen skuadrat nga vendi 28 (Bosnjë- Hercegovina) deri në
vendin 36 (ku tashmë pozicionohet Maqedonia). Gjithsesi, asgjë nuk mund
të cilësohet si e përfunduar, pasi lëvizjet në zonën evropiane janë
shumë të mëdha. Mjafton të shohësh renditjen e këtij muaji për të parë
se vetëm në dy ndeshje Gjeorgjia, Moldavia, por edhe Qipro kanë bërë
hapa gjigant përpara, pas fitoreve në eliminatoret e Euro 2008.





Grupi G



Renditja e publikuar dje nga FIFA ka sjellë të tjera lajme pozitive për
kuqezinjtë. Të gjithë kundërshtarët tanë direkt në garën për vazon e
katërt kanë pësuar rënie të ndjeshme. Sllovenia tashmë renditet e 76-ta
në botë (duke zbritur një vend më poshtë), ndërkohë që në renditjen e
UEFA-s e sheh veten në vendin e 37-të: -2 pozicione. Nëse qëndron në
këtë vend deri në fund, skuadra e Matjazh Kek rrezikon që në shortin e
25 nëntorit në Afrikën e Jugut ta shohë veten në vazon e pestë. Po kaq
e keqe është edhe situata e Bjellorusisë: humbja 0-1 në shtëpi me
Luksemburgun ka qenë një goditje shumë e fortë. Nga vendi i 75-të në
botë ata kanë zbritur në të 94-in, ndërsa në Evropë ata kanë rënë nga
vendi i 34-t në të 43-in. Ulje ka pasur edhe Holanda, që tashmë e sheh
veten e shtata në botë, Rumania ka qëndruar konstante në vendin e 12,
ndërsa Bullgaria është ngritur me një pozicion dhe është e 34-a.





Kundërshtarët





Kuqezinjtë, të favorizuar edhe nga rivalët



Gara për një vend në vazon e katërt në shortin e eliminatoreve të
Botërorit 2010 është krejtësisht e hapur, pasi janë shumë ekipe që
pretendojnë për një vend. Pavarësisht rezultateve të Shqipërisë në dy
takimet e radhës ndaj Bjellorusisë dhe Rumanisë, shumë gjëra do të
përcaktohen edhe nga rezultatet e rivalëve të kuqezinjve. Në fakt,
ndeshjet e muajit nëntor favorizojnë kombëtaren e drejtuar nga Bariç,
pasi një pjesë e ekipeve të vazos së 5-të do të luajnë vetëm një takim,
ose do të ndeshen me skuadrat më të forta në grup. Islanda, një nga
rivalët më të afërt të kuqezinjve në renditjen e FIFA-s, do të luajë
vetëm një ndeshje ndaj Danimarkës, ku fqinjët e tyre nordikë kërkojnë
një fitore për të ëndërruar ende për një kualifikim në EURO 2008.
Maqedonia, skuadra që aktualisht mban vendin e fundit në vazon e
katërt, ka dy përballje mjaft të vështira me Anglinë dhe Izraelin dhe
në rast humbjesh, do të vazhdojë të qëndrojë pas përfaqësueses tonë.
Armenia do të luajë kundër Portugalisë dhe Kazakistanit, ku vetëm me
këtë të fundit ka shanse reale për të marrë fitore, ndonëse me një
koeficient të ulët. Ndërkohë, Letonia do të përballet me Lihtenshtejnin
dhe Suedinë, ku mjafton një humbje me skuadrën e Ibrahimoviç që ajo të
mbetet pas Shqipërisë, pasi diferenca me pikë në renditje është shumë e
madhe. Një situatë e njëjtë edhe për Lituaninë, e cila ka shumë
diferencë pikësh nga kombëtarja jonë dhe vetëm në rast fitoreje ndaj
Gjeorgjisë dhe Ukrainës mund të na arrijë apo kalojë në renditje. Por
lajme të mira vijnë edhe nga skuadrat që gjenden sipër kuqezinjve në
renditje. Moldavia luan vetëm një ndeshje kundër Hungarisë, ndërsa
Uellsi ka dy takime të vështira kundër Irlandës dhe Gjermanisë. Një
situatë po kaq të komplikuar ka edhe Qipro, që do të ndeshet me
Gjermaninë dhe Çekinë, dy skuadra që pavarësisht kualifikimit në EURO
2008, luftojnë për vendin e parë në grup. Nëse kuqezinjtë e drejtuar
nga Oto Bariç bëjnë detyrën ndaj Bjellorusisë me 17 nëntor, atëherë
vazoja e katërt duket thuajse e siguruar.







Renditja Evropiane



Skuadra P



29. Sllovaki 600



30. Belgjikë 577



31. Qipro 556



32. Uells 521



33. Moldavi 497



34. Shqipëri 455



35. Gjeorgji 447



36. Maqedoni 423



------



37. Slloveni 422



38. Islandë 410



39. Armeni 400



40. Letoni 386



41. Austri 382



42. Lituani 380



43. Bjellorusi 358