“Ky Shkumbin nuk dorëzohet kaq lehtë”

Mesfushori maqedonas, Cvete Deliovski,
i bindur se ekipi peqinas do të jetë në finalen e Kupës
Humbja minimale 1-0 që ka pësuar Shkumbini
në takimin e parë gjysmëfinal përballë
Flamurtarit, duket se ka lënë gjithçka të hapur
për ndeshjen e kthimit, që do të zhvillohet
në Peqin më 29 prill. Skuadra e drejtuar nga
Gugash Magani ka arritur t’i përgjigjet ritmit
të lojës së shpejtë të vlonjatëve, duke rrezikuar
në disa raste me anë të Norës dhe
Mustafajit, por pa gjetur dot rrugën e rrjetës.
Për “Panorama Sport” foli mesfushori
maqedonas i Shkumbinit, Cvete Deliovski, i
cili është i mendimit se ekipi peqinas duhej
të merrte të paktën një barazim në Vlorë.
“Kemi zhvilluar një ndeshje deri diku të
mirë, teksa skuadra u mundua t’i përgjigjej
kundërshtarit me të njëjtën monedhë,
duke luajtur shpejt dhe me kundërsulme
të vazhdueshme. U goditëm me gol në një
moment kur takimi kishte hyrë në faza interesante
dhe lojtari vlonjat me shumë fat
arriti të shënojë”, thotë mesfushori, që më
parë ka luajtur edhe për Apoloninë. Më tej,
maqedonasi pohon se kualifikimi mbetet i
hapur. “Një tur më parë ne barazuam në
shtëpi, por nuk u dekurajuam dhe besuam
te kualifikimi, që e arritëm në Kavajë - kujton
ai. - Me këtë dua të them se Shkumbini
është një skuadër, që nuk dorëzohet lehtë,
deri në minutën e fundit. Flamurtari
mund të duket si i favorizuar, por ne jemi
të bindur se do të arrijmë të kualifikohemi
për në finalen e kompeticionit”.
Lushnja – 28-vjeçari Cvete Deliovski në
fund shprehet edhe për ndeshjen e radhës
të Shkumbinit, që të shtunën pret Lushnjën.
“Tani duhet të rikthejmë vëmendjen në kampionatit,
duke vazhduar ecurinë pozitive.
Ndaj Lushnjës do të futemi në fushë vetëm
për tri pikë, pasi vetëm kështu do ta kemi më të
sigurt vendin e katërt”, pohoi Delivoski. Trajneri
Magani nuk do të ketë në dispozicion për
ndeshjen me Lushnjën vetëm mbrojtësin Klement
Xhyra, i cili ka plotësuar numrin e kartonëve
të verdhë. Fatmir Ahmeti
Panorama sport