Ismaili "Shkumbini im fitoi edhe në shkallët e stadiumit"

Presidenti Ismaili: Xhani e ka akuzuar shpesh Peqinin, por të dielën mungoi vetëm ai
Ekipi i Shkumbinit ka fituar sërisht të djelën ndaj ekipit të Partizanit duke i marrë gjashtë pikë të plota ekipit kryeqytetas në dy ndeshjet e para. Me të kuqtë u thye një tabu. Drejtuesit e Partizanit vazhdimisht janë shprehur ashpër ndaj ekipit të Shkumbinit dhe tifozëve peqinas duke ilustruar se në Peqin mbretëron dhuna dhe se tifozët imponojnë fitoren e ekipit vendas. Por ndonëse presidenti i të kuqve nuk ka qenë vetë të shohë ekipin në Peqin, një numër i madh tifozësh të kuq e kanë ndjekur ekipin e tyre kanë brohoritur dhe madje kanë vendosur pranë tribunës ku ishin vendosur një flamur të madh të "Demave të Kuq". Përpara tribunës kryesore një numër u madh makinash me stemën "I Love Partizani" janë akomoduar pa asnjë problem. Vetëm tre sezone më parë më 14 tetor 2007, peqinasit dënoheshin gjashtë ndeshje jashtë fushës së Shkumbinit për disa parregullsi dhe për sjellje të pahijshme të tifozëve peqinas, megjithatë dukej sikur në Peqin nuk ekzistonte aspak ndjenja e hakmarjes për dicka që ka ndodhur tre vite të shkuara.Të gjitha këto treguan se peqinasit e mirëpritën ekipin mik si dhe në fushën e lojës fitoi ekipi që dha më të mirën, pa patur asnjë lloj trysnie dhe influence nga jashtë. Presidenti Ismaili shprehet tepër i kënaqur jo vetëm nga fitorja në fushë por më së shumti nga fitorja në shkallët e stadiumit, ku tifozët treguan pjekuri dhe qytetari. Dëshiroj ti përgëzoj djemtë për fitoren? shprehet Ismaili i kënaqur,? Padyshim që me këtë fitore treguam se nuk flitet kurrë për kompromis me asnjë ekip të Superligës as edhe me Partizanin. Ne jemi të destinuar që të zhvillojmë gjithmonë një futboll të denjë dhe korrekt, të cilin do të dëshirojmë ta çojmë deri në fundin e kompeticionit duke parë edhe objektivat tona këtë vit. Po ashtu, nuk mund të le pa i falenderuar edhe tifozët tanë të cilët treguan kulturë dhe qytetari teksa kanë pritur dhe kanë respektuar tifozët që kishin udhëtuar nga kryeqyteti për të ndjekur ekipin e tyre. Në këtë takim i kemi treguar presidentit Xhani, tifozëve të kuq por edhe tifozërive të kujdo ekipi tjetër se jeni të mirëpritur gjithmonë të ndiqni ekipin tuaj në Peqin. Padyshim që këtu mikpritja dhe respekti do të jetë për cdo kënd që vjen si mik dhe na respekton", ka përfnduar presidenti Ismaili
Sport ekspres