Bizhyti: Të shfrytëzojmë kalendarin

Mesfushori i Shkumbinit, Alban Bizhyti, pohon se është momenti më i mirë për t’u ngjitur
Ekipi i Shkumbinit, pas një dite pushimi, të dielën, pritet të
rikthehet sot në fushën e stërvitjes, në përgatitje për ndeshjen e
radhës, me Partizanin.
Trajneri Magani do të ketë në dispozicion të gjithë futbollistët për
këtë ndeshje, përfshi edhe gjirokastritin Nora, i cili mungoi në
ndeshjen e fundit me Tiranën për shkak të plotësimit të numrit të
kartonëve. Nisur nga rezultati jo i mirë i arritur me Tiranën të enjten
në kryeqytet, pritet që ekipi në ndeshjen e radhës t’i rikthehet
fitores, që ia forcon pozitat Shkumbinit në vendin e 5 të, me
pretendimin për t’u ngjitur edhe më lart nisur edhe nga përballjet e
vështira të rivalëve të drejtpërdrejtë.
Këtë e pranon edhe mesfushori i Shkumbinit, Alban Bizhyti, duke e
parë si të domosdoshme arritjen e fitores. Për lushnjarin që luan
sezonin e tretë në Peqin me Shkumbinin, ekipi i tij nuk duhet t’i
ndahet pozicionit dhe kjo tregon punën që bëhet në ekip e për garancinë
financiare të Shkumbinit nën drejtimin e presidentit Ismaili, për më
tepër që janë ndeshjet e fundit të fazës së dytë dhe ekipi i tij duhet
të përfitojë edhe nga favoret e shortit për fazën e tretë. Mesfushori
shkatërrues i Shkumbinit, titullar në formacionin e Maganit në çdo
takim, pranon se përgatitjet për ndeshjen e radhës me Partizanin kanë
filluar një ditë pas takimit me Tiranën.
Duke përfituar edhe nga ditët e shumta në dispozicion përpara këtij
takimi për shkak të grumbullimit të ekipit kombëtar, 25 vjeçari tregon
se Partizani, kundërshtari më i afërt i Shkumbinit, po merr vlerësimin
e duhur në stërvitje këto ditë nga i gjithë grupi për të kënaqur
sportdashësit e vet, të cilët me të drejtë presin më shumë nga ekipi i
tyre. Për lushnjarin e natyralizuar si peqinas, Shkumbini i këtij
sezoni, më shumë se çdo vit tjetër më parë, ka të drejtë të pretendojë
më shumë për një vend nderi në kampionat, pa harruar edhe kupën, sepse
është investuar jo pak nga donatorët e presidentit Ismaili. Bizhyti
gjen rast për të vlerësuar edhe korrektësinë në çdo drejtim nga
drejtuesit. “Shkumbini renditet me meritë në vendin e 5 të në tabelë,
një vend në fakt i lakmuar nga shumë ekipe të tjerë. Me pak kujdes mund
të kishim disa pikë më shumë e mund të ishim më lart në tabelë.
Kemi ditur të zhvillojmë një lojë mjaft të mirë me Vllazninë, që e
fituam me meritë, por duhet pranuar se nuk u shfaqëm të tillë përballë
Tiranës në kryeqytet, duke mos i kënaqur sportdashësit,” - pohon
lushnjari i Shkumbinit. Për mesfushorin shkatërrues të Shkumbinit, janë
të gjitha mundësitë që ekipi i tij të bëjë autokritikën e duhur me lojë
e me rezultat në ndeshjen me Partizanin. Bizhyti kërkon që ditët e
stërvitjes të shfrytëzohen sa më mirë, për të pasur përfundimin dhe
vlerësimin e duhur ditën e ndeshjes, pasi përballë nuk do të jetë me
Partizanin e vitit të kaluar, por një ekip i motivuar që ka ditur të
përballojë problemet, duke qenë më i suksesshëm në 4 javët e fundit dhe
duke iu larguar fundit të tabelës.
“Partizani, pavarësisht problemeve e vështirësive që po kalon,
mbetet nga ekipet më me traditë në Shqipëri dhe vet rezultatet në 4
javët e fundit flasin më qartë se ky ekip kërkon vlerësim maksimal. Në
këtë drejtim po punohet në stërvitje, duke kërkuar të kënaqim
sportdashësit, por të kënaqemi edhe vet. Për vetë pozitën në të cilën
ndodhemi, do të kërkojmë fitoren, pasi çdo rezultat tjetër nuk na
intereson, duke e konsideruar si humbje. Tri pikët me Partizanin bëhen
të domosdoshme, pasi janë ndeshjet e fundit të fazës së dytë që na
pozicionojnë edhe më mirë në vendet e sipërme të tabelës,” - përfundon
Alban Bizhyti.