Rizvanolli: Priteni rikthimin e Shkumbinit!

Sulmuesi Erion Rizvanolli është shënuesi më i mirë i peqinasve, por nuk do të ndalet
Erion Rizvanolli ka disa sezone që luan për ekipin e Shkumbinit (me ndërprerje) dhe vazhdimisht ai ka spikatur si njohës i portave kundërshtare. Eshtë një zanat që ai e njeh mirë dhe këtë e ka treguar me Shkumbinin dhe me çdo ekip tjetër ku është aktivizuar.
Për sezonin në vazhdim me Shkumbinin, ai është aktivizuar vetëm në fazën e parë, duke shënuar 6 gola e duke qenë golashënuesi më i mirë i Shkumbinit. Për shkak të një dëmtimi në kavilje në javën e parë të fazës së dytë në Ballsh, Riza detyrohet të qëndrojë për 6 javë larg fushës i paaktivizuar, por rekordi i golave të tij nuk u arrit nga të tjerët.
Vetë Riza pranon se dëmtimi ka kaluar dhe provën ai e bëri në ndeshjen e fundit të vitit në Shijak me Lushnjën, kur u aktivizua për disa minuta për Shkumbinin. “Jam futbollist i Shkumbinit, me të cilin kam nënshkruar një kontratë që dua ta zbatoj deri në fund.
Nëpërmjet shtypit jam njohur me interesimin e disa klubeve që kërkojnë shërbimin tim, por e theksoj edhe një herë, se e ndiej veten shumë mirë tek ekipi peqinas dhe më intereson vetëm ky ekip, duke dëshiruar të kontribuoj sa më shumë për të arritur objektivat që ka,” - deklaron sulmuesi Rizvanolli, duke kërkuar të japë në këtë rast edhe një përgjigje përfundimtare për çdo iluzion që mund të kenë të tjerët.
Autori i 6 golave për Shkumbinin, me Teutën 1 0, me Besën 1 0, me dy golat në Shkodër me Vllazninë, 2 2, të golit të parë në fitoren 2-0 me Partizanin dhe të golit të parë me Apoloninë, 2 0, është i ndërgjegjshëm se mundësitë për të kanë qenë për të shënuar edhe më shumë, por dëmtimi i pësuar e detyroi të qëndrojë për një kohë të gjatë jashtë fushës së lojës.
Për shënimin e golave ai gjen rast të vlerësojë lojën e gjithë ekipit, sidomos të pjesëtarëve të tjerë të repartit të sulmit, konkretisht të riun Mustafaj, Dervishin e sidomos gjirokastritin Nora. “Nëse kam shënuar 6 gola, merita nuk ka qenë vetëm imja, por e ekipit dhe e repartit të sulmit, që me lojën e tyre, e kanë lehtësuar punën për ta dërguar topin në rrjetë.
Duke parë grupin e lojtarëve dhe punën që bëhet çdo ditë, janë të gjitha mundësitë që Shkumbini në pjesën tjetër të kampionatit të jetë më i saktë e më rezultativ.
Me fillimin e fazës së dytë patëm një moment të vështirë dhe kjo i ndodh çdo ekipi e për fatin tim të keq, nuk pata mundësi të kontribuoja me përvojën time për shkak të dëmtimit, por e keqja kaloi dhe ekipi gjeti forca për t’u rikthyer te fitorja në ndeshjen me Elbasanin.
Kjo na bëri të jemi më të qetë për zhvillimin e fazës përgatitore, për t’u stërvitur më mirë për këtë periudhë. Mendoj se grumbullimi që do të bëhet këto ditë, si dhe përforcimet që fliten, do të na shërbejnë të gjithëve në planin profesional për të qenë sa më të përgatitur e të gatshëm për rifillimin e kampionatit, kur përballë do të kemi ekipin që kryeson prej disa javësh, Vllazninë.
Emri dhe vlera e kundërshtarit mendoj se do të jenë një nxitje më shumë për ne për të bërë më të mirën në stërvitje,” - ka përfunduar sulmuesi Erion Rizvanolli.
Arjan Sheta, thuajse i Shkumbinit
Edhe pse është bërë fakt i kryer kalimi i tij te Partizani dhe madje është starvitur edhe dje në kampin e kuq, burime pranë presidencës së Shkumbinit bëjnë me dije se Arjan Sheta thuajse është i tyre.
Mbetet vetëm firma sot prej tij që të bashkohet me grupin për t’u nisur në Ulqin. Të njëjtin fat mund të ketë edhe serbi që ishte në provë te peqinasit, Jaksimoviç, me të cilin po diskutohen termat e fundit të kontratës.
Ali hallulli
Sporti shqiptar