Shkumbini/Peqinasit donin Ohrin, por koha e keqe i prish planet

Skuadra ndryshon itinerarin drejt Ulqinit
Më në fund është zgjidhur edhe dilema për skuadrën peqinase të
Shkumbinit përsa i përket zhvillimit të fazës përgatitore të dimrit,
pasi drejtuesit kanë rënë dakord që ajo të kryhet në qytetin malazez
të Ulqinit. Klubi peqinas ishte në dilemë për të vendosur midis Maqedonisë
apo ndonjë opsioni tjetër, duke përfshirë edhe mundësinë e
qëndrimit në vend, mirëpo në momentet e fundit ata kanë vendosur
që të zhvendosen drejt qytetit bregdetar, i cili ofron kushte komode
në këtë periudhë. Vetë sekretari i klubit peqinas së bashku me
trajnerin Gugash Magani dhe mesfushorin maqedonas kanë inspektuar
kushtet në Ohër për ta zhvilluar atje minifazën, por bora që
kishte rënë u ndryshoi mendim edhe pse fusha e stërvitjes ishte
fare pranë hotelit. Sekretari i Shkumbinit, Astrit Isaj, u shpreh se
dëshira ishte për në Maqedoni, pasi atje nuk kishte ekipe të tjera
shqiptare, mirëpo kushtet e rënduara të motit e bënë atë që të
ndryshonte destinacion. Klubi peqinas po i merr të gjitha masat që
t’u krijojë futbollistëve kushte sa më të favorshme në këtë përgatitore
dhe tashmë në qytetin e Ulqinit normalisht do të jetë edhe
mundësia e zhvillimit të ndonjë miqësoreje me ekipet e Besës dhe
Vllaznisë. Në rast se peqinasit ndeshen me ekipin e Vllaznisë, mund
të jetë një sfidë, që mund t’i paraprijë ndeshjes që do të zhvillohet
për kampionat, të cilën peqinasit do ta zhvillojnë përpara sportdashësve
të tyre në stadiumin e qytetit. Fatmir Ahmeti
Panorama sport