Lushnja në Superligë, Kastrioti një kat më poshtë

Lushnja në Superligë, Kastrioti një kat më poshtë
Pas një penalltie të humbur nga Bubeqi në minutën e 71-të, e një barazimi pa gola gjatë 120 minutave, Lushnja ia doli të mposhtë 4-2 Kastriotin nga gjuajtjet e penalltive, duke fituar me meritë një vend në Kategorinë Superiore në kampionatin e 70-të jubilar.

Kastrioti, që vitin e ardhshëm do të luajë një kategori më poshtë, e nisi takimin si favorit prodhoi shumë pak në fushë, dhe i vetmi moment i rëndësishëm për djemtë (e lodhur) të Ramadan Ndreut ishte pritja e penalltisë nga portieri Arjon Mustafa të ekzekutuar keq nga Dorian Bubeqi.

Tre ndërrime të shpejta për krutanët, dy nga këto në pjesën e parë, dhanë imazhin e një skuadre pa forcë, aq sa Erion Rizvanolli, sulmuesi kryesor i Kastriotit ishte hija e vetvetes.

Përkundrazi, verdhjeshilët e Artan Banos të udhëhequr në fushë nga dy kapitenë njëherësh, Hasalla me shiritin në krahë e veterani Elezi me udhëzimet e tij, ishin zot të fushës, duke rrezikuar në mënyrë të vazhdueshme portën e Kastriotit.

Nëntëdhjetë minutat e kohës së rregullt u mbyllën pa gola, dhe po të tilla edhe 30 minutat shtesë. Trajneri i Kastriotit besoi shumë të mrekullia e portierit Mustafa, por të tijtë gabuan dy herë kundrejt “snajperëve” lushnjarë.

Nigeriani Osui dhe gjirokastriti Braho gabuan dy penalltitë e para për Kastriotin, teksa Xhafa e Canka u treguan të pamëshirshëm, duke i dhuruar një avantazh 2-0 qysh në dy seritë e para të penalltive. Brahja e Gallo realizojnë për Kastriotin, por Bubeqi nuk gabon për herë të dytë, ndërsa Gersi Arbëri, e çon në 4-2 dhe vulos rikthimin pas dy sezonesh mungesë të Lushnjës në Superligë.

Kastrioti do të luajë sezonin e ardhshëm në Kategorinë e Parë, duke i bërë shoqëri Besëlidhjes e Skënderbeut, dy skuadrave të tjera të Superligës në sezonin 2007-2008 që ranë një kategori më poshtë.

Të shtunën, Teuta mbijetoi pas 120 minutave të çmendura, teksa fitoi 2-1 me Burrelin në “Qemal Stafa”, falë golave të Dushkut (7’) dhe penalltisë së Bledar Hodos (114’), kundrejt një goli të Xhixhës së Burrelit në minutën e 93-të të kohës së rregullt.

Kështu, panorama e Kategorisë Superiore për sezonin e ardhshëm do të jetë kjo: Dinamo (kampione në fuqi), Partizani, Besa, Elbasani, Shkumbini, Tirana, Vllaznia (fituese e Kupës), Flamurtari, Teuta, Bylis, Apolonia e Lushnja.

PLAY-OUT PËR KATEGORINË SUPERIORE

Kastrioti-Lushnja 0-0

Me penallti Lushnja fiton 4-2

E diel, 25 maj 2008

Stadiumi Kombëtar “Qemal Stafa”

Gjyqtar: Albano Janku

Penalltitë

KASTRIOTI

Osui (jo)

Braho (jo)

Brahja (po)

Gallo (po)



LUSHNJA

Xhafa (po)

Canka (po)

Bubeqi (po)

G.Arbri(po)