Ismaili: E dua të fituar këtë ndeshje

Ismaili: E dua të fituar këtë ndeshje
Pavarësisht se Shkumbini humbi të dielën në Kavajë, përballë Besës, presidenti Xhavit Ismaili është optimist për të ardhmen e skuadrës së tij. “Më vjen mirë që arritëm në këtë pikë ? thotë presidenti Ismaili. ? Të gjithë e dinë sesi e nisëm kampionatin. Humbjet në ndeshjet e para, lojërat jo bindëse, problemet që na u krijuan pas disfatës me Tiranën në fushën tonë, krijuan përshtypjen se Shkumbini do të ishte larg pretendimeve serioze në këtë sezon. Por hap pas hapi mbërritëm në këtë situatë, kur skuadra po paraqitet denjësisht në të dy frontet, kampionat e kupë”. Në këtë sezon, fanellën bardhekaltërt e kanë veshur disa futbollistë, të ardhur nga ekipe të tjera, për të cilët Ismaili flet fjalët më të mira, duke mos përjashtuar dhe stafin teknik, që e ka menxhuar me aq profesionalizëm. “Jam i bindur se tani kemi një skuadër të fortë e të pathyeshme dhe këtë nuk e them nisur nga euforia. Megjithatë, duhet të qëndrojmë “me këmbë në tokë” dhe të vlerësojmë kundërshtarët, duke nisur që me Elbasanin” thekson presidenti i Shkumbinit. Atmosfera e ndeshjes ka përfshirë të gjithë Peqinin dhe konsiderohet me rëndësi vendimtare për të ardhmen e skuadrës, ndërsa Ismaili ka theksuar: “Eshtë një ndeshje derbi prandaj çdo lojtar duhet të jetë i motivuar. Unë dua që futbollistët të bëjnë më të mirën për skuadrën”. Presidenti peqinas ka besim të madh te suksesi i skuadrës së tij. “E rëndësishme është që skuadra të luajë me impenjim e grintë, pasi lufta sportive është një faktor i rëndësishëm. Nëse do të luhet me ndjenjën e grupit dhe secili të japë maksimumin, atëherë kemi të drejtë t?_etendojmë për fitore”, thotë Ismaili, i cili shton se skuadra duhet të triumfojë ndaj verdhebluve dhe të shikojë përpara, për të arritur objektivat në të dy kompeticionet e këtij sezoni. Të mërkurën e ardhshme, skuadra peqinase do të luajë në “Ruzhdi Bizhuta” me Elbasanin ndeshjen e kthimit për Kupë. Megjithatë, vëmendja e presidentit është përqendruar te përballja e së premtes për kampionat. Sipas tij, ndeshjet duhen marrë me radhë. “Personalisht, dua t’iu them të gjithë futbollitëve, stafit teknik dhe tifozerisë peqinase se e dua këtë fitore” ka bërë apel presidenti i Shkumbinit.