Bizhyti, me moral e mentalitet fituesi

Bizhyti, me moral e mentalitet fituesi
Ndeshja e së shtunës, ndaj Flamurtarit, edhe pse në transfertë, do të
tregojë skuadrën e vërtetë të Maganit. Eshtë ky mendimi i mesfushorit
lushnjar të Shkumbinit, Alban Bizhyti. Sipas tij skuadra peqinase do të
përpiqet të arrijë një rezultat pozitiv. “Kam shumë besim te skuadra, -
tregon Bizhyti. - Kemi zhvilluar një përgatitje serioze në Ulqin, në të
cilën kemi marrë ngarkesën e duhur, për ta përballur me sukses gjysmën
e dytë të kampionatit. Dhe unë jam i bindur se nuk ka për të ndodhur
ndryshe”. Edhe pse do të luhet në transfertë, mesfushori thotë se në
skuadër sundon një gjendje e shëndoshë psikollogjike dhe mentaliteti i
fituesit. Në opinionin sportiv peqinas, rezultati i ndeshjes së të
shtunës lerësohet si me mjaft rëndësi për ecurinë e mëtejshme të
skuadrës. Nisur nga kjo, Bizhyti, duke u bazuar në përgatitjet e bëra,
ka besim se Shkumbini do të jetë dinjitoz në Vlor dhe nuk do të
largohet pa pikë. “Të shtunën do të jetë një ndeshje e vështirë, pasi
do të përballemi me skuadrën, me të cilën rivalizojmë për të zënë një
vend midis gjashtë të parave. Nuk kemi nevojë për fjalë të shumta dhe
jemi të motivuar për të shfaqur vlerat tona më të mira në fushën e
lojës” ka nënvizuar futbollisti, i cili ka folur edhe për mënyrën si do
të luajnë në Vlorë. “Nuk do të mbyllemi në mbrojtje, edhe pse duhet të
jemi të kujdesshëm, por prioritet do t’i japim lojës sulmuese nëpërmjet
kundërgoditjes së befasishme, - ka shpjeguar Bizhyti. - Do shfrytëzojmë
çdo gabim në rreshtim apo në lënien e hapësirave prej mbrojtjes
vlonjate. E përsëris, duke pasur “këmbët në tokë”, kemi besim në forcën
tonë”. Sipas tij, të gjitha ndeshjet duhen vlerësuar në këtë pjesë të
kampionatit, për të arritur objektivin, duke u rreshtuar mes skuadrave
më të mira.

Nga SportEkspres