Peqinasit nisin turin e miqesoreve

Peqinasit nisin turin e miqësoreve
Që nga dita e hënë, skuadra e Shkumbinit ndodhet e akomoduar në Ulqin të Malit të Zi për të zhvilluar fazën përgatitore. Ndonëse jo në tokë shqiptare, ekipi peqinas nuk është i vetmi në këtë kamping gati dyjavor në Ulqin. Bashkë me Shkumbinin, në Mal të Zi janë vendosur me rezidencë edhe disa skuadra të tjera të Kategorisë Superiore si Partizani, Besa e Vllaznia. Kjo
minifazë përgatitore do t’i shërbejë ekipit për ngritjen e tij në aspektin
fizik dhe në atë teknik. Në aspektin fizik, sipas vetë trajnerit të Shkumbinit, Gugash Magani, çdo gjë është duke shkuar sipas planit. Ekipi është duke u stërvitur me dy seanca në ditë. Kjo do të bëjë që i gjithë kontigjenti të
arrijë parametra të kënaqshëm për vazhdimësinë e kampionatit. Nga ana tjetër, po mendohet seriozisht edhe për anën teknike për t’i mbajtur lojtarët në kontakt me topin, si dhe për të konsoliduar edhe më tej grupin. Ndonëse në fillim dukej i vështirë planifikimi i miqësoreve në Ulqin, tashmë gjithçka është në favor të peqinasve. Skuadra e Shkumbinit ka përcaktuar kështu një program të ngjeshur me miqësore, të cilat janë planifikuar fillimisht ndaj
ekipeve shqiptare që ndodhen në Ulqin. Një program që ka startuar me miqësoren e zhvilluar dje kundër Besës. Testim ky që është mbyllur me fitoren e Besës, edhe pse përsa i përket volumit të lojës së zhvilluar ka qenë i barabartë. Ndërkaq është përcaktuar edhe kundërshtari i radhës dhe dita e miqësores së dytë. Kështu të dielën, skuadra e Shkumbinit do të zhvillojë një ndeshje testuese me ekipin e Partizanit. Një axhendë me miqësore që me ekipet shqiptare do të mbyllet të enjten e javës së ardhshme kundër skuadrës së Vllaznisë. Lulzim Resuli
panorama sport