Me sytë te Kupa dhe mendjen te Tirana

Me sytë te Kupa dhe mendjen te Tirana

Duket se pas ndeshjes me Partizanin, klima pranë Shkumbinit nuk ka qenë edhe aq e qetë. Sot, ekipi peqinas do të ketë një përballje në Bilisht me vendësit për Kupën e Shqipërisë, ndërsa në fundjavë do të ndeshen në një tjetër takim të rëndësishëm për kampionat kundër Tiranës, ekipit kampion në fuqi. Sipas drejtuesve të klubit mësohet se Shkumbini ka si synim të tij ecurinë e mirë në kampionat dhe të shkojë sa më larg në Kupën e Shqipërisë. Sipas presidentit Ismaili, ekipi do të arrijë të kualifikohet në ndeshjet e Kupës së Shqipërisë, pasi ky është një synim i tyre. Mirëpo, ai nuk ka lënë pa shpjeguar se ekipi duhet që të jetë më i freskët për takimin e fundjavës kundër Tiranës, pasi ecuria në kampionat është tepër e rëndësishme, në veçanti në këto ndeshje të fillimit të fazës. Ekipi i Shkumbinit, dje para fillimit të sencës stërvitore, ka bërë një analizë, ku është kërkuar që lojtarët të kenë një impenjim më të madh dhe të tregojnë më shumë grintë sesa në ndeshjen e kaluar kundër Partizanit, ku ekipi u pa i mpirë sidomos në fazat sulmuese. Në këtë analizë ra në sy padyshim mungesa e presidentit Ismaili, i cili i kontaktuar për këtë pikë u shpreh: “Jam disi i pakënaqur nga loja e ekipit, sidomos në ndeshjen e fundit ndaj Partizanit. Mungesa ime në analizë ka disa arsye. Së pari, nuk kam dëshirë që të merrem me shumë fjalë e me pak punë, gjë që do të thotë se ne kishim bërë një analizë para një jave dhe mendoj se
nxorëm më së miri detyrat sidomos për gjashtë ndeshjet deri në fund të dhjetorit. Djemtë më premtuan se do të japin më të mirën, mirëpo ai i së dielës nuk ishte ekipi që unë kërkoj. Së dyti, mendoj se ekipi nuk ka asnjë arsye që të bëjë këtë paraqitje të dobët, pasi ne në kontigjent kemi lojtarë që e njohin mirë kampionatin shqiptar. Në kampionatet e mëparshëm disa prej tyre janë shpallur edhe kampionë ndaj kërkoj prej tyre që këtë mentalitet ta shprehin edhe në ndeshjet me Shkumbinin. Së fundi dua t’u them se jemi për t’u përgëzuar, pasi ekipi deri tani ka një harmoni të kënaqshme dhe ne drejtuesit jemi treguar mëse korrekt me ta, si në pagesa, ashtu edhe në premio. Kjo na detyron të kërkojmë si shpërblim rezultate pozitive ndaj çdo kundërshtari”. Në fund të fjalës së tij, presidenti i klubit peqinas nuk harron të replikojë edhe një herë kolegun e tij të Partizanit. “Dua të them se prononcimi i Xhanit është i paprecedent, pasi ne jemi një ekip që dëshirojmë të luajmë me forcat tona. I kërkojmë hallkat e problemeve vetëm brenda ekipit dhe së fundi dua t’u garantoj se unë personalisht, por edhe politika e të gjithë klubit që unë drejtoj është larg çdo lloj pazari, apo kompromisi me çdo lloj kundërshtari”.