Mustafaj kërkon të abonohet me 11-n

Sulmuesi peqinas shpreson të ketë një vend stabël në formacion
Sulmuesi i talentuar peqinas,
Erion Mustafaj, ka bërë një paraqitje
të mirë në miqësoren e zhvilluar
përballë Lushnjës, duke
shënuar edhe një gol, e duke u
impenjuar edhe në stërvitje. Lojtari
i repartit të sulmit bardhekaltër
ka qenë pjesë edhe e kombëtares
U-19, duke lënë gjurmë
me golat e tij edhe në këtë
skuadër me bashkëmoshatarë. Pas mungesës së sulmuesit tjetër,
tiranasit Rizvanolli, për arsye dëmtimi, Mustafaj u bë zgjedhja e parë
në formacion nga trajneri Magani, detyrë të cilën sulmuesi peqinas e
kreu deri diku mirë. Tashmë që Rizvanolli e ka lënë pas dëmtimin
dhe është rikthyer në formën e tij më të mirë, konkurrenca në këtë
repart shtohet edhe më tej, duke ditur që tani do të rikthehet edhe
Nora në rolin e sulmuesit. Nga qyteti i Ulqinit, ku po kryen fazën
përgatitore skuadra peqinase e Shkumbinit, i riu Mustafaj shprehet
se nuk ka frikë nga konkurrenca në skuadër, duke shtuar se kjo gjë
shërben veçse për mirë. “Në skuadrën tonë ne jemi të gjithë të barabartë,
prandaj nuk shqetësohem aspak për aktivizimin tim në lojë,
gjë të cilën e ka totalisht në dorë
trajneri Gugash Magani. Unë
vetëm mundohem të jap maksimumin
tim, si në stërvitje, ashtu
edhe në ato sfida ku jam aktivizuar
nga trajneri. Megjithatë
po kaloj një formë të mirë, dhe
jo vetëm unë. E gjithë skuadra
ndihet mjaft komode këtu ku
jemi, ndaj kur të kthehemi dua
të jem vendimtar, duke shënuar sa më shumë për skuadrën time”,
tha Mustafaj. Në lidhje me dëshirat personale që ka, vetë futbollisti
bardhekaltër shprehet se do të donte të fitonte një trofe me Shkumbinin
qoftë edhe Kupën e Republikës. “Mendoj se çdo futbollist e
ka ëndërr të ngrejë trofeun e kampionatit apo kupës, prandaj edhe
unë do ta dëshiroja një moment të tillë. Tashmë skuadra jonë gjendet
prej 15 vitesh në Superiore dhe do të ishte fantastike që edhe
ne të merrnim trofeun e parë si skuadër. Përveç dëshirës sonë,
kjo do të ishte edhe dhurata më e madhe që do t’i bënim tifozerisë
sonë të zemrës, që na ka mbështetur në gjithë këto vite”, -
përfundon sulmuesi peqinas Mustafaj. Fatmir Ahmeti
Panorama Sport