Branica “Jemini, ‘non grata’ në Peqin’

Për peqinasit është mjaft e vështirë të kapërdihet ai barazim
pa gola përballë Dinamos ditën e diel, pasi në të gjitha
aspektet, Shkumbini ka qenë më lart se kundërshtari i tij.
Vendësit e kishin mbivlerësuar kundërshtarin, pasi vinte
në Peqin si kampione në fuqi, mirëpo fusha e lojës tregoi se
bardhekaltrit me ato raste që krijuan, mund dhe duhet ta
kishin fituar atë sfidë. Të njëjtin mendim ndan dhe Sokol
Branica, në rolin e trajnerit të dytë, teksa thekson se fitorja
bëhet më e vështirë kur duhet të luash ndaj dy kundërshtarëve.
“Që në momentin e hedhjes së shortit, ne e patëm
kontestuar këtë gjyqtar, - shprehet Branica në prononcimin
e tij për ‘Panorama Sport’. - Tashmë që ndeshja ka mbaruar
dhe Shkumbini në një farë mënyre është dëmtuar, është e
kotë të diskutosh për këtë gjyqtar, por një gjë është e sigurt:
se Jemini është ‘non gratta’ në Peqin dhe nuk do të pranojmë
të na gjykojë në asnjë sfidë tjetër”. F. Ahmeti
Panoramasport

Duket se edhe presidenti bardhekaltër, Xhavit Ismaili, është ndier i ofenduar nga gjykimi tendencioz i gjyqtarit kryesor Jemini dhe pas ndeshjes, ekskluzivisht për “Sportin shqiptar”, është prononcuar. “Jam tepër i revoltuar për atë që pashë e përjetova dje, kur gjyqtari kryesor me mënyrën sesi e drejtoi takimin Shkumbini-Dinamo, kërkoi dhe u përpoq që Shkumbini të humbiste për të fituar Dinamo. Paskemi gabuar duke besuar më kot për të rënë në grackën e tij dhe të atyre që mund të fshihen pas këtij gjyqtari. Qëllimi i tij ishte të fitonte kundërshtari ynë me format e tij për të provokuar incidente me tifozët, për të dënuar më pas sipas mendjes së tij fushën, duke u dëmtuar Shkumbini, për ta marrë ndeshjen në tavolinë. Skenat që unë do t’i quaja të paturpshme në përfundim të takimit, kur do të futej në dhomat e zhveshjes, u vënë kapak të gjithave atyre që bëri më parë. Me veprime dhe gjeste të palejueshme e të dënueshme ai zgërdhihej përpara tribunës qendrore, duke provokuar hapur sportdashësit e shumtë. Nuk është fjala këtu për një ndeshje të humbur apo të fituar, por unë dhe të gjithë të tjerët jemi të indinjuar për mënyrën se si kërkoi të vepronte ky njeri, me synimin për të arritur qëllimin e tij. Në këtë situatë unë deklaroj se e vë në diskutim të ardhmen time pranë futbollit. Këtë e them me keqardhje. Për mua është e kotë të investosh për futbollin, kur njerëz pa identitet kërkojnë të tallen me një qytet që e do futbollin, por edhe me investimet e biznesit tim, “- citoi Ismaili. Nga ana e tij, trajneri i Shkumbinit, Gugash Magani, eshte shprehur: “Duhet pranuar se zhvilluam një pjesë të parë jo të mirë dhe kjo se kundërshtari për mua ishte mbivlerësuar si kampion në fuqi, duke mos u shfaqur si duhet e duke mos shfrytëzuar mundësinë që patëm. Ndërsa pjesa e dytë foli e gjitha për Shkumbinin. Dinamo vetëm një herë ka arritur t’i afrohet portës sonë, pasi ekipi i Shkumbinit pati epërsi në lojë e në raste. Ka qenë një ndeshje e fortë dhe tepër korrekte nga të dy ekipet për gjatë 90 minutave, por më duhet të them që gjyqtari na vodhi dy pikë dje. E patëm kontestuar më parë si tifoz i Dinamos dhe ai e vërtetoi, duke kërkuar me mënyrën sesi e drejtoi lojën që të humbiste Shkumbini e të fitonte Dinamo. Për fatin tonë të mirë, nuk pati asnjë moment të dyshimtë në zonën e portës sonë, se ai pa diskutim do të jepte 11-m kundër Shkumbinit. Ky gjyqtar është i padëshiruar tani e tutje në Peqin, sepse nuk mund të tallet me ndjenjat e një qyteti e me investimet e presidentit, me djersën e futbollistëve. Për rastin e 11-m nuk më takon mua të flas, duke ua lënë në kompetencë specialistëve për ta gjykuar si duhet.”
Sporti shqiptar