Presidenti peqinas s’kapërdin humbjen me Elbasanin

Presidenti peqinas s’kapërdin humbjen me Elbasanin me probleme Ismaili, i zemëruar për mosimpenjimin

Humbja me Elbasanin e ka lënë me shije të hidhur presidentin e Shkumbinit, Xhavit Ismaili, i cili shprehet se ka mbetur i pakënaqur nga fakti që skuadra e tij nuk arriti të shfrytëzonte gjendjen e vështirë të verdhebluve.Elbasani kishte probleme me formacionin
dhe ishin të gjitha mundësitë që miqtë të dilnin me një barazim,
por në fund dolën të mposhtur nga goli i Arben Nuhijit. Mungesa e
impenjimit ishte një nga arsyet kryesore të zemërimit të presidentit Ismaili. “Prisja shumë nga djemtë. Nuk besoj se do ta gjejmë më me kaq shumë probleme Elbasanin dhe ishte rasti ta shfrytëzonim”, thotë presidenti. “Loja më shumë u luajt nga lojtarët tanë, por asnjëherë me forcën e duhur për të marrë pikët. Ne si drejtues e kishim vlerësuar siç duhet këtë takim dhe pritnim të paktën që lojtarët të reagonin në mënyrën e duhur. Për shkak të mosimpenjimit, rezultatet pozitive po na mungojnë prej disa javësh. Është e papërgjegjshme që disa lojtarë luajnë me investimet e presidentëve edhe kur ne jemi më se seriozë dhe të rregullt me ta”. Ismaili ka paralajmëruar se nuk do të tolerojë
dhe do të mblidhet me bashkëpunëtorët e tij për të analizuar situatën. “Do të mblidhemi si staf më tej edhe me lojtarët tanë dhe do të bejmë një analizë të plotë rreth gjendjes në ekip. Ajo çka synojmë është që t’i tërheqim vëmendjen çdo lojtari se kampionati nuk ka përfunduar dhe se ne kemi ende synime në kampionat. Prandaj, çdo lojtar është i detyruar që t’i shërbejë
skuadrës deri në ditën e fundit që është pjesë e tij”, përfunduar Ismaili.

Kasollja mbetet ne skuader.

Presidenti i Shkumbinit ka mohuar të ketë përjashtuar futbollistin Madrilen Kasollja nga radhët e skuadrës së tij. Në numrin e djeshëm të “Panorama Sport” u bë e ditur se Ismaili përjashtoi lojtarin e mësipërm, bashkë me Klevis Dalipin dhe Gentian Stojkun, pas humbjes me Elbasanin. Vetë presidenti sqaron se të përjashtuar janë dy elbasanasit e tjerë, si dhe një lojtar peqinas, por Kasollja vazhdon të jetë pjesë e skuadrës.

Nga PanoramaSport

Gentian Stojku pezullohet pa afat

Ashtu sikurse ishte lajmëruar, seanca e parë stërvitore e kësaj jave ka nisur pas një analize të gjatë që ka zhvilluar ekipi i Shkumbinit në prag të javës së dytë të fazës së tretë të kampionatit shqiptar. Në fund të kësaj analize, ekipi i Shkumbinit ka shtuar numrin e lojtarëve që do të largohen nga gjiri i tij pa e mbyllur kampionatin me këtë ekip. Më parë në merkaton dimërore, u vendos që të largohet Patushi, i cili nuk kishte dhënë atë që pritej, pas afrimit të tij me shumë bujë në merkaton e verës. Ndërsa tani, drejtuesit peqinas, tepër të irrituar dhe të zhgënjyer nga loja e sulmuesit Gentian Stojku gjatë ndeshjevë të fundit kanë marrë masën ekstreme, duke e pezulluar lojtarin nga ekipi. Ky vendim i është komunikuar edhe lojtarit nga drejtuesit më të lartë peqinas, menjëherë pas analizës të së hënës pasdite. Në mbledhjen e peqinasve ishte i pranishëm edhe numri një i klubit, Xhavit Ismaili, si dhe kryetari i Bashkisë Peqin, Ilir Rrusha. Kjo analizë ka ardhur si rrjedhojë e rezultateve të dobëta,që ekipi i Shkumbinit ka arritur në këto javët e fundit. Drejtuesit janë mbledhur për të diskutuar në lidhje me gjetjen e fajtorëve si dhe për të rikuperuar diçka nga ajo çka kanë humbur deri më tani. “Është thuajse e papranueshme që ekipi i Shkumbinit ka disa javë që “noton në ujëra të turbullta” dhe larg është rezultateve të pritshme. Ekipi ynë ka dalë jashtë nga objektivi Kupë -ka thënë presidenti Ismaili. - Ai po e humb përqendrimin e tij edhe në kampionat. Më tej na presin ndeshje tepër të rëndësishme dhe të vështira, të cilat po të ecim me këtë ritëm do të shohim veten në zonën e play of. Ndaj - ka deklaruar presidenti Ismaili - na duhet që tani të mbledhim forcat, për të mos degraduar situatën më tej. Për ne, kampionati s’ka mbaruar ndaj edhe na duhet që të japim më të mirën dhe t’i vlerësojmë si finale të 10 takimet që kemi në këtë fazë të tretë”, përfundoi presidenti i Shkumbinit, Xhavit Ismaili.

Stërvitja pa dy titullarë

Pas afro një ore analizë në ambientet e stadiumit të Peqinit, ekipi i Shkumbinit i është rikthyer seancës stërvitore, ku lojtarët peqinas kanë qenë të gjithë nën urdhrat e trajnerit Magani. Kjo ka bërë që ekipi t’i kthehet normalitetit, për t’u përgatitur për takimin e radhës, ku do të presë në fushën e tij ekipin kampion të Tiranës. Në këtë stërvitje kanë qenë të gjithë lojtarët që trajneri ka në dispozicion përveç sulmuesve Stojku dhe Dalipi. Ky i fundit do t’i bashkohet ekipit në ditët në vazhdim

Nga PanoramaSport