“Në Elbasan na pritën si të ishim serbë”

Kryetari i Bashkisë së Peqinit, Ilir Rrusha, i indinjuar nga sjellja e rezervuar nga verdheblutë në Kupë

Duket se skualifikimi i Shkumbinit nga Kupa e Shqipërisë ka lënë një shije të keqe në mbarë opinionin
peqinas, jo për rezultatin se sa për sjelljen që i është rezervuar nga elbasanasit. Është kryetari i Bashkisë
së Peqinit, Ilir Rusha, i cili dje së bashku me drejtorin e Sportit Arsimit dhe Kulturën në Bashkinë e
Peqinit, Genci Gripshi, janë shprehur shumë të indinjuar për gjestet e tifozerisë vendëse të Elbasanit.
Kryetari i Bashkisë, Rrushi ka deklaruar për “Panorama Sport” se veprimet që kanë bërë tifozët e Elbasanit
kanë qenë vërtetë për të ardhur keq dhe që nuk i kanë hije një populli të kulturuar si Elbasani. “Më vjen shumë keq që persona që nuk janë nga qyteti i Elbasanit, por nga rrethinat e tij, tensionuan situatën në këtë ndeshje të rëndësishme për ne. Dua t’ju kujtoj tifozëve të Elbasanit se janë pritur e përcjellë si miq në Peqin gjithmonë dhe se asnjëherë nuk ka pasuar një situatë të tillë, shprehet kryetari i Bashkisë, Rrusha, i cili kërkon të bëjë publike dhe një tjetër fakt që ka të bëjë me tifozët e Peqinit. “Më ka ardhur shumë keq kur tifozët tanë qëndronin përpara hyrjes së stadiumit të Elbasanit dhe nuk lejoheshin nga ana e punëtorëve të stadiumit të futeshin brenda pa bileta, ndërsa një gjë krejt e kundërt ndodhte me tifozët e Elbasanit, të cilët kanë hyrë falas. Tifozët tanë nuk e dinin këtë fakt, që hyrja e tyre ishte me bileta, por kishin mbërritur të gjithë së bashku për t’i blerë ato. Mund t’iu them se një pjesë, gati 100 tifozëve, ia kam prerë vetë biletat për të hyrë në stadium që kushtonin 300 mijë lekë të vjetra. Gjithsesi, ky fakt nuk ka shumë rëndësi, ajo çfarë dua të them është se kjo ndeshje ka qenë një hap mbrapa mes miqësisë që kanë dy klubet e së njëjtës prefekturë”. Ndërkohë, drejtori i sportit në Bashkisë Peqin, Gripshi, ka deklaruar: “Në Elbasan janë pritur sikur të ishin serbë dhe jo sikur ishin banorë të së njëjtës prefekturë”. Kryetari i Bashkisë gjatë bisedës thotë: “Fajtorë për situatën e krijuar në shkallët e stadiumit janë drejtuesit e Elbasanit, të cilët kanë bërë sehir, duke mos marrë asnjë masë për të parandaluar sharjet që vinin në adresë të tifozerisë peqinase, e cila në këtë takim ka qenë e diskriminuar nga klubi i Elbasanit. Të vetmit përfaqësues të qytetit të Elbasanit, të cilët janë përpjekur të ruajnë balancën dhe qetësinë mes dy klubeve kanë qenë Kryetari i Bashkisë, Qazim Sejdini si dhe zv/ kryetari, Dritan Çepa”, tha kryetari i Bashkisë Peqin, Rrusha.