Ndreu largohet nga Kastrioti, zëvendësuesi është Vasil Bici

Ndryshim i çuditshëm në pankinën e skuadrës së Kastriotit. Ramadan Ndreu ka dhënë dorëheqjen nga posti i trajnerit të ekipit krutan edhe pse vetëm një ditë më parë kishte arritur të drejtonte skuadrën drejt një fitoreje kundër Besëlidhjes. Në një moment kur ekipi krutan dukej se kishte gjetur lojën e rezultatet, duke iu larguar fundit të tabelës së klasifikimit, vjen ky ndryshim, i cili pritet të krijojë jo pak probleme te skuadra. në fakt, Ndreu kishte mbështetjen e ekipit dhe këtë lojtarët e kishin provuar më së miri ndaj Besëlidhjes, duke u impenjuar maksimalisht, pasi e dinin që pankina e tij ishte në rrezik. Por gjithsesi trajneri ka vendosur të mos qëndrojë më te Kastrioti, duke qenë i ndërgjegjshëm se në rezultatin negativ të radhës ai do të largohej nga drejtuesit e ekipit. Si rrjedhojë, ai ka dhënë dorëheqjen e parevokueshme, duke i hapur rrugë zëvendësimit të tij. Presidenti i krutanëve, Zhilli, duket nuk e ka pasur të vështirë të gjejë një trajner për ta emëruar në stolin e skuadrës, pasi ka lajmëruar menjëherë se në këtë post është caktuar Vasil Bici. Trajneri lezhjan ishte "pushim" gjatë javëve të para të kampionatit, pasi nuk drejtonte asnjë skuadër. Bici u ul në stolin e skuadrës së Besëlidhjes gjatë verës, por e braktisi atë para fillimit të sezonit, duke e cilësuar situatën si problematike te ky ekip. Që nga ai moment, ish-trajneri i Vllaznisë, Dinamos, Teutës dhe Besës në edicionet e kaluara, kishte mbetur pa skuadër, ndërsa emri i tij përflitej prej disa javësh si zëvendësuesi i mundshëm i Ndreut. Ky i fundit nuk ka pritur shkarkimin nga drejtuesit krutanë, duke dhënë vetë dorëheqjen dhe duke i lënë skuadrën Bicit.

edhe ky vasili eshte bere si pa identitet cdo ekip p oprovon sme duket gje pozitive