UEFA, besim të plotë gjyqtarit

Duket se nuk do të ketë një fund të lumtur ideja e FSHF-së për ndërtimin e një dosjeje me gabimet e Majk Rilit në takimin Shqipëri - Holandë, ku disa vendime të tij favorizuan "tulipanët". Që nga e enjtja, në FSHF po shqyrtohen rregulloret për të përcaktuar me saktësi gabimet e britanikut, për të kërkuar më pas të paktën pezullimin e tij në ndeshjet ndërkombëtare. Pavarësisht bujës së madhe që u shkaktua ditën pas ndeshjes, me reagimet shqiptare që përfunduan edhe në faqet e gazetave të huaja, duket se UEFA nuk e mendon njëlloj si FSHF-ja. Fakti që Rili do të drejtojë të martën takimin Milan - Benfika në Ligën e Kampioneve, e vërteton më së miri një gjë të tillë, ashtu si faktin se anglezi do të vazhdojë të gjykojë qetësisht edhe në të ardhmen. Një pozicionim i tillë i UEFA-s rreth kësaj çështjeje afron hipotezën e dënimit të stadiumit për ndeshjet e ardhshme të kombëtares.