Elbasani 1-1 SHKUMBINI

“Ka premio të majme, po fituat me Elbasanin”

Në prag të derbit të së dielës me Elbasanin, skuadra bardhekaltër e Shkumbinit ka mbështetjen maksimale të presidentit Xhavit Ismaili. Ai kërkon nga lojtarët një ndeshje me mobilizim të madh, ku ata duhet të vënë zemrën në fushën, ndonëse mund të jetë e vështirë marrja e fitores. Sipas Ismailit, ndeshja duhet të interpretohet në mënyrën më të mirë të mundshme nga futbollistët peqinas. Në një prononcim për gazetën “Panorama Sport”, kreu i klubit të Shkumbinit, Xhavit Ismaili, ka deklaruar: “Në ndeshjen e radhës me Elbasanin u kam kërkuar djemve të mi që të luajnë një futboll sa më të bukur dhe në fushën e lojës të paraqiten sa më të mobilizuar. Padyshim që takimi është i vështirë, aq më tepër që bëhet fjalë për një sfidë në transfertë. Megjithatë duhet të kemi parasysh se që të fitohet një takim, ai duhet interpretuar mirë në fushën e lojës. Mirëpo përveç kësaj, duhet që të kemi edhe pak fat për të dalë të fituar nga ky takim. Ne duhet të zhvillojmë një ndeshje të fortë për të realizuar objektivin që kemi, fitoren, - thekson Ismaili. - Padyshim që, për këtë ndeshje, ne do të vendosim edhe premio speciale, për ta bërë më interesante atë. Kjo do t’u thuhet dhe lojtarëve përpara takimit me Elbasanin. Këtë vit edhe ne kemi objektivat tona, për të qenë në elitën e skuadrave të Superiores. Ndaj duhet të arrijmë fitoren në çdo ndeshje, pa parë se luhet në fushën tonë, apo në transfertë”.

Shkumbini, mjafton një pikë në Elbasan



Kapiteni Ervin Llani thotë se në derbi do të jetë përballë sulmi më i mirë me mbrojtjen më të mirë

Ekipi i Shkumbinit, nën drejtimin e trajnerit Magani, ka vazhduar rregullisht stërvitjen në përgatitje të përballjes me Elbasanin, duke shfrytëzuar fushat në kompleksin e klubit buzë lumit. Nuk ka munguar përkushtimi i futbollistëve në çdo seancë, e nxitur kjo edhe nga sfida e radhës, e konsideruar gjithnjë e vështirë, pasi në ndeshjet që konsiderohen derbi, asnjëherë nuk je në gjendje ta parashikosh saktë përfundimin e një takimi. Eshtë kapiteni i ekipit, “gardiani” i portës Ervin Llani, që në prononcimin e tij për “Sportin shqiptar” tregon për sfidën e vështirë të ekipit të tij në ndeshjen me Elbasanin.

Për Llanin, Elbasani është një nga ekipet më të mira në 2 3 vitet e fundit, që kërkon ta thotë si duhet fjalën e vet në kampionat. Në katër ndeshjet e para Elbasani nuk e ka provuar ende shijen e humbjes, edhe pse ka luajtur në Vlorë, apo në Tiranë me Dinamon. Dhe për më tepër porta e mbrojtur nga Osmani nuk e ka parë akoma golin e parë. Mjaftojnë këta tregues për të nxjerrë konkluzionin e duhur për kundërshtarin e radhës së Shkumbinit, të dielën e ardhshme. “Nuk ka nevojë për shumë komente për të folur për rëndësinë e këtij takimi. Mjafton të përmendim fjalën derbi dhe kupton rivalitetin e kësaj ndeshjeje, pa harruar që Elbasani luan në fushën e vet dhe i ka bërë një nisje të mirë kampionatit, me 2 fitore dhe 2 barazime. Eshte një ndeshje e vështirë për ne, sepse do të luajmë përballë një ekipi që nuk ka pësuar asnjë gol në 4 ndeshjet e luajtura. Merita është e portierit Osmani dhe e mbrojtësve. U takon sulmuesve të Shkumbinit, që kanë ditur të shënojnë në çdo ndeshje, ta tregojnë veten edhe të dielën përballë portierit Osmani,” shprehet Llani, kapiteni dhe portieri i ekipit të Shkumbinit, duke besuar te forca sulmuese e ekipit te tij. Për Llanin, është një ndeshje e vështirë, ku ai duhet të kënaqet edhe me një barazim, pasi përveç vlerave që ka kundërshtari, Elbasani është më i favorizuar, pasi luan në fushën e vet.

Gjithsesi, Llani beson te grupi i lojtarëve, beson te puna e bërë dhe harmonia në ekip, ku secili futbollist përpiqet të japë më të mirën e vet. Shkumbini do të synojë të paraqisë që në fillim vlerat e veta, ku më shumë se rezultati, do të ketë rëndësi loja e bukur. “Elbasani vjen pas barazimit me Dinamon në Tiranë dhe do të kërkojë fitoren edhe përballë nesh, duke qenë se luan në fushën e vet. Ne do të përpiqemi të luajmë sa më të organizuar, duke u bazuar te forca e grupit e jo tek individët. Eshte një ndeshje derbi dhe jam i sigurt se do të shkojë mjaft mirë në të gjitha drejtimet. Sigurisht, do ta kemi të vështirë përballë një ekipi si Elbasani, që pretendon, por jo të pamundur për të realizuar synimet tona. Do të jetë një ndeshje e hapur deri në fund, ku do të fitojë ekipi që do të bëjë vlerësimin e duhur dhe do të gabojë më pak,” përfundon portieri Ervin Llani.

Magani i falet dyshes sulmuese Mustafai-Rizvanolli në derbi

Sot peqinasit do të udhëtojnë drejt qytetit të Elbasanit për të zhvilluar një takim “derbi” me kushërinjtë e tyre elbasanas. Padyshim që kjo ndeshje paraqet një interes të madh si për objektivat që kanë të dyja ekipet, por edhe për pozicionin e tyre momental në renditje, pasi ndodhen vetëm një pozicion larg njëri-tjetrit. Peqinasit e kanë vlerësuar tërësisht këtë takim dhe presin që në fundin e tij të mos dalin të humbur. Para ndeshjes, trajneri i Shkumbinit, Gugash Magani, është prononcuar për “Panorama Sport” në lidhje me këtë takim. Ai tregohet shumë i kujdesshëm kur komenton këtë sfidë dhe duket se ka përgatitur strategjinë e tij për të dalë me sukses. “Kemi një takim të vështirë, pasi edhe elbasanasit do të dëshirojnë me çdo kusht fitoren. Vetë pozicioni në të cilin ndodhen të dyja ekipet, por edhe objektivat tepër të afërta që kemi, e bëjnë këtë takim tepër interesant, - është shprehur Magani. - Ne e kemi vlerësuar plotësisht këtë ndeshje, ndaj shpresojmë që të mos dalim duarbosh. U kam dhënë lojtarëve detyrat për secilin dhe mendoj se nëse do t’i realizojnë ato, atëherë nuk do të dalim pa rezultat pozitiv nga Elbasani. Detyra jonë është të tregohemi të kujdesshëm në mbrojtje dhe më pas do të mendojmë edhe për vijën e sulmit, ku do të përpiqemi të kundërsulmojmë rrezikshëm të mbështetur nga fiziku dhe shkathtësia e të riut Mustafai si dhe nga etja për gol që ka sulmuesi ynë Rizvanolli, i cili duket tashmë shumë në formë dhe kërkon të shënojë në çdo takim. Përveç tyre, dua të them se tashmë edhe grupi në ekip po konsolidohet plotësisht dhe pritet që të japin sa më shpejt frytet e tyre”. Përsa i përket mungesës së Bizhytit, tekniku mendon se nuk do të ketë ndonjë ndikim, pasi pankina e tij është e mbushur me lojtarë cilësorë. “Mendoj se mungesa e Bizhytit (i skualifikuar për shkak të tre kartonëve të verdhë) nuk përbën ndonjë problem për ne, pasi në ekip ka edhe lojtarë të ashtuquajtur stoli, të cilët presin të japin maksimumin për skuadrën në çdo takim”, përfundoi deklaratën e tij Magani.

Gentian Stojku është heroi i Elbasanit dhe çuditërisht edhe “heroi” i Shkumbinit në derbin e mbyllur 1-1.

Elbasanasi, i cili ka luajtur si për Elbasanin e skuadrën peqinase shënoi një gol për verdheblutë në të 42’, pro edhe një autogol në minutën e 91-të në favor të Shkumbinit, që luajti nga minuta e 58-të me dhjetë lojtarë.

Tashmë, ekipi i Mirel Josës ndodhet në vendin e pestë me tetë pikë e pesë pikë larg Tiranës kryesuese me 13 pikë.

Klement Xhyra i Shkumbinit shkaktoi një faull brenda zonës, e gjyqtari ndërkombëtar Jareci nuk hezitoi. Nga pika e bardhë realizoi veterani Gentian Stojku në minutën e 42-të.

Ndeshja ka pasur shumë momente tensioni si në fushë ashtu dhe në tribuna.

Në minutën e 58-të, talenti peqinas Erion Mustafaj ndërhyri ashpër kundër mbrojtësit Endri Vrapi dhe Jareci nuk nguroi të nxirrte kartonin e kuq, ndërkohë që mbrojtësi i Kombëtares shqiptare u largua me barelë nga tapeti i “Ruzhdi Bizhutës”.

Verdheblutë patën për më shumë se 20 minuta edhe shërbimet e “Arushës”, Skerdi Bejzade, i cili zëvendësoi sulmuesin Oriand Abazaj, por pa mundur që të realizojë në portën e Llanit.

Kur të gjithë në stadium prisnin të festonin fitoren e tretë seznale të 2-herë kampionëve të Shqipërisë, mbrojtësi i Shkumbinit, Erald Turdiu hodhi një top në zonë, e në rrëmujë e sipër Stojku në të 91’ e drejtoi sferën në kuadratin e portierit Osmani, duke befasuar portierin e dhe ultrasit verdheblu. Pas përfundimit të takimit tifozët shfaqën pakënaqësi për administrimin e lojës së Elbasanit nga ana e trajnerit Mirel Josa.

Shkumbini, pas pikëve të plota në shtëpi, 9 të tilla, morri edhe pikën e parë nga dy ndeshjet në transfertë edhe pse luajti me 10 lojtarë.