JAVA 1 / SHKUMBINI 4-1 Bylis

Java 1, 24.08.2008

SHKUMBINI - Bylis

Gjyqtaret: S.Jareci, Biçaku, Qirici


Me date 24 gusht fillon superliga shqiptare ku Shkumbini jone i zemres pret ne shtepi bylisin...Shpresojm qe ndeshja e pare ne shtepi te flasi per ngjyrat bardhekalter...

Pashja: Ndaj Bylisit, për më të mirën

Mbrojtësi shpreson në një start të mbarë të sezonit me skuadrën peqinase

Këtë vit, ndonëse nuk do të ketë të njëjtin privilegj, megjithatë kjo nuk do ta pengojë aspak që në çdo takim të kërkojë nga vetja, por edhe shokët e ekipit që të japin maksimumin. Është fjala për një ndër lojtarët më stabël në vitet e fundit në formacionin peqinas, mbrojtësin e majtë, Lorenc Pashja. Në këtë prag kampionati lojtari ndihet i gatshëm për ta nisur me “këmbën e duhur” kampionatin, duke kërkuar fitore në takimin kundër Bylisit. Në një prononcim për “Panorama Sport”, Pashja do të shprehej: “Kemi afro dy muaj që kemi bërë një përgatitje vërtet serioze dhe me shumë përkushtim për të ardhur në këtë fillimkampionati. Mendoj se ekipi ka të gjithë organikën e duhur për të arritur rezultate sa më të mira në çdo takim, - thotë mbrojtësi peqinas. - Megjithatë, duke u përqendruar në takimin ndaj Bylisit, mendoj setakimi nuk do të jetë i lehtë, pasi edhe ekipi mik nuk do të udhëtojë për
pushime, por për të luftuar dhe për të arritur diçka në Peqin. Megjithatë, ne e fillojmë këtë kampionat në fushën tonë dhe përpara tifozëve tanë që na kanë përkrahur në çdo kohë ndaj dhe detyra jonë është të mos i zhgënjejmë ata. Ne jemi përgatitur dhe kemi marrë të gjitha detyrat nga drejtuesit tanë dhe nëse do të arrijmë t’i përmbahemi atyre, padyshim që fitorja do të jetë e jona. Do të shpresojmë që gjithçka ta zhbllokojmë shpejt, pasi çdo gjë bëhet edhe më e lehtë në vazhdimësi të takimit. Në këtë pragkampionati dua t’i uroj ekipit dhe të gjithë shokëve të mi sa më shumë fitore dhe rezultate pozitive si dhe të shpresojmë që ky të jetë një vit me suksese për ne”, ka përfunduar ish-kapiteni Pashja.

Branica: Jemi gati për startin

Në këtë javë pragkampionati duket se ekipi peqinas i Shkumbinit ka bërë të gjitha përgatitjet e duhura për të nisur mbarë
kampionatin e ri të futbollit. Duket se kushtet dhe merkato kanë kënaqur drejtuesit e klubit peqinas, të cilët tashmë presin
vetëm momentin e startit për të shprehur çdo gjë të mirë nga një punë dymujore më se voluminoze. I këtij mendimi është zv/
trajneri i Shkumbinit, Sokol Branica, i cili në një prononcim për gazetën “Panorama Sport” do të shprehte edhe këndvështrimin
e tij për gjendjen e ekipit. “Gjatë këtyre muajve kemi bërë përgatitje të kënaqshme ku një fazë prej një muaji e kemi zhvilluar
në kushte tepër komode në Strugë. Kjo do të jetë shumë e vlefshme për të pasur një vazhdimësi të mirë në kampionat, -thotë Branica. - Asnjë ekip nuk mund të quhet i dobët apo i forcuar, pasi starti ynë është i njëllojtë. Shpresoj që ne jemi gati
për ta nisur këtë kampionat dhe për të dhënë më të mirën në të. Ne do të përpiqemi që në fillimin e tij të bëjmë më të mirën dhe të
arrijmë fitore. Ekipi i Bylisit nuk duhet nënvlerësuar ndaj dhe ne kemi punuar me djemtë për të treguar kujdes dhe për të mos
pasur asnjë lloj nënvlerësimi. Këtë kampionat do ta nisim në fushën tonë, ku presim që si gjithnjë të kemi të pranishëm tifozët
tanë ndaj dhe nuk na lejohet që t’i zhgënjejmë në këtë start. Duke parë edhe shortin, na duhet që të shfrytëzojmë në maksimum fazën e parë për të marrë sa më shumë pikë nëse duam që të arrijmë objektivat tona”, ka përfunduar tekniku Branica.

Dervishi: Do të luaj ku të jetë nevoja

Edhe këtë vit duket se vija e sulmit do t’i besohet Rizvanollit dhe Norës, çka do ta kalojë sulmuesin peqinas Roland Dervishi në rolin e mesfushorit të krahut. Megjithatë, kjo nuk e bën aspak pesimist lojtarin për të mos shprehur gatishmërinë e tij t’i shërbejë ekipit në çdo rol që do t’i besohet nga tekniku Magani. Në prag të takimit me Bylisin, sulmuesi shprehet entuziast dhe kërkon që fitorja të jetë kryefjala e ndeshjes. Në një prononcim për “Panorama Sport”, ai thotë: “Në këtë prag të kampionatit mendoj se jemi gati për t’i bërë një hapje dinjitoze këtij kompeticioni. Kemi gjithë këtë kohë që jemi përgatitur intensivisht dhe tani dëshirojmë që të mos zhgënjejmë,duke pasur parasysh që luajmë edhe në fushën tonë, përpara tifozëve tanë. Përsa i përket të luajturit në sulm apo në mesfushë, dua t’ju them se kjo nuk përbën asnjë problem për mua, pasi e rëndësishme është që t’i shërbej ekipit në cilindo repart që të caktohem. Rezultati i përgjithshëm, pra fitorja, është parësore. Çdo lojtar do të dëshironte të shënonte sa më shumë gola, këtë dua dhe unë. Mirëpo, nga ana tjetër, meqë kuptohem shumë mirë me lojtarët e vijës së sulmit,mendoj se kjo nuk më pengon aspak që të kem edhe unë shanse për të shënuar. Ndaj Bylisit do të dëshiroja që të bindnim me lojë, por edhe me rezultat, duke u munduar të kënaqim kështu drejtuesit dhe tifozët, por edhe duke justifikuar djersën tonë”.

Peqinasit e nisin me goleadë

SHKUMBINI 4-1 Bylis

Golat : Nora 50’, Shenaj 72’, Ramazani 86’, Mustafai 90’/Nenaj 91’

SHKUMBINI: Llani, Gallo, Shameti, Dervishi (Gërxho 42’),Shenaj (Ramazani 77’), Byzhyti, Turdiu (Mustafai 46’),Nora, Rizvanolli, Grami.
Trajner: Gugash Magani

BYLIS: Egbo, Driza, Muça (Kuçi 75’), Kapaj, Novi (Besho63’), Hodo, Kule, Nenaj, Bakiu (Stafa 46’), E. Dalipi, K.Dalipi. Trajner: Faruk Sejdini

GJYQTARET: S. Jareci, E. Biçaku, G. Qirici

KARTONË TË VERDHË: Nora/Egbo, Hodo
KARTONË TË KUQ: Rizvanolli/Driza

Ashtu sikurse pritej në Peqin, java e parë e kampionatit të 70-të kombëtar ka nisur me këmbë të mbarë dhe me shumë “bereqet”. Në një atmosferë tepër të ngrohtë e në prani të një numri të kënaqshëm tifozësh, Shkumbini ka korrur një fitore të pastër ndaj Bylisit 4-1, por edhe bindëse me lojën, në veçanti të pjesës së dytë. Edhe pse te peqinasit ka pasur shumë ardhje e largime, megjithatë përgatitorja i ka dhënë më së miri frytet e saj, ku ekipi duket se i ka konsoliduar pozicionet në të gjitha repartet. Ndeshja ka nisur thuajse e barabartë, ku në pjesën e parë të dyja skuadrat kanë studiuar njëra-tjetrën.Mbrojtja ballshiote i ka bërë
ballë më së miri sulmeve të shumta të bardhekaltërve,ndonëse u mungonte organizimi dhe forca e duhur. Kryefjala e kësaj pjese kanë qenë aksionet e Norës, Dervishit dhe Turdiut, të cilët janë paraqitur mjaft mirë në ndeshjen e parë në Peqin. Megjithatë, sulmuesit nuk kanë ditur se si ta gjejnë rrugën drejt rrjetës. Nga ana tjetër, Bylisi ka menduar vetëm për mbrojtjen, duke mos zbritur asnjëherë në portën peqinase. Ndërkaq, takimi është ndërprerë tri minuta nga kryesori Jareci, i cili u ka dhënë kohë lojtarëve të shuajnë etjen. Më pas në pjesën e dytë ka ndryshuar gjithçka, ku peqinasit kanë gjetur rrugën e rrjetës me një gol të Norës, i cili ia dedikoi atë vajzës së tij. Mirëpo ky qe veçse fillimi, sepse peqinasit shënuan edhe tri herë të tjera,duke katërfishuar kështu rezultatin,me gola që mbajnë firmat e Shenajt (shënon një eurogol, duke përfituar edhe nga dalja jo e sigurt e portierit
Egbo) dhe të të rinjve Ramazani e Mustafai, për të treguar se peqinasit kanë lojtarë për të triumfuar në të ardhmen.Minuta e fundit ka qenë aksioni i vetëm i miqve në sulm, të cilët arritën të gjenin golin pas një nënvlerësimi nga peqinasit,duke u ngushëlluar
me të në këtë udhëtim të gjatë të tyre. Ky takim ka treguar se Shkumbini do të jetë një kockë e fortë për çdo ekip këtë sezon.
Gjithashtu ka shërbyer për të nxjerrë në pah gjerat që duhen ndrequr, veçanërisht në fazat e organizimit të aksioneve,ku ende mungon zhdërvjelltësia e tyre.

Kartoni i kuq që solli polemika
Sulmuesi i Shkumbinit, Erjon Rizvanolli, bën presing në mbrojtjen mike dhe përplaset me mbrojtësin Muça. Megjithëse të dy lojtarët janë shumë miq me njëri-tjetrin dhe përplasja ndërmjet tyre qe mëse e zakonshme, gjyqtari kryesor Sokol Jareci akordon një faull në favor të Bylisit dhe pa asnjë paralajmërim nxjerr menjëherë karton të kuq për sulmuesin peqinas. Një episod që u ndoq me shumë polemika në fushën e lojës, për shkak të protestave nga skuadra e Shkumbinit, që nuk ishte dakord me vendimin e arbitrit.

Gugash Magani : “Më kënaqi kolektiviteti”
“Ndeshja e sotme ka pasur dy fytyra: pjesa e parë ishte joefektive dhe lojtarët u frenuan disi nga loja sulmuese; ndërsa në të dytën takimi ishte tërësisht efektiv, pasi ekipi doli në lojën e tij dhe bindi edhe me gola. Mendoj se kemi ende punë si në fazat organizative, por edhe në ato sulmuese. Por ana më pozitive është se në këtë skuadër ka kolektivitet, e jo thjesht titullarë, pra
një grup kompakt”.

Faruk Sejdini : “Na ndëshkoi shpërqendrimi”
“Në pjesën e parë luajtëm më mirë dhe takimi qe shumë më i ekuilibruar. Mirëpo në pjesën e dytë pësuam plot katër gola,të cilët mendoj se erdhën vetëm nga momente pakujdesie e humbje përqendrimi nga ana e lojtarëve, çka nuk duhet të ndodhte në asnjë mënyrë. Peqinasit e merituan fitoren dhe i uroj suksese. Nga ky takim duhet të nxjerrim patjetër gabimet tona, për t’i ndreqim në sfidën e ardhshme”.

Nga Panorama-Sport