JAVA 22 / Dinamo - SHKUMBINI

Dinamo shmang krizën me fitoren ndaj Shkumbinit


Goli i Poçit siguron fitoren minimale dhe vendin e parë në fund të fazës së dytëSkuadra
e Dinamos ka arritur të harrojë përkohësisht problemet e javëve të
fundit, duke arritur një fitore 1-0 ndaj Shkumbinit për të ruajtur
vendin e parë në renditjen e Superiores edhe në fund të fazës së dytë.
Ekipi i drejtuar nga Ilir Daja ka përballuar me sukses krizën e kohëve
të fundit, duke rigjetur fitoren pas katër ndeshjesh "thatësirë".
Pavarësisht pozitave të dy skuadrave në renditje, ndeshja nuk ka qenë
aq e lehtë për dinamovitët, pasi Shkumbini kërkonte në çdo mënyrë pikë
në këtë sfidë delikate. Ndaj aksionet e para kanë qenë pikërisht të
peqinaseve, të cilët rrezikuan që në minutën e 6-të me anë të Stojkut,
i cili gjuan fluturimthi në hyrje të zonës, por topi grushtohet
saktësisht nga Kotorri që nuk lejon të preket rrjeta e portës së tij.
Dinamo përpiqet të reagojë, por dyshja e sulmit Kuli-Pejiç nuk arrin të
gjejë hapësira në mbrojtjen peqinase ku Xhyra shoqëron në çdo hap
sulmuesin e rrezikshëm kroat. Për të zgjidhur këtë situatë të vështirë
mendon Poçi, i cili përfiton nga një kombinim i shkëlqyer i Abraham dhe
Ferrajt në krahun e majtë për të dërguar topin në rrjetë në minutën e
21-të. Avantazhi ndihmon Dinamon, që tashmë e ka më të thjeshtë të
luajë në sulm, pa pasur shqetësimin e mungesës së golit. Pejiç dhe Kuli
provojnë në të gjitha mënyrat të kalojnë Llanin, por gardiani i
peqinasve tregon talentin e tij me disa devijime spektakolare që
shpëtojnë portën nga gola të sigurt. Në pjesën e dytë, është Shkumbini
që provon me ngulm t‘i afrohet golit të barazimit, por peqinasit e kanë
shumë të vështirë t‘i afrohen zonës dinamovite, pasi Pisha kontrollon
qetësisht çdo iniciativë të sulmuesve miq. Të vetmet rreziqe për portën
e Kotorrit vijnë nga goditjet standarde, ku Kuçi në minutën e 74-t i
afrohet shumë golit, por ndërhyrja e gardianit të Dinamos shpëton
situatën. Një minutë më vonë, pas një kundërsulmi në krahun e djathtë
të Ishkës, Pejiç ka mundësi të shënojë golin e dytë, por gjuajtja e tij
me kokë në një pozicion të favorshëm kalon jashtë kuadratit. Në minutën
e 91-të vijnë edhe drithërimat e fundit në portën e Dinamos, kur Nexha
gjen në zonë Xhyrën, por gjuajtja me kokë e mbrojtësit shtatlartë të
peqinasve përfundon jashtë kuadratit. Me këtë sukses, Dinamo siguron
vendin e parë në renditje dhe një kalendar më të favorshëm nga
ndjekësit, duke filluar që në javën e ardhshme kur do të ketë përballë
Skënderbeun. Megjithatë, blutë kanë shfaqur përsëri probleme në lojën e
tyre sulmuese, duke bërë të harrohen goleadat e fazës së parë.