JAVA 11 / SHKUMBINI - Dinamo

Ndaj Shkumbinit, pa tre titullarë
Kartonët e marrë nga Dinamo në ndeshjen ndaj Partizanit i kanë pezulluar sëtepërmi blutë për transfertën e kësaj të shtune ndaj Shkumbinit. Janë tre lojtarët e bluve të skualifikuar, që nuk do të jenë të pranishëm në Peqin. Veç Abrahamit, që doli me karton të kuq në takimin e së mërkurës mungojnë edhe Allmuça me Pejiç, që ndaj Partizanit mbushën numri 3 të kartonëve të verdhë. Tre mungesa të rëndësishme që e vënë në vështirësi trajnerin Canaj, për të ndërtuar formacionin edhe pse alternativat nuk mungojnë dhe janë mjaft cilësore. Ndaj Shkumbinit ka edhe rikthime, siç është Ishka. Mbrojtësi ka shlyer pezullimin njëjavor për shkak të kartonëve dhe është i gatshëm për t’u rikthyer në formacion, ndërkohë që mbetet në dyshim Eleandro Pema, për shkak të dëmtimit në dorë.

Dinamo kënaqet vetëm me një barazim pa gola në fushën e Shkumbinit dhe humbet shansin për të përfituar nga takimet e forta të kundërshtarëve direkt në krye të renditjes. Nga ana tjetër, peqinasit konfirmojnë momentin e tyre të mirë, pas fitores me Besën dhe barazimit në Elbasan. Skuadra e drejtuar nga Magani e mbyll fazën e parë të Kategorisë Superiore me shtatë ndeshje radhazi, pa pësuar humbje: tre fitore dhe katër barazime të regjistruara.

Vendasit e nisin më mirë lojën dhe në minutat e para është Dalipi që provon të rrezikojë portën e Kotorrit, i cili pret pa vështirësi. Dinamovitët provojnë të reagojnë me një kundërsulm të shpejtë të Kulit dhe Çaushajt, të cilët hezitojnë në momentin final. Pak çaste më vonë është sërish i riu Çaushaj që provon, por topi përfundon mbi portën e mbrojtur nga Llani. Nga krahu tjetër, Klevis Dalipi, vazhdon të jetë rreziku kryesor përpara portës së ekipit kryeqytetas, por edhe pse është shfaqur i vetëm me portierin dinamovit, elbasanasi nuk arrin të gjejë rrjetën. Me kalimin e minutave, të besuarit e teknikut Agim Canaj kanë fituar siguri në lojën e saj, por janë përballur me "barrikadën" e Llanit. Brenda 60 sekondave "gardiani" i Shkumbinit ka frenuar dy gjuajtje, fillimisht të Çaushajt e më pas devijimin me kokë të Ishkës. Megjithatë, ndërhyrja deçizive e portierit ka ardhur në minutën e 39-të, kur është gjendur i vetëm me Plakun. Sulmuesi i Dinamos ka pasur shansin më të mirë për të realizuar, por Llani gjen në mënyrë perfekte kohën e ndërhyrjes dhe e largon sferën me këmbë. Fraksioni i dytë i lojës ka qenë tërësisht i ndryshëm nga 45 minutat e para: presingu i Shkumbinit rritet dhe dinamovitët janë detyruar të qëndrojnë shumë të mbyllur në mbrojtje. Situata e krijuar ka "hedhur në erë" planet e miqve, që e kanë parë veten të mbyllur në gjysmëfushë, për të mbrojtur barazimin. Sulmet e vazhdueshme të peqinasve, të drejtuara nga Dalipi, por edhe nga Stojku e Pashaj, nuk janë konkretizuar dhe në përfundim të dyja skuadrat janë kënaqur vetëm me nga një pikë.