Dëshira e Ismailit: Më sillni Kupën!

Shkumbini/Skuadra peqinase ka marrë përgëzimet e presidentit
Shkumbini vazhdon i qetë përgatitjet në kuadër të
përballjes së ditës së shtunë, kur bardhekaltërit
do të luajnë përballë Partizanit të Duros. Djemtë e
Maganit vijnë në këtë sfidë pas një serie mjaft
pozitive, si në Kupë, ashtu edhe në kampionat.
Ata u kualifikuan për në gjysmëfinalen e kompeticionit
të dytë kombëtar, duke eliminuar Besën e
Kavajës, ndërsa në fundjavë morën një barazim
të merituar në derbin ndaj Elbasanit. Në sfidën e
para një jave, që u zhvillua në Kavajë, presidenti i
Shkumbinit Xhavit Ismaili nuk ishte i pranishëm për
arsye se kishte udhëtuar për të ndjekur takimet e
Ligës së Kampionëve, prandaj ai ka shfrytëzuar
ditën e martë që të përgëzonte futbollistët e
skuadrës, për të cilët ka shpenzuar jo pak gjatë
këtij sezoni. Njëshi i klubit peqinas ka falënderuar
ekipin dhe drejtuesit e Shkumbinit për arritjen e
gjysmëfinaleve të Kupës, duke shtuar se do të
dëshironte që ta shihte skuadrën e tij deri në finale
të kompeticionit. “Kemi arritur me meritë që
të gjendemi në këto pozita të favorshme për të
shpresuar edhe për më tej. Prandaj po ju kërkoj
që të sillni trofeun e Kupës në Peqin”, është shprehur
presidenti Ismaili kundrejt futbollistëve, duke i
premtuar se mbështetja nuk do t’u mungojë asnjëherë.
Padyshim, në rast të marrjes së trofeut,
për ta do të ketë diçka ekstra në aspektin financiar.
Presidenti Ismaili, gjithashtu ka përgëzuar
lojtarët edhe për pikën e marrë ndaj Elbasanit në
derbi, sfidë që e ka ndjekur vetë në “Ruzhdi Bizhuta”,
bashkë me deputetin Sula, i cili është edhe
sponsor i kësaj skuadre. Pas takimit me presidentin,
skuadra ka vijuar normalisht stërvitjen në
kompleksin sportiv “Te pishat”. Fatmir Ahmeti
Panoramasport