Llani është në delir: Po jetojmë ëndrrën Evropiane

Pas kualifikimit të Shkumbinit
për në gjysmëfinalen e
Kupës së Shqipërisë, në Peqin
festa ka zgjatur shumë. Tashmë,
objektivi i është më pranë,
ndërkohë që një nga protagonistët
e fitores me Besën,
kapiteni i Shkumbinit, portieri
Ervin Llani, ka treguar për
“Panorama Sport” emocionet
e përjetuara në Kavajë.
Mjaft i lumtur e buzagaz për
këtë sukses, Llani pa dyshim
ka qenë mjaft i rëndësishëm
për ekipin, falë pritjeve që
bëri, duke e ruajtur portën të
paprekur. Modest në prononcimin
e tij, tiranasi i Shkumbinit,
ndër të tjera thotë
se kualifikimi ishte plotësisht
i merituar. “Pas
ndeshjes së parë, ku barazuam
1-1, ishte e qartë që ne
duhet të shënonim të paktën
një gol në Kavajë, për të
shpresuar kualifikimin.
Gjithashtu, duhet të ishim të
kujdesshëm në mbrojtje, për
të mos pësuar gol. Në këtë
aspekt një meritë të madhe,
normalisht, ka edhe reparti i
mbrojtjes, që personalisht ma
bëri paksa më të lehtë detyrën.
Në disa raste vërtet e kam
menduar ndëshkimin, por
thjesht kam bërë detyrën me
ndërhyrjet e mija, që shpesh
quhen si mrekulli të portierëve”,
është shprehur portieri
i Shkumbinit. Më tej, 25-
vjeçari falënderon shokët,
duke ia dedikuar këtë sukses
kolektivitetit që ka ekipi peqinas.
Ai nënvizon pastaj investimet
që janë bërë këtë sezon,
për të cilat është përligjur
edhe ky prezantim i deritanishëm.
“Mendoj se në këtë sezon
jemi më pranë realizimit
të ëndrrës evropiane, e sidomos
tani kur mund të
shpresojmë në të dyja frontet,
kampionat e kupë. Për këtë,
meritë kanë të gjithë, duke filluar
nga drejtuesit e klubit,
puna e palodhur e trajnerëve
dhe për ta mbyllur te loja kolektive
që ka bërë skuadra. Me
këtë rast, si kapiten i ekipit,
dua t’i falënderoj drejtuesit
dhe shokët, që në çdo ndeshje
kanë dhënë maksimumin”,
përfundoi Llani.
Derbi në prag - Natyrisht,
që festa e kualifikimit tashmë
ka kaluar dhe Shkumbinit do
t’i duhet të mendojë për një
tjetër sfidë të rëndësishme, siç
është ajo derbi kundër Elbasanit,
që do të luhet të dielën
në “Ruzhdi Bizhuta”. Dje
skuadra i është kthyer stërvitjes,
e cila ka qenë më e lehtë
se ditët e tjera. Trajner Gugash
Magani, që po drejton me
shumë sukses Shkumbinin,
nuk ka dashur t’i lërë asnjë
ditë pushim lojtarët. Kjo tregon
rëndësinë që ai i ka dhënë
derbit me Elbasanin dhe kampionatit
në tërësi, ku ekipi
bardhekaltër është ende në
lojë për vendin e tretë, që të çon
në Kupën UEFA. Në përballjen
e së dielës, ekipi pritet të
jetë i plotë. Fatmir Ahmeti
“Kemi ekip luftëtarësh”
Ka munguar në ndeshjen me Besën, bashkë me Roland Dervishin dhe Erion Rizvanollin, por
kurrsesi në festën e improvizuar në një nga lokalet e qytetit të Peqinit. Sulmuesi gjirokastrit, Arlind
Nora, i entuziazmuar nga kualifikimi i Shkumbinit, ka lëshuar një batutë për shokët. “Kemi një ekip
luftëtarësh, ku të gjithë luajnë si ‘ujqër’. Kush e mendonte Shkumbinin të skualifikuar, mori një sinjal
të qartë”, ka thënë Nora për “Panorama Sport”, që mes emocionesh e ka dëgjuar në radio ndeshjen
e luajtur në Kavajë. Ndërkohë, tifozëria peqinase e ka pritur skuadrën në sheshin e qytetit, mes
brohoritjeve për këtë sukses. I vetmi që ka munguar në festën peqinase ka qenë presidenti i
Shkumbinit, Xhavit Ismaili, i cili ndoqi në “Old Traford” sfidën Mançester Junaitid – Inter. F.Ahmeti
PANORAMA SPORT