Ervin Llani, 400 minuta pa pësuar gol

Nuk është ndonjë shifër rekord, por kjo tregon se Shkumbini po ecën në rrugën e duhur

Që nga 18 tetori, kur Shkumbini barazonte në “Loro Boriçi”, 2 2 me Vllazninë vendëse, kanë kaluar shumë javë, por portieri Ervin Llani ka ditur t’i vërë “kyçin” portës. Këtë e bëri realitet në ndeshjen e fundit me Flamurtarin në Vlorë në vazhdimësi të takimeve të tjera, si me Tiranën, Partizanin dhe Apoloninë.

Pra, janë rreth 400 minuta pa pësuar gol, duke qenë në portë 25 vjeçari tiranas, ish-titullari i ekipit Shpresa. Në sezonin e kaluar, Llani në ruajtje të portës së Shkumbinit, u cilësua një nga portierët më në fortë të kampionatit, duke rënë në sy të specialistëve dhe të trajnerit Han. Llani është nga të rrallët futbollistë që i luan të plota të gjitha ndeshjet e kampionatit dhe për fazën e parë ai i ka luajtur të 11 ndeshjet si titullar, pa u zëvendësuar.

Nëpërmjet stërvitjes që bën çdo ditë me trajnerin Ballhysa, por edhe individualisht, ai shërben si një shembull për të tjerët në ekip. “Kam gjetur veten te Shkumbini, ku aktivizohem prej 4 sezonesh dhe që duhet pranuar se bëhet një punë e mirë. Mund ta quaj një privilegj që stërvitem çdo ditë nga një trajner pasionant si Arnit Ballhysa, i cili më parë ka punuar me emra të njohur të portës shqiptare, si Kotorri, Dine, Billa, Osmani etj.

Nëse nuk kam pësuar gol për rreth 400 minuta dhe në 4 ndeshje radhazi, nuk është merita ime, por e gjithë ekipit,” - shprehet Llani, i cili ka arritur të marrë edhe shiritin e kapitenit, duke ditur ta justifikojë plotësisht. Përpara takimit me Flamurtarin, ai arriti ta mbajë fjalën për të mos lejuar gol në atë takim përballë vlonjatëve. Pika e marrë në barazimin pa gola e gëzoi, duke e konsideruar rezultat pozitiv dhe në vazhdimësi të paraqitjeve të mira për fazën e parë.

“I bëmë një mbyllje të mirë fazës së parë, duke realizuar objektivin e vënë në Vlorë, për të mos u larguar pa pikë nga fusha. Nga ana tjetër, në njëfarë mënyre, mbajta premtimin, duke e ruajtur edhe në këtë ndeshje pa gol. Ishte një pikë që e merituam dhe që na mban moralisht si duhet, duke qenë në vendin e tretë pas Vllaznisë,” - shton portieri i Shkumbinit.

Llani kërkon që të ruhet ritmi edhe për fazën e dytë, duke filluar nga ndeshja e parë me ekipin e Bylisit të dielën e ardhshme. Ai di ta vlerësojë kundërshtarin e radhës, i cili javën e fundit arriti të fitojë ndaj Dinamos kampione, duke kërkuar që ekipi i tij të tregojë vlerat e veta më të mira.

“Kemi ditë që po përgatitemi për ndeshjen me Bylisin, i cili sigurisht nuk është më ai i fazës së parë. Javën e kaluar ky ekip diti të dalë fitues përballë Dinamos dhe kjo nuk është pak. Ne do të kërkojmë rezultatin pozitiv të dielën dhe në fakt ky më intereson më shumë,” - përfundon portieri i Shkumbinit, Ervin Llani.



Autori: Ali Hallulli
Data: 21/11/2008

Sporti shqiptar