Magani: Shkumbini të finalizojë më mirë

Trajneri Gugash Magani kërkon të shfrytëzohen mirë rastet, sepse gabohet shumë
Shkumbini e ka mbyllur javën e parë stërvitore të shtunën, duke zhvilluar një takim miqësor me ekipin modest të Gramshit, që luan në kategorinë e dytë. Drejtuesit peqinas zgjodhën një kundërshtar të këtij niveli, për të pasur mundësi më shumë në konkretizimin e synimeve të vëna pas një jave me ngarkesë në planin fizik e atë psikologjik, ngaqë ai vinte pas humbjes në fushën e vet me Lushnjën. Rezultati i këtij takimi miqësor doli në plan të dytë, siç ndodh rëndom në të tilla ndeshje, por duhet përmendur se u fitua nga Shkumbini me dy golat e të riut Mustafaj, të shënuar nga një për secilën pjesë lojë. Ka qenë një miqësore që është mirëpritur nga futbollistët, duke e shfrytëzuar si duhet javën para ndeshjes për shkak të ndërprerjes së kampionatit. Edhe pse është luajtur përballë një ekipi inferior, interesimi për këtë takim ka qenë i madh dhe që është vlerësuar si duhet nga ana e Shkumbinit. Nuk munguan në këtë takim për ta ndjekur nga afër drejtuesit më të lartë të ekipit, presidenti Ismaili dhe kryebashkiaku Rrushi. Në këtë miqësore Magani kërkon të bëjë një konkluzion të punës njëjavore, për të parë edhe reflektimin pas humbjes me Lushnjën në kampionat. Siç merret vesh, trajneri Magani në përgjithësi ka mbetur i kënaqur nga loja e ekipit e nga zbatimi i detyrave të dhëna, por pa e fshehur pakënaqësinë për futbollistë të veçantë që në disa raste, ndonëse pa qëllim, bëhen shkaktarë të mos finalizimit të duhur, duke u shpërdoruar raste përpara portës. Gjithsesi, vlerësimi për këtë miqësore ka qenë pozitiv dhe i ka shërbyer jo pak trajnerit Magani. Pjesa e parë ka qenë më e bukur e më me rivalitet, pasi u aktivizuan futbollistët më të mirë nga të dy ekipet dhe trajneri Magani mendoi një skuadër të ishte sa më afër asaj që do të paraqitet në Shkodër përballë Vllaznisë në ndeshjen e radhës, ku Shkumbinit do t’i mungojnë për shkak kartonësh Turdiu e Nora. Në pjesën e dytë Magani ka shfrytëzuar mundësinë për të dhënë hapësirë edhe futbollistëve të tjerë që ka në dispozicion dhe sidomos futbollistëve të rinj, si Shazivari, Lluca, Balliu apo Kateshi, që u përpoqën ta justifikojnë me lojën që zhvilluan në minutat e aktivizuara. Në fund të takimit pati vend për t’u aktivizuar edhe futbollistët e skualifikuar Nora e Turdiu, të cilët nuk do të jenë pjesë e ekipit në ndeshjen me Vllazninë. E diela ka qenë pushim, për t’u rikthyer dje pasdite në seancën e parë në përgatitje të ndeshjes me Vllazninë në Shkodër.