Magani përmend një emër, Erion Mustafajin

Magani përmend një emër, Erion Mustafajin

Rizvanolli ishte i vetmi sulmues i Shkumbinit që nuk e kishte gjetur rrugën e rrjetës në dy javët e para të kampionatit, për të pritur takimin me Teutën, që ta shënojë emrin në listën e golashënuesve. Ishte goli i tij që mbeti i vetëm deri në fund, por që pati vlerën e tri pikëve në atë takim. Në këtë takim spikati edhe talenti 19 vjeçar Erion Mustafaj, të cilit të shtunën i mungoi vetëm fati për të shënuar. Të gjithë të pranishmit janë entuziazmuar nga loja e Mustafajt, pasi ai ka ditur nëpërmjet veprimeve të tij të bëjë më të mirën në fushën e lojës, duke qenë vazhdimisht shqetësimi kryesor i mbrojtjes durrsake. Nëpërmjet këmbëve të tij erdhi goli i vetëm i Shkumbinit, kur ai preferoi të pasojë për Rizvanollin, që nuk e pati aspak të vështirë ta shoqërojë topin drejt rrjetës. “Dua të theksoj se në takimin me Teutën në Peqin lojtari më i miri në fushë për mua ishte Mustafaj. Duke i njohur mirë cilësitë e tij sportive, mendoj se ky futbollist i talentuar duhet të jetë pa diskutim në ekipin Shpresa e më vonë në ekipin tonë kombëtar,” - deklaron Magani, duke tërhequr vëmendjen e specialistëve e të stafit të ekipeve kombëtare për këtë futbollist me të dhëna të shkëlqyera. Për Maganin, ky futbollist ka nevojë për pak përkrahje, sepse e meriton, ashtu siç e ka merituar vendin e titullarit në formacionin e Shkumbinit.