‘E vërteta e ‘atentatit’ të Bejzades në Qaf Krrabë’

“Sulmuesi ishte provokatori i incidenteve. Sajoi gjithçka”

Presidenti i Shkumbinit, Xhavit Ismaili, ka reaguar menjëherë sapo është njohur në media me “atentatin” që i ka ndodhur Skerdi Bejzades në Qafë Krrabë, duke zbardhur ngjarjen. I kontaktuar nga “Panorama Sport”,
Ismaili ka saktësuar se Bejzade ka trilluar gjithçka dhe se nuk ka pasur asnjë atentat ndaj sulmuesit, siç ai ka pretenduar. “Bejzade ka sajuar gjithçka dhe ka qenë ai provokatori më i madh i incidenteve të ndodhura në stadium dhe jashtë tij, tha fillimisht Shkumbini. Gjithçka nisi pas atij faulli banal, që i shkaktoi Byzhytit, duke e detyruar të dalë nga loja. Në përfundim të takimit, Bejzade ka shkuar te Byzhyti, duke u shtirur sikur i kërkonte falje, por lojtari ynë nuk i pranoi faljet e tij. Në këtë moment, Bejzade e ka goditur me grushte Byzhytin, duke shkaktuar edhe reagimin e pankinës së Shkumbinit, por edhe të deputetit të Peqinit,Dashnor Sula. Ndërkaq, është goditur edhe doktori i skuadrës, ashtu si edhe Byzhyti sërish nga lojtarë të Elbasanit”.
Atentati i sajuar
Përsa i përket “incidentit” me sulmuesin, Ismaili ka sqaruar: “Ne nuk patëm mundësi të sqaroheshim me Bejzaden në stadium, për atë që ndodhi. Gjithsesi, krejt rastësisht e kemi takuar Bejzaden
rrugës duke u kthyer për në Tiranë. Madje, ka qenë edhe Dabulla me makinë pas nesh që ishte dëshmitar, - vijon Ismaili. - Deputeti Sula, i cili ishte në shoqërinë time, ka kërkuar ta sqarojë sulmuesin e Elbasanit, i cili ka provokuar të gjitha incidentet në fushë, duke i bërë me shenjë që të hapë krahun me makinë. Mirëpo, Bejzade nuk ka ndalur dhe i ka dhënë gaz makinës, duke ikur. Ne e ndoqëm një pjesë rruge me makinë, por e pamë që ai nuk denjoi të ndalonte dhe më pas ndaluam. Kjo ka qenë e gjitha, Bejzade ka trilluar
gjithçka, pasi nuk ka pasur asgjë më shumë sa thashë më lart”.
Situata e nderë
Ismaili ka qenë gjithashtu i indinjuar për pritjen që i ka rezervuar klubi i Elbasanit dhe provokimet gjatë 90
minutave, që duket se janë bërë në bazë të një strategjie. “Mendoj se klubi kishte futur një frymë negative te tifozët para takimit. Edhe Bejzade u nxit nga gjithashtu, nga publiku për të bërë të tilla gjeste. Personalisht, kam bërë një punë të madhe me skuadrën si edhe tifozët e Shkumbinit, në mënyrë që të mos kishte probleme dhe ia arritëm - shprehet presidenti i peqinasve. - Që të gjithë nga ana e kampit tonë kanë qenë korrektë deri në fund. Gjithsesi, nuk mund të lë pa përmendur ofendimet që tifozët i kanë bërë
gjatë gjithës ndeshjes deputetit të Peqinit, Dashnor Sula. Dukej sikur ishte një strategji, pasi e kanë fenduar në mënyra të ndryshime dhe me shprehje nga më banalet, duke e ditur që Sula është shumë
impulsiv. Megjithatë, deputeti është përmbajtur dhe është treguar shumë i duruar, vetëm që të mos shkaktonte incidente. Jam befasuar shumë nga sjellja e tifozëve dhe i kërkova disa herë presidentit Laze që të ndërhynte për të qetësuar gjendjen. Klubi i Elbasanit dhe tifozët duhet t’i kërkojnë falje të gjithë Peqinit, për atë që ndodhi të mërkurën”, u shpreh Xhavit Ismaili.