Nora: bera mire qe zgjodha Peqinin

Ali Hallulli 17.1.2008
Sulmuesi gjirokastrit Arlind Nora po përshtatet dita-ditës me ekipin e ri peqinas
Gjirokastriti Arlind Nora është përforcimi i parë dhe më i rëndësishmi për Shkumbinin në këtë periudhë. Ish-sulmuesi i Vllaznisë për pjesën e parë të kampionatit ka ditë që i është bashkuar përfundimisht Shkumbinit dhe ka udhëtuar me ekipin për në Ulqin për zhvillimin e fazës përgatitore. Me ardhjen e Norës, reparti i sulmit në ekipin bardhekaltër fuqizohet edhe më shumë pas Stojkut, Dervishit, Dalipit dhe të riut me perspektivë Mustafaj. Mësohet se sulmuesi gjirokastrit ka qenë në planet e Shkumbinit që në fillim të sezonit, por me sa duket atë e joshi oferta shkodrane për të luajtur në Intertoto me ekipin kuqeblu, duke shënuar edhe dy gola. Mjaftuan dy golat ndërkombëtarë për Norën, sepse në kampionat nuk gjeti hapësirat e duhura, për më tepër tërheqja e tij shpesh në repartin e mesfushës së ekipit shkodran bënë që gjirokastriti të kërkojë "divorcin" me Vllazninë, për t'iu bashkuar Shkumbinit.

Nora pranon se e ka pasur të lehtë të përshtatej me mjedisin e ri, sepse e njihte nga afër pjesën më të madhe të futbollistëve të Shkumbinit, ku midis tyre gjente edhe bashkëqytetarin e vet Shenaj. Për Norën, klima dashamirëse që ai gjen, si dhe mirëkuptimi me drejtuesit, sidomos me presidentin Ismaili, është një garanci e plotë për të dhe për ecurinë e ekipit. "Janë vetëm ditët e para, por e pranoj se jam shumë i kënaqur me zgjedhjen që kam bërë. Kjo më bën optimist për të ardhmen time. Me një pjesë të mirë të futbollistëve njihem që më parë, pa përmendur bashkëqytetarin tim, mesfushorin Shenaj. Eshtë një klimë dashamirëse nga të gjithë dhe përshtypje të veçantë më ka lënë presidenti Ismaili, të cilit i detyrohem shumë," - thotë mes të tjerash sulmuesi i ri i Shkumbinit, Arlind Nora, përpara nisjes me autobus për në Mal të Zi, ku bashkë me Shkumbinin po zhvillon fazën përgatitore. Të njëjtat gjëra ai i shpreh edhe nga Ulqini nëpërmjet linjës telefonike në prononcimin e tij. Për Norën, që ka marrë pjesë në shumë në grumbullime më parë, kushtet e krijuara nga presidenti Ismaili në çdo drejtim janë mjaft të mira, që ai i cilëson si asnjëherë tjetër. "Ekipi stërvitet dy herë, në terrene mjaft të mira, ndërkohë që kushtet e hotelit për ushqim e fjetje i plotësojnë më së miri kërkesat e grumbullimit. Kjo tregon edhe një herë kujdesin dhe seriozitetin e drejtuesve, sidomos të presidentit Ismaili, të cilin e vlerësoj shumë.

Jam i bindur që kjo fazë përgatitore do të shërbejë shumë për ekipin në të ardhmen dhe sigurisht edhe për mua," - deklaron nëpërmjet telefonit që nga Ulqini sulmuesi Nora. Ai pranon se për momentin ka pak mangësi në përgatitjen fizike për shkak të problemeve që ka pasur, por është plotësisht i bindur që me punën që bëhet në ekip, do të arrijë që shumë shpejt ta kalojë këtë gjendje, për të qenë plotësisht i gatshëm për trajnerin Magani në ndeshjen e parë me Flamurtarin në Vlorë. "Edhe pse janë vetëm ditët e para, e them me bindje se po bëhet një punë e mirë, duke u stërvitur me ngarkesë dy herë në ditë. Kjo më bën optimist që edhe unë të jem i gatshëm për ekipin dhe për trajnerin Magani për ndeshjen e parë me Flamurtarin. Me këtë ritëm do të kem mundësi për të punuar më shumë për të rritur treguesit fizikë, pasi e pranoj që jam më prapa me ekipin në këtë drejtim, por i bindur plotësisht në arritjen e objektivit," - përfundon nga Ulqini sulmuesi i Shkumbinit, gjirokastriti Arlind Nora.
sportishqiptar

me vjen shum mire se ka ardh nora te ju se asht nje lojtar ylle