Magani, “shefi kërkon qetësi”

Magani, “shefi kërkon qetësi

Shkumbini arriti barazimin e katërt të sezonit të dielën kundër Partizanit dhe pika e marrë është vlerësuar pozitivisht nga peqinasit. Para stërvitjes së djeshme, trajneri Gugash Magani ka folur me lojtarët duke bërë vlerësimet e kësaj ndeshje. Magani është ndalur në anët negative dhe pozitive të sfidës të së dielës. Ai u ka bërë vërejtje lojtarëve të tij për mungesën e mentalitetit fitues, shfaqur në një pjesë të madhe të lojës, gjatë së cilës Partizani kundërsulmoi shumë rrezikshëm. “E pranuam më shumë se sa e kishim menduar presionin e Partizanit. Ndryshe nga ndeshjet e tjera, nuk më pëlqeu mënyra si u sollët në fushën e lojës. U shkundëm vetëm kur Partizani kaloi në avantazh dhe u rrezikuam të humbisnim”. Por ka patur vend edhe për fjalë të mira: “Kemi 8 javë që nuk e njohim humbjen e ndodhemi në vendin e gjashtë, tregues këto që flasin për qëndrueshmërinë e skuadrës”, theksoi njëshi pankinës peqinase. “Po kështu, pas shënimit të golit të barazimit kemi luajtur siç duhet, ashtu si duhet të jetë fytyra e vërtetë e skuadrës sonë”. “Kundërshtarët e tjerë janë të githë për t’u vlerësuar, ndonëse treguam vlera kundër Partizanit”, ka thënë në vijim tekniku. “Prandaj pres një reagim më pozitiv të skuadrës, sepse shoh që pas përballimit të Dinamos dhe Partizanit ka një lloj lëshimi në planin psikologjik. Asgjë nuk ka mbaruar”. Ndeshjen e ardhshme, Shkumbini do ta luajë të shtunën përballë skuadrës kampione. Duke e njohur forcën e kundërsharit dhe ambiciet e skuadrës së tij, Magani ka kërkuar që të jetë i përqendruar në zgjedhjet që duhet të bëjë. Por, ai ka shprehur hapur se nuk është i qetë në këtë pragndeshje: “Kampionati është i gjatë dhe shumë gjëra mund të ndodhin rrugës”, ka thënë ai, duke lënë të nënkuptohet se don të jetë sa më larg fjalëve që kanë nisur të fliten këto ditë në “qarqe të larta”.