Pashja: Shkumbini nuk e harron lehtë dënimin e vjetshëm

Pashja: Shkumbini nuk e harron lehtë dënimin e vjetshëm

Duket se në prag të ndeshjes kundër Partizanit është ndezur së tepërmi atmosfera në kampin peqinas. Këtë radhë ka qenë kapiteni i Shkumbinit, ai që ka dhënë shkëndijën e radhës. Ai ka sjellë ndër mend sezonin e kaluar, kur kanë qenë pikërisht të kuqtë ata që kanë ndaluar hovin pozitiv në pesë javët e para të kampionatit, teksa i kanë paditur me pa të drejtë peqinasit duke bërë që ekipi të pezullohet plot gjashtë javë pa luajtur në fushën e tij. Kaq është dashur që kërkesës së presidentit Ismaili vetëm për fitore, t’i përgjigjet edhe vetë kapiteni i skuadrës, duke i mobilizuar akoma më shumë të gjithë futbollistët se kjo ndeshje është prestigj për t’i treguar çdo ekipi se mund të fitojnë pa probleme, por me kolektivitet dhe forcë të ekipit.
Për “Panorama Sport”, në prag të kësaj sfide kapiteni i ekipit shprehet: “Shkumbini tashmë nuk është skuadër që lufton për mbijetesë, por është rival i hapur i Partizanit. Kjo bën që të mendojmë pa mëdyshje për fitoren në përballjen e radhës. Të gjithë e kujtojnë se shkaku i dënimit tonë vjet dhe rrezikimi i ekipit ka qenë pikërisht skuadra e presidentit Xhani, kështu që kjo do ta angazhojë edhe më tepër ekipin për të rikthyer nderin e asaj sfide në vendin e vet. Partizani na e ka një borxh jo të largët dhe ne do t’i kthejmë kusurin e saj që ata nisën me një fitore bindëse, për të kënaqur tifozët tanë dhe për të ruajtur ecurinë tonë në një rrugë drejt skuadrave të kreut. Nga ana tjetër, ne do të bëjmë kujdes, sepse Partizani nuk është ekip që duhet nënvlerësuar, pasi ai e ndjen pranë rrezikun tonë, ndaj dhe do të luajë fort. Megjithatë, mobilizimi ynë do të bëjë që të triumfojmë ndaj çdo plani të të kuqve. Dhe, së fundi, gjej rastin që këtë përkujtim që ju bëra është edhe për tifozët tanë, që të jenë të qetë dhe të kenë besim se kjo ndeshje do t’i kënaqë ata, sikurse dhe u them të mos bëhen pre e asnjë provokimi nga ana e kujtdo tek Partizani”, ka përfunduar kapiteni i Shkumbinit.