Vidio: Rikthehet dhuna ne stadiumet e Superliges

Vidio: Rikthehet dhuna ne stadiumet e Superliges, korcaret protestojne!

Java e Katert e vlefshme per sezonin 2007-2008 ka pare perballe Skenderbeun me Besen e cila ka perfunduar me rrezultatin 1-1. Ne perfundim te ndeshjes ka patur acarim te madh nga tifozeria Korcare me pretendimin se gjygjtari e ka mbyllur ndeshjen 1minute perpara perfundimit te minutave shtese. Me shume acarimi ka ardhur mbasi Skenderbeu ka qene ne sulm kur eshte degjuar bilbili i gjygjtarit te gares. Dhuna dhe presioni ka qene i madh, aq sa forcat e rendit kane shoqeruar te tre gjygjtaret bashke me ekipin e Beses deri ne dalje te qytetit te Korces.


SHIKONI VIDEON https://www.youtube.com/watch?v=InfaSFmKjJQ

Sherr në Korçë, rrethohet stadiumi

Tifozeria vendase proteston ndaj gjyqtarit, duke bllokuar për 30 minuta hyrjen


Dhuna i është kthyer Kategorisë Superiore, këtë radhë në qytetin e Korçës, ku ngjarje të tilla ishin harruar prej kohësh. Tifozeria ka protestuar në mënyrë të dhunshme ndaj gjyqtarit Pajtim Lapi, pas barazimit 1-1 që Skënderbeu vendas regjistroi kundër Besës. Fillimisht tifozët kanë tentuar të gjuajnë gjyqtarin me mjete të forta në përfundimin e 90 minutave, e më pas kanë rrethuar stadiumin, duke shkatërruar disa prej ambienteve të jashtme, derisa ka ndërhyrë policia, e cila ka qetësuar përfundimisht situatën e krijuar. Shkak i kësaj revolte masive janë bërë disa vendime të diskutueshme të Lapit, si kartoni i kuq i dhënë në pushim të ndeshjes për trajnerin e Skënderbeut, Faruk Sejdini, apo mbyllja e ndeshjes një minutë para kohe, ndërsa korçarët kërkonin golin e fitores.

Situata në stadiumin e Korçës është acaruar në fillimin e pjesës së dytë të ndeshjes, kur tifozët kanë parë me çudi se Faruk Sejdini nuk qëndronte më në stolin e skuadrës, por në tribunë. Ai u ka bërë të ditur të gjithëve se ishte ndëshkuar me karton të kuq nga gjyqtari Pajtim Lapi, pas një debati me këtë të fundit. Që në këtë moment kanë filluar thirrjet kundër gjyqtarit, të cilat janë qetësuar paksa pas golit të avantazhit të shënuar nga Ngjela në minutën e 47-të. Por në minutën e 71-të, Elokan, i sapofutur në fushën e lojës, ka arritur të vendosë baraspeshën në shifra, duke mundur portierin Billa me një gjuajtje me kokë. Që nga ky moment, tifozeria korçare ka protestuar ndaj çdo vendimi të Lapit, ndërsa ndeshja u është afruar minutave të fundit pa asnjë rast për t‘u shënuar. Por protestat më të ashpra kanë ardhur në momentin kur Lapi ka sinjalizuar përfundimin e takimit, që sipas korçarëve ishte një minutë para kohës së akorduar nga gjyqtari i katërt. Për më tepër, në atë moment, në zotërim të topit ishin futbollistët e Skënderbeut, dhe kjo ka mjaftuar për të nxitur zemëratën e publikut vendas. Fillimisht kanë vërshuar sendet e forta në fushë, duke përfshirë shishe uji dhe stola të stadiumit, ndërsa një tifoz ka zbritur në fushë duke tentuar të godasë Lapin. Vetëm ndërhyrja e forcave të rendit ka arritur të evitojë më të keqen për gjyqtarin shkodran, duke ndaluar tifozin dhe duke rrethuar me skafandra gjyqtarin, për ta shoqëruar në dhomat e zhveshjes.

Kjo ka rritur edhe më shumë tërbimin e tifozerisë, që pas largimit nga stadiumi, ka rrethuar impiantin duke gjuajtur me sende të forta edhe ndaj forcave të shumta policore, në pritje të largimit të gjyqtarit. Stadiumi me dyer të mbyllura ka përjetuar edhe sulmin me gurë, ku si pasojë janë thyer xhamat e derës kryesore. Për më shumë se 30 minuta pas përfundimit të ndeshjes, turma e tifozëve nuk ka lëvizur nga vendi duke bërtitur në kor kundër gjyqtarit. Vetëm pas largimit nga stadiumi të trajnerit Sejdini, turma është qetësuar disi, por nuk është shpërndarë. Forca të shumta policore kanë shoqëruar gjyqtarin për ta mbrojtur nga sulmi apo ndonjë incident tjetër, dhe po kështu, nën masa të rrepta sigurie janë shoqëruar edhe lojtarët e Besës drejt autobusit të tyre, edhe ky i fundit i rrethuar nga tifozeria korçare. Tifozët janë shpërndarë vetëm pasi policia ka "çarë" rrethimin, duke shoqëruar jashtë qytetit si gjyqtarët e ndeshjes, ashtu edhe skuadrën e Besës.