Aksident fatal për ish-kampionin MekRi

Ish-kampioni i botës në garat relli, Kolin MekRi, ka humbur jetën pas një aksidenti tragjik me helikopter. Në aksidentin që ndodhi vetëm pak kilometra larg vilës së tij në Skoci, gjetën vdekjen edhe tri persona të tjerë, mes të cilëve edhe djali 5-vjeçar i MekRi. Ish-piloti 39-vjeçar ishte një pilot ekspert helikopterësh dhe mendohet se ka qenë ai në drejtimin e mjetit fluturues. Sipas dëshmitarëve të ngjarjes, helikopteri ka shpërthyer në ajër, duke u rrëzuar më pas në tokë dhe kjo e ka bërë thuajse të pamundur saktësimin e ngjarjes. E gjithë bota e garave automobilistike ka nderuar dje figurën e MekRi, i cili bëri emër në garat relli në një karrierë që filloi në vitin 1987 dhe u mbyll zyrtarisht në vitin 2005, me 25 fitore në gara, një titull kampion në vitin 1995 dhe dy vende të dyta në kampionatet që vijonin. Të gjithë e kanë cilësuar atë një prej pilotëve që ndryshoi fytyrën e këtij sporti, duke e bërë të njohur në botë.