SHKUMBINI 1-0 Lushnja

Shkumbini konsolidon “Europën”

Shkumbini vazhdoi të mos falë pikë në Peqin, kësaj radhe “viktima” ishte Lushnja. Roland Dervishi shënoi një gol të shpejtë në harkun e dhjetë minutave (i kontestuar goli nga lushnjarët), duke zhbllokuar shumë shpejt rezultatin e duke i dhënë qetësinë e duhur Shkumbinit për të administruar lojën deri në fund të takimit. Kapiteni i Lushnjës, Gentian Çela goditi shtyllën. Formacioni i Gugash Maganit ndodhet në vendin e katërt, me 44 pikë, katër më pak se Dinamo e vendit të tretë, dhe fakti që bën pjesë edhe në “katërshen” e Kupës, e bën më të sigurt një vend në Ligën e Europës. Kjo ishte fitorja e 14-të historike në 28 ndeshje me Lushnjën (8 fitore).

Peqinasit vazhdojnë të mbrojnë vendin e katërt, duke qenë racionalë me shënimin e një goli

Shkumbini - Lushnja 1-0
Shënues: Dervishi 9′

Shkumbini: Llani, Pasha, Mujdragiç, Salliu, Shameti, Shenaj, Turdiu, Delioski (Gërxho 52′), Gjata (Nora 46′), Dervishi, Mustafaj (Jaksimoviç 72′). Trajner: G.Magani.
Lushnja: Bejte, Dhimo, Sulo, Bufasi, Ruco (Gjoni 70′), Xhagalliu (Baze 46′), Korreshi, Çela, Tepshi, Bubeqi (Elezi 60′), Hasalla. Trajner: I.Gjyla.
Gjyqtarë: R.Sadiku, A.Mahmuti, E.Gançi (Elbasan)
Kartonë të verdhë: Nora, Ruci, Cela

“Radiografia”

7′ Shkumbini pranë golit, kur Delioski gjuan me forcë dhe në momentin e fundit një mbrojtës arrin ta devijojë në goditje këndi, duke shpëtuar portën.
9′ Dervishi nga e djathta di të përfitojë nga pasiguria e mbrojtjes mike, duke dalë përballë portierit dhe shënon në pozicion të prirët. 1 0 për Shkumbinin.
15′ Gjata, me portën bosh pas gabimit të portierit Bejte, nuk di të përfitojë për të shënuar golin e dytë.
17′ Çela ka ekzekutuar një goditje dënimi nga e majta e sulmit. Topi kalon gjithë zonën e portës, duke mos u devijuar nga sulmuesit e Lushnjës.
25′ Gjuajtja e Çelës nga distanca pritet me qetësi e siguri nga ana e Llanit.
34′ Një gjuajtje për t’u harruar e Hasallës, që nuk di të shfrytëzojë krosin e Bubeqit në të djathtë.
37′ Mustafaj u është shmangur dy mbrojtësve miq për ta gjuajtur me kthesë, por pret me vështirësi portieri Bejte në dy kohë.
53′ Çela ka rrezikuar me një gjuajtje nga distanca, që përfundon mbi shtyllën e portës së Llanit.
55′ Dervishi i ka mundësitë për ta dyfishuar rezultatin, ku del i vetëm përballë Bejtes, por pa e mposhtur atë, që arrin ta grushtojë gjuajtjen e tij në goditje këndi.
60′ Llanit i vjen në ndihmë trau i sipërm pas gjuajtjes së fortë të Koreshit nga distanca.
70′ Pas Mustafait, që gjuan më forcë, është Nora që drithëron me një gjuajtje të fuqishme, duke “qethur” shtyllën.
79′ Llani ka treguar vlerat e veta, duke grushtuar gjuajtjen e Koreshit.
80′ Elezi ka hezituar përballë Llanit, duke mos shfrytëzuar krosin e Çelës, topi përfundon jashtë.

Komenti

Ka vendosur rezultatin e takimit të djeshëm Shkumbini e Lushnjës një gol i shënuar në fillim të takimit nga Roland Dervishi, por që ka pasur vlerën e tri pikëve. Për Shkumbinin, ishte fitorja e parë në këtë sezon përballë Lushnjës, duke dëshmuar se di të luajë ndershmërisht, duke hedhur poshtë edhe fjalët e përhapura për ndonjë talent të mundshëm.

Me këtë rezultat, ku më tepër u duk që pati rëndësi marrja e tri pikëve dhe jo loja e ekipit, Shkumbini arriti të konsolidojë pozicionin në vendin e katërt, duke e ndëshkuar Lushnjën në momentin e saj më të mirë. Loja pati dy tabllo, me një pjesë të parë më të mirë të vendësve dhe me një pjesë të dytë, kur lushnjarët ishin më ngulmues dhe ndoshta meritonim më shumë.

Mundet që në mos arritjen e këtij objektivi për ekipin e Gjylës ndikuan edhe mungesat që pati në formacion për dëmtime apo kartonë. Shkumbini e nisi më mirë lojën, duke qenë më ngulmues, por edhe më i qetë në veprimet e veta. Kjo epërsi nuk vonon dhe konkretizohet, kur sinjalin e parë e jep mesfushori maqedonas Delioski, për t’ia lënë radhën sulmuesit peqinas R.Dervishi, që diti të veprojë mirë në rastin e shënimit të golit.

Mungesa për disa minuta reagimi i miqve dhe është Shkumbini që dikton në fushë për të marrë zemër, duke e përqendruar lojën në gjysmëfushën kundërshtare. Miqtë kalojnë çaste të vështira, duke përqendruar shumë forca në zonën e vet, por pa harruar edhe kundërsulmin nga krahët me Bubeqin, Tepshin e Hasallën, por pa krijuar situata të rrezikshme në portën e Llanit.

Ajo që bie në sy në lojën e Shkumbinit është aktivizimi i lojës nga krahët me Delioskin, Dervishin e Turdiun, duke krijuar situata të vështira në portën lushnjare. Në pjesën e dytë shohim që në fillim një Lushnjë që është më ngulmuese dhe që luan më fort e më me dëshirë në kërkim të golit të barazimit, duke përfituar edhe nga një qetësi e tërheqje të ekipit të Shkumbinit në mbrojtje të rezultatit.

Në këto minuta të mira për Lushnjën, Shkumbini i ka mundësitë për të gjetur golin e dytë dhe për ta ndëshkuar kundërshtarin, që nga dëshira për të shënuar golin e barazimit, krijonte nga pas hapësira. Dervishi në minutën e 55 të i ka mundësitë e plota për ta mbyllur takimin.

Sulmuesi peqinas, në një kundërsulm, bën gjithçka mirë që nga mesi i fushës, por pranë portës mike nxitohet, duke finalizuar keq e duke i dhënë mundësi portierit Bejte të grushtojë e të shpëtojë portën nga një gol i sigurt. Trajnerët ndërhyjnë dhe i realizojnë të gjitha zëvendësimet, por Lushnja vazhdon të jetë më kërkuese për të gjetur golin e barazimit, ndërsa Shkumbini mendon më shumë për prishjen e aksioneve të kundërshtarit, për të ruajtur avantazhin e golit.

Te Shkumbini në fundin e pjesës së dytë nuk mungojnë të shfaqen edhe shenjat e lodhjes fizike si rezultat i ndeshjes ne mesjavë me Flamurtarin, por kundërshtari nuk është në gjendje të përfitojë. Merita është e mbrojtjes me Mujdragiçin, që përballoi një ngarkesë të madhe, si dhe e portierit Llani. Kapiteni i Shkumbinit nuk pati shumë punë përballë sulmuesve lushnjarë, por në episodet që iu paraqitën gjatë pjesës së dytë tregoi aftësi dhe vlera, duke mbetur pika më e fortë e Shkumbinit. Si përfundim, mund të themi se ishte një fitore e merituar e Shkumbinit përballë një Lushnje që tregoi se meriton më shumë.

Deklarojnë:

Sokol Branica, zv/trajner i Shkumbinit: “Kemi fituar një ndeshje të vështirë përballë një kundërshtari si Lushnja, e cila kërkonte rezultatin pozitiv për vetë pozicionin që ka në renditje. Në pjesën e parë luajtëm më mirë, shënuam një gol, por edhe krijuam raste të tjera, ndërsa në pjesën e dytë Lushnja na vuri në vështirësi. Në ndeshje të tilla e rëndësishme është të marrë pikët dhe këtë e bëmë për të konsoliduar pozicionin tonë në vendin e katërt. Dje ishim pak të lodhur nga ndeshja me Flamurtarin për kupë në mesjavë e Lushnja kërkoi ta shfrytëzojë. Edhe pse kundërshtari pati disa mungesa, u paraqit mirë, duke na vënë në vështirësi në pjesën e dytë.”

Ilir Gjyla, trajner i Lushnjës: “Mendoj se, pavarësisht rezultatit, ekipi ynë e justifikoi në fushën e lojës atë që patëm deklaruar përpara ndeshjes, për të bërë më të mirën në Peqin. Për shkak dëmtimesh e kartonësh, përballë Shkumbinit patëm disa mungesa kryesore, por duhet thënë që ata që ishin në fushë e justifikuan veten. Kemi luajtur shumë mirë, sidomos në pjesën e dytë. Kemi pasur ngritje të nivelit të lojës në këtë pjesë si rezultat i lodhjes fizike të Shkumbinit, por futbolli kështu e ka. Nuk i paragjykoj gjyqtarët, por jam i mendimit që të tilla takime, kur luan Lushnja dhe ka rival Elbasanin, gjyqtarët duhet të jenë nga qytete të tjera.”