Ismaili: Të ngjallin neveri fjalët e kavajasve

Presidenti i Shkumbinit, Xhavit Ismaili, u përgjigjet akuzave të drejtuesve të Besës
Takimi në Peqin me Besën, që u fitua minimalisht 1-0, vazhdon të diskuohet gjerësisht në mjediset futbolldashëse të qytetit. Deklaratat dhe akuzat pas ndeshjes të drejtuesve të Besës kanë lënë një shije të hidhur, duke mos u gjetur forca dhe rruga e duhur nga Besa për të justifikuar humbjen dhe problemet ekipit, që tani renditet në vendin e gjashtë.
Futbollistët dhe drejtuesit peqinas i kanë hedhur poshtë me indinjatë, duke i konsideruar si shpifje dhe pa asnjë bazë. Mendimi i tyre është se fitorja e së shtunës ka qenë plotësisht e merituar. Nuk kishte si të qendonte pasiv apo indiferent në këtë rast prsidenti i Shkumbinit, Xhavit Ismaili, i cili ka thënë:
“Të ngjallin neveri fjalë të tilla nga drejtuesit e Besës. Ato nuk janë gjë tjetër, veçse shpifje me qëllime të caktuara. Shkumbini fitoi me meritë, me mund dhe djersë e ky nuk është rasti i parë, por me sa duket drejtuesve kavajas nuk u pëlqeu që i eliminuam nga Kupa brenda në Kavajë. Shkumbini po e largon Besën edhe nga pretendimet për kampionat dhe për këtë po sajojnë e po shpifin gjëra të paqena. Ne fituam ndaj një Bese që kishte me vete edhe gjyqtarët.”
Numri një i Shkumbinit mendon se ka qenë një skenar i përgatitur nga kundërshtari, me synimin për ta provokuar sa mundet futbollistët dhe sportdashësit peqinas, për të përfituar më pas e për t’u justifikuar, por që u shkuan dëm. “Të gjithë ata që e ndoqën takimin në fushë i konsiderojnë pa bazë pretendimet e Besës dhe për mua janë shpifje, pasi realisht kanë qenë futbollistët e Shkumbinit që janë provokuar gjithë kohën nga kundërshtari, pa harruar edhe veprimet e stafit.
Të gjitha këto për të pasur mundësi më pas të ankoheshin, por kjo nuk ndodhi. Gjej rastin të falënderoj sportdashësit dhe ekipin për qetësinë e treguar,” - argumentoi presidenti Ismaili. Duke kërkuar që të lërë pas dhe me dëshirën që një ndeshje futbolli të shërbejë për forcimin e miqësisë mes qyteteve fqinjë, Ismaili i kundërvihet homologut Bizhdili, duke i kujtuar se miqësia e vjetër mes Peqinit dhe Kavajës nuk mund të ndikohen nga fjalët e nxituar të Bizhdilit, pasi janë dy qytete me traditë, kulturë e miqësi tradicionale, që dijnë të dallojnë realitetin, duke forcuar miqësinë e lidhur me krushqi të shumta.

Ali Hallulli
Sporti shqiptar