Nora: Shkumbini “blindon” sot vendin e 4-t

Sulmuesi gjirokastrit Arlind Nora rikthehet në formacion dhe kërkon sërish të shënojë

Eshtë rritur së tepërmi entuziazmi i sportdashësve peqinas për ndeshjen e radhës me Besën. Kjo shihet edhe nga numri i tyre i madh në ndeshjet e seancës stërvitore. Për ta edicioni po hyn në një fazë mjaft interesante, ku Shkumbini po lufton në të dy frontet, kampionat dhe kupë. Në këtë mënyrë, ky muaj përcaktohet si vendimtar. Sfida që do të luhet në Peqin me Besën përbën edhe hapin e parë të rëndësishëm për realizimin e objektivave që ka Shkumbini, pasi Besa është një rival i drejtpërdrejtë për vendin e katërt, duke qenë në një nivel pikësh me Shkumbinin.

Djemtë e Maganit janë më të favorizuar, pasi do të luajnë në fushën e vet. Pasi kanë eliminuar Besën në kupë, duke kërkuar për herë të parë finalen e 6 majit, bardhekaltrit besojnë në fitoren e sotme, për të pasur moralin e duhur për ndeshjen e parë për kupë në mesjavë. Për sulmuesin gjirokastrit, Arlind Nora, janë të gjitha mundësitë që ekipi i tij ta ligjërojë vendin e katërt, duke përfituar edhe nga kalendari i favorshëm, për të lënë tri pikë larg Besën.

Nora pritet të jetë në fushë në formacionin e Maganit pas një jave pushimi, ku mungoi në ndeshjen me Teutën, për shkak të gjendjes jo të mirë shëndetësore. Mungesa e tij përballë Teutës u ndje jo pak, pasi gjirokastriti shquhet për grintë në fushën e lojës. “Më erdhi keq për atë rezultat që u arrit, por humbja është lënë pas dhe prej ditësh jemi përqendruar në ndeshjen me Besën. Jam i bindur në fitore, pasi për ne është si ndeshja e sezonit për vetë objektivat që kemi,” deklaron sulmuesi Arlind Nora.

Autori i 6 golave për Shkumbinin, shumë prej tyre përcaktues, është i bindur për atë që shpreh, duke parë edhe forcën e ekipit të tij. “Në këtë takim të rëndësishëm do të dëshiroja të shënoja dhe ai gol të ishte përcaktues, por më shumë se golin, unë kërkoj të fitojë Shkumbini, sepse e meriton. Do të kërkojmë fitoren me Besën në kampionat për të shfrytëzuar më pas ndeshjen e Kupës me Flamurtarin në Vlorë,” përfundon sulmuesi gjirokastrit Arlind Nora.