Ismaili pret kthesën e madhe ndaj Teutës

Presidenti peqinas kërkon tri pikët
Dita e djeshme ka qenë pushim
për skuadrën peqinase. Pas një
jave stërvitjeje intensive, e cila u
mbyll me seancën e paradites të
shtunën, sot të gjithë lojtarët pritet
të jenë nën urdhrat e trajnerit Magani.
Në mënyrë që të kishin
mundësi për të ndjekur impenjimin
e skuadrës sonë kombëtare, drejtuesit
peqinas kanë menduar që
të shtunën stërvitja të kryhej paradite.
Të bën përshtypje fakti që
bardhekaltrit, ndryshe nga ekipet
e tjera, nuk kanë zhvilluar ndonjë
takim miqësor, duke u mjaftuar me
ndeshjet e kontrollit brenda grupit
në dispozicion. Në përballjen e
fundit para një jave, ku shkumbinasit
u mundën në shtëpi nga Partizani,
të gjithë të pranishmit kanë
mbetur të befasuar nga fitorja e
të kuqve, për vetë mënyrën e zhvillimit
të takimit, ku shihej qartë
dominimi i peqinasve. Vetë njëshi
i klubit të Shkumbinit, presidenti
Xhavit Ismaili, pas takimit është
parë i mërzitur, sepse skuadra për
të cilën ai ka investuar humbi një
mundësi të mirë për të qëndruar
sa më pranë me ekipet e kreut,
duke humbur në këtë rast
shpresën për t’u ngjitur në atë
pozicion që mund të merrte pjesë
në Kupat e Evropës. Edhe pse pas
këtij takimi presidenti i Shkumbinit
nuk u shpreh në lidhje me këtë
humbje ndaj Partizanit, në ditët në
vijim ai mbeti i zhgënjyer dhe i indinjuar
nga deklaratat e stafit të
kuq, për favorizime arbitrash apo
për presione të ndryshme. “Nuk
arrij ta kuptoj nga i nxjerrin këto
gjëra lojtarët e Partizanit, pasi ata
erdhën atje, luajtën një takim, të
cilin, duke u mbrojtur mjaft mirë,
arritën ta fitojnë dhe pastaj
hodhën një lumë akuzash të kota
ndaj nesh. Unë si president i Shkumbinit
jam munduar që në çdo
takim të krijoj një atmosferë sportive
e mbi të gjitha festive dhe kemi
respektuar çdo ekip kundërshtar
në fushën tonë”, u shpreh presidenti
peqinas Ismaili. Megjithatë,
ai e konsideron të mbyllur kapitullin
me Partizanin, duke e hedhur
vështrimin e skuadrës së tij në
takimet e mbetura të kampionatit.
“U kam kërkuar djemve që të harrojnë
humbjen e fundit dhe të
përqendrohen te takimet e mbetura,
prandaj që me takimin përballë
Teutës së Durrësit pres një reagim
të fuqishëm të tyre. Siç u vu
re edhe në takimin e fundit, tashmë
nuk ka më skuadra të forta
apo të dobëta, pra duhet të
shënosh që të arrish fitoren ndaj
çdo ekipi. Në Durrës na pret një
takim i fortë, por unë pres nga
djemtë një fitore të madhe, për të
harruar zhgënjimin e fundit në shtëpi.
Nëse ia arrijmë të marrim tri
pikët, atëherë mendoj se futemi
përsëri në garë për vendin e tretë
në kampionat”, përfundoi prononcimin
e tij presidenti i skuadrës së
Shkumbinit, Xhavit Ismaili.
Fatmir Ahmeti
30/3/2009
Panoramasport