Ironia e kalendarit, sërish përballë Flamurtarit

Shkumbini ka vazhduar ritualin e fitoreve në kampionat dhe “viktima”
e radhës ishte Flamurtari i Vlorës, ndaj të cilës mori një sukses
mjaft të vështirë, duke përmbysur rezultatin e pjesës së parë
të arritur nga miqtë. Trajneri Gugash Magani vinte në këtë përballje
me katër mungesa të formacionit bazë siç ishin Byzhyti, Dervishi,
Grami dhe Nora. Ky i fundit edhe pse e kishte marrë ndëshkimin
me karton të kuq gjatë ndeshjes për Kupë ndaj Besës, çuditërisht
nuk është lejuar të aktivizohet për kampionat si rezultat i një vendimi
të dhënë nga FSHF-ja, e cila i ka dhënë një ndëshkim që bie
ndesh me rregulloren e saj. Sipas rregullores së FSHF-së, kartonët
që merren në ndeshjet e Kupës janë të vlefshme vetëm në
këtë kompeticion dhe anasjelltas. Pra, i binte që Arlind Nora të mos
luajë në ndeshjen e kthimit për Kupë në Kavajë. Gjithsesi, në takimin
e së dielës, Magani ka hedhur në fushë tre futbollistët e rinj, të cilët
janë aktivizuar më pak se të tjerët siç ishin mbrojtësi Ramazani dhe
dy mesfushorët Gjata dhe Gërxho. Të tre këta futbollistë kishin
mundësi të shprehnin vlerat e tyre në fushë, mirëpo në të vërtetë
gjatë pjesës së parë skuadra e Shkumbinit ka zhvilluar një ndeshje
jo të mirë madje, duke u ndëshkuar në fundin e pjesës së parë nga
djemtë e Memushit. Futja e Deliovskit në pjesën e dytë si dhe rritja
e nivelit të lojës së bardhekaltërve ka bërë që këta të rinj jo vetëm
të shënojnë, por edhe të përmbysin disavantazhin e pjesës së
parë. Në lidhje me këtë ndryshim psikologjik, që u pa te djemtë e
teknikut Magani gjatë pjesës së dytë, vetë timonieri peqinas u
shpreh se i kërkoi skuadrës në dhomat e zhveshjes të luftonin fort
dhe të luanin me zemër për të arritur te suksesi. Kjo këshillë ka
rezultuar me të vërtetë e goditur, pasi lojtarët bardhekaltër në
pjesën e dytë treguan dëshirë për ta fituar takimin dhe ia arritën,
duke përmbysur rezultatin e pjesës së parë. Pas këtij takimi të
fituar, skuadra peqinase konsolidoi pozicionin që mbante, duke
shkuar në kuotën e 36 pikëve. Për ironinë e fatit, sipas kalendarit
të fazës së tretë që do të nisë një javë më pas, skuadra e Shkumbinit
do të ndeshet përsëri me Flamurtarin në takimin e parë të
kësaj faze. Fatmir Ahmeti
Panorama sport