Shkumbini perqendrohet tek flamurtari

Peqinasit kanë lënë pas ndeshjen e kupës me Besën dhe kërkojnë sërish fitore në kampionat
Ekipi i Shkumbinit, dje pasdite, i është rikthyer normalisht stërvitjes për takimin me Flamurtarin në kampionat. Trajneri Magani kërkon të mos humbë kohë përpara këtij takimi të rëndësishëm në mbyllje të fazës së dytë, për të lënë pas ndeshjen e kupës me Besën, që u përfundoi në barazim 1 1.
Përpara fillimit të seancës stërvitore, Magani gjeti rast të përgëzojë të besuarit e tij për lojën që zhvilluan përballë Besës, për dëshirën dhe grintën e treguar, duke kërkuar të njëjtin vlerësim e mobilizim edhe për ndeshjen e kampionatit me Flamurtarin.
Magani ngulmoi për të pasur edhe më shumë përqendrim në fushë, për të mos humbur rastet që krijohen gjatë 90 minutave, ashtu siç ndodhi në ndeshjen e kupës me Besën. Edhe pse nuk dëshiroi të merrej me gjykimin, sekretari i klubit Astrit Isaj e ka të pamundur të mos shfaqë mendimin e vet dhe të klubit që ai përfaqëson në adresë të gjyqtarit.
“Nuk mund të rri pa e thënë mendimin tim për gjyqtarin, pasi në mënyrë të përsëritur kërkon të na dëmtojë. Ishin marrë të gjitha masat e duhura dhe gjithçka shkoi mjaft mirë në fushë e në shkallët e stadiumit, midis futbollistëve e tifozëve peqinas e kavajas, ndryshe nga sa flitej përpara takimit.
Eshtë për të ardhur keq që me gjykim kërkoi ta prishë bukurinë e këtij takimi midis ekipeve të dy qyteteve fqinj e miq me njëri tjetrin. Peqinasit ditën të tregojnë kulturë sportive, por kjo mesa duket nuk i pëlqeu dikujt, që përsëri gjeti rastin për t’u hakmarrë ndaj klubit të Shkumbinit”, deklaron sekretari Isaj, duke akuzuar gjyqtarin si shkaktar të incidentit në fundin e takimit, kur Magani për një moment kërkoi që ta tërhiqte ekipin nga fusha e lojës.
Sekretari Isaj kërkon që ky takim me Besën të harrohet sa më shpejt, për t’u përqendruar te ndeshjet e kampionatit, pasi e diela po afron dhe Shkumbini do të presë në fushën e vet Flamurtarin. Synimi i ekipit të Shkumbinit për këtë takim që mbyll edhe fazën e dytë do të jetë marrja e rezultatit pozitiv, për ta konsoliduar vendin e 4 ët në tabelën e renditjes.
Shkumbini vjen në këtë përballje pas fitores së merituar me golin e bukur të Norës, të arritur ndaj një ekipi si Apolonia, që vinte pas disa rezultatesh pozitive. Sipas Isajt, ekipi i Shkumbinit po kalon një gjendje të mirë, që dëshmohet nga tri fitoret me Vllazninë, me Partizanin në Peqin e atë me Apoloninë në Fier, prandaj dhe një fitore e mundshme me Flamurtarin në ndeshjen e radhës bëhet më e domosdoshme, për të plotësuar idenë se Shkumbini është një realitet në kampionat dhe jo rastësi.
“Në takimin e radhës me Flamurtarin vijmë pas fitores me Apoloninë në Fier javën e kaluar, që është fitorja e dytë radhazi pas asaj me Partizanin në Peqin. Shkumbini e ka siguruar vendin e 4 ët një javë përpara përfundimit të fazës së dytë dhe kjo na nxit edhe më shumë për ta kërkuar rezultatin pozitiv me ngulm, për të qenë brenda objektivave tona në kampionat.
Përgatitjet për këtë takim kanë filluar që sot dhe në ekip ekziston optimizmi i duhur. Të gjithë e kanë të qartë se përballë do të kenë një ekip si Flamurtari me mjaft traditë, një ekip me futbollistë të rinj e të talentuar. Të mos harrojmë se ky ekip gjithmonë në Peqin ka ditur të marrë edhe pikë, prandaj duhet të dimë ta vlerësojmë ashtu si duhet”, ka përfunduar sekretari Astrit Isaj.
Sporti shqiptar